Nga Yak La Ai Oi
November 15, 2005

Myitkyina Uyen

Anhte amyu sha ni gaw gara kaw du tim, nga yak na zawn re ai sha hkrum sha nga ra taw saga ai. Prat a tsin yam ngu ai baw kun? Gam maka ngu na hpan kun? N chye tsun mat sai. N’dai zawn nga yak la ai prat labau mabyin ni law law kata kaw na Myitkyina mare na Shatapru Buga kata byin lai wa sai mabyin langai lahkawng hpe sha tsun mayu n’ngai.

Myitkyina, Shatapru nga n’na tsun shagu masha ni gaw masha shazai ni law ai shara re nga n’na tsun chye ma ai. Kaja wa nan law mung gaw she n law sadawng gaw i? Raitimung masha ni tsun ai daram wa mi gaw shang n rai a dawng gaw i? Anhte kaji ten kaw na pyaw len ginra Shatapru mare gaw ngai hte n htuk hkat ai masha langai mung n nga sam ai, nye prat hta ga li ga law kalang mung n nga yu ai daram re. Hpa majaw masha ni hte rai yang Shatapru Ramma ni zai wa ma ai kun? Shinggyim sha ngu ai gaw jamna hte bung ai nga ai zawn, masha ni zai ai majaw Shatapru Ramma ni zai ra ai kun? Shatapru ramma ni zai ai majaw masha ni zai ra mat ai kun?

Lam langai mi gaw nga ai, anhte Shatapru mare kaw Mungdaw Dakkasu Jawng mung nga n’htawm, Jinghpaw Wunpawng amyu sha yawng a Htunghking Ginjaw Manau pa mung nga mali ai. Manghkang gaw Manau Wang kaw na n rai, Myitkyina Dakkasu kaw na rai nga ai.
Dakkasu Jawng Ma ni moi de College prat e gaw Jawng wang kata kaw Jawng Ma ni a matu nga shara lu n’na anhte Buga masha ni hte nau n ganawn ra ai. Raitim, ya hpang daw hta, Jawng Ma ni manghkang nau law dum n’na rai sam ai, Atsuya hku na Jawng Ma ni hpe nga shara Hostel n jaw mat ai majaw, Shatapru Buga kata de Jawng Ma hkrai hpring chyat mat wa ai. Jawng Ma ni nga shara shap ai majaw n’kau ni shang gumhpraw lu ai majaw mung akyu pru ai zawn, Jawng Ma ni nau zai ai majaw makau grup yin n lu hkam na zawn re ai arawn alai ni mung law law pru wa sai.

Grau sawng ai gaw, Atsuya hku na Jawng Ma ni hpe makawp maga da ya ai masing hte, hpa manghkang mi byin tim mare masha ni n hkyem sa mat sai. Shani shagu lawu ga (Monyin, Mogaung, Hopin, Manmaw, Kata) na lung wa ai Jawng Ma (Myen, Sam) kasha ni gaw amyu myu matsa mawa ga ni hkrai shapraw dan n’na anhte grup yin hta na hte madat n pyaw na zawn re ai ga si ni hkrai hpring chyat nga ga ai. Arawn alai hte mung n nga amyu myu sharu shatsang ai majaw mare na Ramma ni hte manghkang byin yang mung mare masha ni hpe sha ari jaw ai lam sha rai nga ai.

Ya hte nau n na ai shaloi byin ai manghkang langai hta mung, Hostel shap rawng ai Jawng Ma ni hte Shatapru Ramma ni kayet hkat ai manghkang gaw, Jawng Ma ni nan amyu myu matsa mawa rai n’na, Shatapru masha ni yawng pru wa maru, mare ting wan nat ya na, na N’nu na ..... , Melu ma Kachin, nga ai baw matsa mawa ga ni hte hpawn Ramma langai mi hpe nlung shapyen bun ai n’hkan e, mare Ramma ni nhkam lu n’na byin wa ai manghkang rai nga ai. Byin ai shaloi gaw Shatapru Ramma ni n kaja ai zawn rai mat ai. Myen hpyen dap Dingdung Ginjaw Du kaba (Tai Mu) nan Shatapru de lung wa n’na mare ting hpe matsa la nu ai re. Rai n’na, byin lai mat wa ai manghkang kaw lawm ai Ramma ni hpe mung yawng rim n’na balik ni kayet kau ai gaw Jawng Ma ni hta grau machyi hkrum mat ai. BBC kaw na mung Jawng Ma 2 si ai nga n’na shiga jashut jaw n’na shapoi shangun re ai baw hkrum sha lai wa saga ai.

Ya hte sha, Sumpra Bum (Lawt Mai Yang) kaw na Lagawng Tawng Tu (asak 60) ning gaw shanhte Buga kaw na Jawng Gap alu lahkawn na matu Shatapru de du sa wa n’na hpang shani Nammati na Jawng Ma Myo Wunna ngau ai wa Cycle hte adawt sat hkau nu ai. Dai shaloi gaw si hkrum ai ni hpang maga kadai n lawm ai sha, Dakkasu Jawng Sara, Mung Daw Up Hkang Du magam ni kaw na hkawt Adawt sat ai Jawng Ma maga tsap n’na manghkang lawan wan shaprai kau lu na lam sa tsun (pressure jaw) wa ma ai.

Dai majaw dai Jawng Ma gaw masha langai mi ting adawt sat ai rai tim, n’htoi mali ya sha hkyuk kaw rawng n’na bai pru wa ai. Lagawng Tawng Tu a nta masha ni pyi garai n chye shi yang shi na amu gaw ngut mat sai rai nga ai. Dai shaloi moi na mabyin langai bai dum wa ai, 1994 ning e Dakkasu jawng lam n maw e, Jinghpaw Ramma marai 4 jawn ai Mawdaw hte Monyin na Jawng num langai hpe adawt sat hkrup ai shaloi, Jinghpaw ramma ni a Van mawdaw mung yawng agrawp kau ya n’na, dai mawdaw kaw jawn lawm ai ni yawng mung Htawng 15 ning hpra hkrat ra mat ai hpe myit dum dat yang ya na hte grai shai a hka! ngu myit kau n’ngai. Maning sha mung Shatapru na Sana Dinggai hpe Jawng Num langai Cycle hte adawt sat kau ai kaw mung Sen 2 hte sha shangut kau ya ai baw mabyin ni gaw dai ni anhte hkrum sha nga ai mayak ni rai nga mali ai law.

Lahta ga ngau gaw Myitkyina Uyen a mu mada hkam sha ai lam ni rai nga ai. Myitkyina Uyen gaw Shatapru Buga na ramma langai rai nga ai.