Anhte Hkrat Sum Nga ai Ahkaw Ahkang
June 21, 2005

Makrung/ Laiza

Teng man ai ahkaw ahkang ngu ai gaw, masha hkum ding dek shagu hta lu chyalu, grin nga chyalu rai nga ai. dai majaw masha ni a n’pu hta dip sha hkrum n’na, tinang a lam hpe tinang n daw dan lu ai masha shagu gaw, teng man ai ahkaw ahkang ngu ai hpe ra sharawng, lu mayu myit katu nga ma ai. Bai n’na masha langai hte langai gahkyin gumdin let, nga pra law htam wa ai shinggyim uhpawng ni, amyu baw sang ni hte mungdan masha ni shagu hta, teng man ai ahkaw ahkang gaw lu ra, nga ra chyalu rai nga ai.

Dai ni Myen mung dan kata hta shanu nga ai anhte Jinghpaw Wunpawng amyu sha ni wa, n’dai teng man jaw ang ai ahkaw ahkang hpe ra gadawn nga ai amyu sha ni rai n’na, rawt malan nga ai amyu ni rai nga saga ai. Dai zawn rai masha asak si hkam, ru-yak jam-jau hkam n’na, lu la mayu ai ahkaw ahkang ni gaw, hpa rai nga a ta?

Anhte Jinghpaw Wunpawng amyu ni gaw, hkrat sum nga ai shinggyim ahkaw ahkang, masha langai, shinggyim uhpawng langai, amyu langai hta lu nan lu ra, nga nan nga ra, teng man jaw ang ai masa ahkaw ahkang a majaw, anhte amyu sha ni gaw rawt malan ai amyu ni rai nga sai. Rai sa, n’dai lahta de na anhte ra sharawng ai ahkaw ahkang wa mi moi shawng de anhte hta n lu yu, n nga ai hpe wa, ya dai ni she masha wa kaw na, anhte hpyi let rawt malan ai amyu ni rai nga ga ni? N rai nga ai. Moi shawng de anhte shinggyim ahkaw ahkang ngu ai ga hkum hpe anhte n chye tsun lang tim, dai ahkaw ahkang gaw anhte hta nga nga chyalu rai nga ai.

Dai ni anhte amyu sha ni gaw, laknak n’gun atsam hpe machyu n’na amyu kaba lai len hte anhte amyu sha ni a n tsa, roi rip dip kamyet sai chyup nga ai Myen hpyen atsuya hpe, shanhte a laknak machyu gumshem ai lai len ni, amyu kaba lai len hte dip kamyet sha ai myit jasat masa, n’dai zawn re ai n hkru n hkra ai lam ni hpe anhte amyu sha ni the, anhte a mung daw kata kawn shanhte tsep kawp dawm la kau na matu rawt malan ai rai nga ga ai.

Lahta de tsun lai mat wa sai lam ni gaw, tinang langai hkrai ngu ai tinggyeng myit jasat “Ngai” ngu ai hku n re sha, tinang lu ai ning pawt ning hpang shinggyim ahkaw ahkang ngu ai gaw, manang wa hting bu wa hta mung lu ra nga ra ai ngu ai baw shinggyim ahkaw ahkang hpe hkung ga la ra let, shada rap ra ai, manu shadan hkung ga hkat ai lam rai ra ai.

Raitim, dai ni anhte a mungdan kata hta teng man ai ahkaw ahkang ni hte ninghtan shai n’na, lu mayu ra marin ai jasat jasa ni mung law wa sai. Ya ten hta ahkaw ahkang kaba lu ai ni hte ni kahtep hku hkau mayu ai masha ni mung law law rai nga ai. Dai zawn hku hkau ai a marang e ting gyeng hpaga galaw sha lu na ahkaw ahkang ni hpe lu la mayu ai myit rawng ai ni law wa sai. Amyu a matu mungdan a matu nga mying gun n’na, ta tut magam gun nga ai ni hte magam gun jan ni mung shang gumhpraw mai lu ai magam dap shara ni hta, ang na ahkaw ahkang hpe ra marit nga ai ni mung nga nga masai. N’dai zawn rai tinggyeng nga mu nga mai lam lu sut lu su lam hta n’chyun shanang ai myit masa ni a majaw, arawng aya ahkaw ahkang lu ai ni hte ja gumhpraw lu ai masha ni gaw, tinggyeng nga mu nga mai lam a matu, mayun kum hpa hte ahkaw ahkang hpe galai lu galai sha nga masai.

Arawng aya n lu, Ja Gumhpraw n lu ai mung masha ni law law chyawm gaw, lani hte lani matsan jam jau ai maga de lahkam sa wa nga sai. Dai majaw, dai ni anhte mung shawa ni a n’gup hta “arawng aya n lu yang ja gumhpraw lu ra ai” ngu ai ga hpe tsun kajai nga sai.

N’dai zawn nga tsun ai myit masa ni a majaw, anhte a mungdan kata hta tara n shang ai hpaga lam ni hpe law law galaw lu galaw sha ai masha ni law wa nga sai. Nanghpam malu masha hpe dut lu dut sha ai masha law wa ai mung, dai zawn myit masa hta n kung n kyang hkrat sum ai majaw rai na sai. Dai ni anhte amyu sha ni hta nanghpam malu masha hpe lu sha ai masha law wa ai mung, myit jasat hta hten run hkrum ai majaw rai na sai.Ninghkap pat shing dang ai lam ni galaw tim, mung masha ni hta hpa ahkaw ahkang n lu ai mungdan rai n’na, mung shawa hte ta gin dun ai lam n nga ai a majaw awng dang ai lam n nga ai.

Dai majaw anhte amyu sha ni ra sharawng myit katu nga ai lam ni gaw hpa rai ta? Anhte masha hkum shagu dinglik yu ra sai. Hpyen atsuya a n pu hta shaning law law up hkang sha hkrum ai anhte ni, nanghpam lu sha hta shaning law law lu sha let, myit masin n yup nga ga. Tinggyeng nga mu nga mai lam ni a majaw manang wa hpe machyi hkrum shangun ai baw jasat jasa ni hpe anhte koi gam ga. Jinghpaw Wunpawng ramma ni hte myit su salang ni yawng, myit marai n’chyan galoi mung garang nga ra sai. Anhte gaw hpyen atsuya hpe rawt malan ninghkap ai shaloi, anhte ra ai teng man rap ra ai lam hte lu ra nga ra ai shinggyim ahkaw ahkang hpe madung da n’na, mung shawa a ra sharawng ai hte byin pru wa ai atsuya paw pru wa na lam hta anhte chye tsun chye shaga na matu, shakut hka ja mayu ai myit masin hte hpaji hparat lam hta shakut hka ja na myit ni anhte gaw gap nga ga.

Anhte ra sharawng ai lam, anhte kam sham ai mung masa makam masham hpe teng man sai ngu hkap la yang, galoi raitim, gara shara kaw raitim, kadai kaning re ai wa hte shaga tim, ngang kang magrau grang nga ga. Buga gaw sharawt ai magam bungli ni hta sha n ga, buga magam myit masin ni hpe mung n’gun dat gaw gap ra saga ai.

Lahta na ningmu ni gaw Makrung/ Laiza a ningmu ni sha rai n’na, The Kachin Post a ningmu n rai ga ai.