Lung Shawn Manau Poi hpe Mu Mada ai Lam
February 08, 2006

Malihkrang Uma

Laiwa sai January 31 ya kawn, February 2 ya du hkra Miwa Gumsan mungdan, Yunnan Mungdaw, Lung Shawn (Long Chuan) mare kaw Jinghpaw Wunpawng sha ni manau poi kaba hpe wu wu di di galaw laiwa sai rai nga ai. N’dai Manau poi hpe prat dep madang tsaw ai hku galaw lu ai hpe n gun lu ai raitim, “Manau ngu ai anhte a htunghking gaw rai nga a ni? ngu hkam sha myit hte hpawn, “Manau ngu ai gaw masha yawng a pyaw hpa poi langai tai sai kun?” ngu ai mu jut hpe maram lu ai.

Lung Shawn Mare kaba gaw Miwa Gumsan Mungdan kata kaw Jinghpaw Wunpawng sha ni a laksan uphkang ginwang kata kaw nga ai Mare kaba re. Dai Mare kaba a grup yin hkan Jinghpaw Wunpawng amyu sha ni law law nga ma ai. N’dai poi kaw manau nau ai ni mung Jinghpaw Wunpawng sha ni sha rai ma ai. Dai manau poi kaw lit ang ai Jinghpaw Wunpawng Du Salang langai hpe san yu yang, n’dai poi hte seng n’na hkrat ang ai ja gumhpraw ni hpe Miwa Atsuya ni yawng shaw n’na galaw ya ai nga ma ai.

Raitim, Lung Shawn Manau poi hpe yu dat yang, shana shagu madun ai poi lamang (Concert) ni hta Jinghpaw Wunpawng htunghking hpe sha mu lu n’na, mahkawn ai nsen, mahkawn ai ga si, n’dau ai ga si ni gaw Jinghpaw Wunpawng amyu ga langai mi mung n lawm ai sha, Miwa ga hpe hkrai jai lang ma ai. Concert madun ai Yungwi Pinra hpe hkikhkam dik ai hku galaw da ma ai. Wanhtung (Slide) ni mung mau na zawn re hkra shalaw da n’na, grai madang tsaw ai hku ka manawt ma ai. Raitim, n’dai htunghking ni, nsen ni gaw moi prat kaw nga lai mat wa sai amyu langai a lam hpe madun dan ai hku she rai ma ai.

Jinghpaw Wunpawng htunghking manau poi kaw sa lawm ga ai raitim, anhte amyu ga ni akyu n rawng taw ai majaw anhte Myen Mung na sa lawm ai ni gaw Ma-a hpa she tai taw sai. Jinghpaw Wunpawng amyu shada mu hkrum hkat ga ai raitim aga n hkrum ga ai majaw shaga na mung yak, htunghking arawn alai hte myit jasat ni, lai kyang ni mung shai taw ai hpe mu ai shaloi anhte amyu ni wa amyu kaba ni jahka mayu ai hku jahka, hkrum mayu yang jahkring mi jahkrum ya, masa n htuk yang ayai aya di kau hkrum ai ni she rai taw sai kun?

Poi lamang ni hpe mung Miwa Atsuya ningbaw ni hkrai lit la galaw kau ai majaw Jinghpaw Wunpawng amyu sha ni gaw madun chyai hpa du sat hte she bung taw ai hpe mu ai.

Grau n’na gaw, dai mare na Jinghpaw Wunpawng sha ni gaw laika hpaji mung nau wa ahkyak n shatai ai hpe myit n pyaw let mu da n’ngai. Internet ngu ai hpe pyi Du salang langai mi hpe san yang n chye ai majaw, Miwa Ramma ni dai makau grup yin hkan law law lang nga ma ai le, ngu ai shaloi “Oh... ma ni ginsup chyai ai baw Shangwang wa i?” nga n’na bai htan wa ai. ‘Shangwang’ ngu ai gaw Miwa ga hku Internet hpe tsun ai rai nga ai. Internet hpe hpaji hku n chye mu ai majaw ma kaji ni ginsup chyai ai baw rai hku she mu ma ai. Maga mi de gaw, Tsa chyaru hte Salik hkayawm hpe mung htunghking zawn jai lang nga ma ai.

Miwa Atsuya a ntsa hta kaja ai hku sha mu n’na, n’dai zawn poi kaba galaw ya ai majaw shanhte a atsuya hpe grai arawng la ma ai. Masha ni shanhte a htunghking Committee de alu jaw ai gumhpraw ni hpe pyi atsuya rung kaw bang na hku matsun ma ai. Anhte kaga Mungdan na sa wa ai Manam ni hpe hkalum na hta shanhte a Miwa Du kaba ni hpe hkalum na grau shareng ma ai.

Lung Shawn manau poi gaw kaja wa nga yang Miwa Atsuya ya a masing hte galaw ai poi lamang langai hta anhte amyusha ni a htung hking hpe madun ai poi langai re ngu mai tsun ga ai. Miwa mung nga anhte amyu sha ni mung tinang a htung hking hpe masha amyu kaba ni jai lai ya nga ai hpe dum hprang chye ai madang n du shi ai hpe grai myit n pyaw ai hte hkam sha n’ngai.

Lahta na ningmu gaw Malihkrang Uma a mu mada hkam sha lam ni sha rai n’na, The Kachin Post a ningmu n rai ga ai.