Lawt Lu Lam de Aloi Sha Hkawm Sa Lu Lam N nga
N’gang Uma / October 27, 2006

46 ning hpring Wunpawng Mungdan Shanglawt Hpung, KIO, masat n’htoi hta ningbaw malai Du Kaba N’ban La a mungga hta, Wunpawng Mungdan Shanglawt hpung Party gaw amyu sha ni a matu awng dawm ai Wunpawng Mungdan Shanglawt lu na matu galaw sa wa ai re lam, Party hpung shang masha ni gaw ngang kang ai myit rawng ra ai lam, Mungdan n lu dingsa shakut ra ai lam, ni hpe na lu ai majaw, baw de sai lam ting kahtet prut let n shung si she hprwi nga hkra, myit n’gun lu ai lam byin ai.

Grau n’na gaw ya ten KIO gaw Mungkan Wunpawng Hpung Shimlam Kongsi, UNSC, hta Myenmung a lam jum tek hparan na dawdan lam a n'tsa Myen hpyen asuya myit ra, ninghkap ai lam n galaw ai sha, lapran tsap ai n’dau laika hpe mahtang shapraw dat ai majaw, KIO n'tsa Myen hpyen asuya kaw n’na mung masa, hpyen masa, sut masa shagyip shagyeng ai lam ni, grau grau galaw wa ai rai nga ai ten mung rai nga ai.

Ya na zawng KIO ginjaw salang langai hku n’na tinang uhpung a ninggawn mung masa pang dung rai nga ai ‘Awng Dawm Shanglawt Mung Dan’ gaw gap ra ai lam hpe aja awa tsun wa ai gaw KIO ni Myen Hpyen hte gap hkat jahkring ai hpang shawng ningnan tsun shapraw wa ai lam re hpe maram lu ai. Awng dawm shang lawt matu shakut nga ai lam, UNSC dawdan lam ni hpe ninghkap ai lam n galaw ai lam ni gaw, mung shawa daw wa daw ni ra sharawng ai lam ni rai nga ai. Dai majaw KIO gaw mung chying sha ni ra sharawng ai lam ni hpe galaw sa wa na kumla re ngu mu ai.

Raitim, hpa majaw KIO ni ya du hkra National Convention, NC, de matut lung nga ai lam hpe n chye na ai. Dai lam hte seng n’na KIO salang ni tsun ai gaw, NC n lung yang gap hkat jahkring simsa lam la da ai lam hten n’na, Myen hpyen dap hte bai gap hkat wa na hpe tsang ai majaw lung ai rai re ngu sha htai ma ai. NC lung ai gaw amyu sha lawt lu lam a matu yaw shada lam kaba hte lung ai lam n re ai hpe yawng ngu na daram tsun bawng ban wa ma ai.

Wunpawng Daini Radio shiga hta Dukaba Sumlut Gun Maw tsun ai hpe lakap ga nga yang, dai NC lung ai lam gaw bungli garan galaw ai lam re nga tsun ai. Amyu sha lawt lu lam a matu shaning 46 ning tup shakut nga ai u hpung langai hku n’na, amyu sha ting a matu hpa ahkaw ahkang mung lu la na lam n mu ai National Convention hta shang lawm nga ai gaw, mung masa lam numshe de ganaw woi ai sha rai nga ai.

Lai wa sai 2004 ning na NC zup hpawng hta gap hkat shazim la da ai myu sa baw sang u hpung 13 ni myit hkrum ai hte tang shawn lai wa sai lam ni hpe hti yu yang gaw, awng dawm shanglawt a hkaw ahkang mi n lu tim, n law htum Awng dawm ahkaw ahkang de bai mai lahkam sharawt la mai ai ‘Self Determination’ ngu ai tinang mung daw tinang up hkang lu ai mung masa madang hpe tang madun da ai lam ni hpe mung Myen hpyen atsuya hku n’na hpa myit daw dan ya ai lam n nga ai. Grau n’na, ya ten hta galaw nga ai NC hta mung KIO dat kasa ni tang shawn bawng ban ai lam ni hpe hkap la ai lam n nga ai hpe yu yang, KIO hku n’na NC lung ai hpe bungli garan galaw ai lam gaw, bungli n byin ai ngu maram lu ai.

Ginchyum hku n’na gaw, KIO ni NC kaw na pru, myu sha daw wa daw tsa e ra sharawng ai, u hpung a ninggawn pang dung mung rai nga ai Awng Dawm Shanglawt Mung Dan gaw sharawt lam de yawng ra sai. NC kawn pru yang KIO sha n nga, anhte Jinghpaw Wunpawng amyu sha yawng nga yak jam jau na lam gaw nga ai. ya dai ni mung Myen hte gap hkat jahkring galaw datim, mung masha ni matu gaw grau grau n’na she lam shagu hta nga yak wa nga ai sha re. Ceasefire a majaw, moi na majan prat zawn, majan hprawng, roi rip hkam, sat nat hkrum re lam ni yawm mat tim, sut masa, mung masa, ngasat ngasa masa, hkamja lam, Nawku makam masham masa hte htung hking maka kumla ni hpe si mani ai ladat ni hte adip arip rai nga ai lam ni grau law wa ai hpe yu yang, kaga alak myi sak se madun n ra na shadu ai.

Yak wa na re, jam jau wa na re ngu n’na lam num she de woi na malai gaw, yak tim yak u ga, si tim si u ga, amyu sha lawt lu lam de she rai jang gaw yawng shanglawm shakut lawm na re, shang lawm shakut lawm ai a jaw e si-hkrung si-htan, ru yak jam jau lam ni hkrum katut wa gaw amyu sha lawt lu lam a arang kaba re ai hpe Wunpawng amyu sha yawng chye na hkap la ging ai myit jasat ni rai nga ai. Moi India mung dan na hkringmang daju Jawaharlal Neru wa a ga ‘There is No Easy Walk to Freedom,’ ngu ai ‘lawt lu lam de aloi sha hkawm sa lu na n re,’ ngu ai ga hpe Wunpawng amyu sha ni chye na hkap la let, amyu sha shanglawt hpung hte rau mungdan awng dawm lu lam hta shang lawm yang she tinang amyu grin nga lu na rai nga ai.

Lahta na ning mu ni gaw N’gang Uma a mu mada ai lam ni sha rai n’na, The Kachin Post a n rai ga ai. N’gang Uma gaw United Kingdom kaw shanu nga ai Wunpawng amyu sha langai rai nga ai.