Tsang Ra Nga Sai Amyu Sha Shim Lam
Hkrumra Padang / November 27, 2006

Myen Gum Shem Hpyen Hpung (SPDC) galaw taw nga ai lam ni gaw; amy u sha a shim lam, mungdan a shim lam hta laja lana a htu hkra wa nga sai hta n ga maigan mungdan ni hpe du hkra sharu shayak jam jau jaw taw nga masai rai nga ai. Dai majaw Mungkan Wunpawng Hpung (United Nations) hku n’na shang hparan lawm wa rai sai madang rai nga sai. Ga shadawn; UN dat kasa Mr. Gambari Myen mung de du wa wa ai lam rai nga ai.
.
Mung shawa masha hku n’na mung myen gum shem hpyen hpung hpe n ju n dawng ai lam law wa ai hte lai amyu my u hku n’na ninghkap wa ai lam ni grau law wa nga masai rai nga ai. Ga shadawn; mungdan kata e rai yang National League for Democracy, NLD, 1988 jawngma ramma ni hte hpung kyi ni du hkra ninghkap ai lam hta shang lawm shamu shamawt mat wa nga sai rai nga ai. Maigan mungdan du Myen mung masa hpung ni hku n’na mung lai ladat amyu myu hku adawt ding yang rai nga ma ai.

Myen n re amyu baw sang laknak lang hpung ni hku n’na mung laknak hte matut manoi gasat ding yang, laknak n lang ai hpung ni hku n’na mung ladat amyu my u hte a dawt ding yang, ninghkap ding yang rai nga ai.

Mungkan Wunpawng Hpung a Shimlam Komiti, UN Security Council kaw n’na mung mara la na matu hte shang hparan na matu shakut ding yang rai nga ma ai. Bai n’na, International Labor Organization (ILO) kaw n’na mung, International Court of Justice, ICJ, hta mara la tara jeyang na matu hkyen lajang nga masai rai nga ai. Sin na mungdan ni hte Asia mung dan nkau ni hku n’na mung, tara n shang ai myen gum shem hpyen asuya hte hpa-ga matut n galaw na matu, hpaga lam pat ding yang rai nga ma ai.

Jinghpaw Wunpawng amyu sha ni a shim lam hte seng n’na gaw, gap shatsim da ai lam na magang amyu sha shim lam n lu magang , amyu sha ni a matu hkrit hpa hpyen law wa magang rai nga ai. Ga shadawn; ningbaw ningla kaja tai wa na ramma law law wa kani hte laga nang hpam tsi ni hpe lu sha n’na si htum mat wa ai, AIDS ana hpe kap shabra ai, masu ai hte lagut law wa ai, matsan masha law wa ai, tinang a lamu ga na n hprang a rai ni hpe maigan hpaga masha ni shang madu galaw sha kau ma ya wa ai, a rang n lu ai ginra madu lamu ga madu ni rai jang htawt sit ya ra mat ai. Bawnu ram ai, zet let ai ramma law law wa maigan mung dan de le pru mat wa nga ai. N’dai zawn re lam ni gaw tinang a amyu sha ting a matu mana maka hkrat sum mat wa nga ai lam ni rai nga ai.

Dai zawn hkrat sum mat wa nga ai lam ni gaw Jinghpaw Wunpawng amyu sha shim lam hta a’ja a’wa ahtu hkra nga sai lam rai nga ai. Dai majaw amyu sha shim lam lamang hpe woi galaw sa wa lu na grak lagra re amyu sha mung masa pati, sh, hpung ra saga ai. Dai hte maren tinang amyu sha ni a lamu ga, n’hprang sut rai ni hpe kam mara shang madu galaw sha nga ai maigan hpaga hpyen, tinang amyu ting hpe lai amyu myu hku roi zingri nga ai gum shem hpyen ni hpe kasat manga na matu hte amyu sha ni hpe shim lam la ya na matu magrau grang ai let grak lagra re ai hpyen hpung ra nga saga ai.

Amyu sha mung masa pati hte amyu sha makawp maga hpyen hpung ni gaw amyu sha shim lam hta a htu hkra wa ai hpyen ma hkra hpe ninghkap ra ai lam hta ja ja ning hkap ra ga ai. gap ra na zawn re hta gap ra ai. Bawng ban jahkrup n’na mai byin na rai yang gwi gwi tsun shaga ra sai. Ten du na hpe sha a la nga ai n mai sai.


Lahta na ningmu gaw Hkrumra Padang a mu mada ai lam ni sha rai n’na, The Kachin Post a ningmu ni n rai ga ai. Hkrumra Padang gaw Maigan mungdan langai kaw shanu nga ai myitsu langai rai nga ai.