Hkrum na hta Rum na Grau Ahkyak March 20, 2006
Steven Awng
Shara shagu chyam bra nga ai Jinghpaw Wunpawng sha ni gara shara kaw mi du nga ai rai rai, hpa baw bungli galaw ai rai rai, gara u hpung hta mi shang lawm ai rai rai, anhte amyu sha rawtjat lam matu magam gun nga ai re ngu kam n’ngai. Mung masa u hpung law wa ai mung, anhte Wunpawng sha ni a matu ra ang ai hta hkan n’na byin mat wa ai mabyin ni sha rai sana re ngu yin la n’ngai.
Rawtmalan ten hta u hpung langai sha tai na matu, u hpung langai kaw sha yawng jawm myit hkrum n’na galaw sa na malai, amyu sha hkum dek shagu tinang a zai ladat ni hte galaw sa let yaw shada ai lam langai kaw rum na matu gaw grau a’hkyak nga mali ai.
Ya yang bra ayai taw nga ai Wunpawng sha ni hte mung masa hpung law law gaw, ta tut bungli galaw sa wa ai zai ladat (Tactic) hta sha shai hkat nga ai sha rai na re. Yaw shada ai ban dung de du lu na matu zai ninggawn (Strategy) gaw langai sha rai na re hpe kam ai. N’dai aten hta grai myit yu hpa a ten du wa sai. Htinbu mungdan rai nga ai Miwa hte India mungdan kaba lapran hta nga ai, n law la ai Wunpawng sha ni hpe, Myen hpyen Atsuya gaw zai ladat a myu myu hte shamyit taw nga sai re. Dai majaw u hpung kade bra ai a’yai nga ai raitim, Wunpawng sha ni a matu bung pre ai pandung (common goal) gaw langai kaw rum ra nga sai. Grai myit yu let mung masa hpe galaw sharai la ra nga sai. Anhte amyu sha ting a gam maka hpe makawp maga ya lu matu gaw gap sa wa ra ai mung masa lam yan ni rai nga ai Federal Democracy kun?/Confederation kun? / Independence kun? ngu ai kaw na langai hpe a’san sha lata san let yawng a pandung langai hku tawn da ra saga ai. Zai ladat mung shai, yaw shada ai lam pandung mung shai rai yang, anhte Wunpawng sha ni a gam maka gaw yup mang zawn sha rai mat na re. Dai majaw u hpawng langai sha hta myit hkrum na matu hta, myit mang langai kaw sha rau rum nga na gaw grau a hkyak nga sai.
N’dai ningmu gaw Steven Awng a rai n’na The Kachin Post a n rai ga ai. Steven Awng gaw Thai mung kaw shamu shamawt nga ai Kachin Development and Networking Group, KDNG, a lit hkam rai nga ai.
