Buga de Bai Wa Gawgap Ga
June 15, 2005

Laiza Brang

Mungkan hta Israel amyu sha ni Roma ni nau zingri ai nga n’na mungkan ting hprawng bra ayai hkawm mat wa ai. Roman Empire n nga mat ai hpang mung shanhte a mungdan de n kam wa mat ai sha n ga, masha ni a chyasam mungdan hkan pyaw len mat ma ai.

Israel amyu sha ni gaw, Europe dan na mungdan hkan pyaw len mat ai. Hpa majaw nga yang dai mungdan ni hta shanhte ladu lai hkra lu su mat ma ai majaw shanhte a htingbut htingra ni hpe n kam tat kau ma ai. Karai Kasang shanhte a Kaji Kawa ni hpe Ga Shaka hte hpawn jaw da ai lamu ga ‘Promised Land’ hpe malap kau, n gawn n sawn di ai majaw, dai shanhte a Karai Kasang jaw da ai buga hta gaw maigan Palestine amyu sha ni hkrai hpring rai nga ai.

Lamu ga mungdang htingbut htingra ngu ai gaw Karai Kasnag shinggyimmasha hpe jaw ai kumhpaw kumhpa re. Lamu ga n lu ai wa gaw mayam sha rai nga ai. Dai majaw dai lamu ga hpe tsaw ra makawp maga, hkungga la ra di ra na rai nga ai. Dai lamu ga kaw na she Karai Kasang gaw Sali Wunli hpe ginlen ya ai re. Ya Israel amyu ni shanhte a Kaji Kawa ni hpe Karai Kasnag jaw da ai Ga Shaka lamu ga hpe Kabai da n’na chyasam mungdan hkan pyaw nga ai hpe Karai Kasang kachyi pyi n ra ai. Dai majaw maigan hkan nga hkawm nga ai Israel amyu sha wan 6 jan hpe Hitlar ngu ai Gremany mung na gumshem du wa hku n’na sat kau ai hpang she Israel amyu sha ni gaw tinang a mungdan de bai gaw gap na shakut wa ai hpe mu lu ai. Maga mi hku yu yang, Hitlar gaw Karai Kasnag a shangun ma she rai nga ai. Karai Kasang shi a sagu ni hpe shingna lasik hte nan sa gau la shangun ai rai nga ai.

Dai ni anhte amyu sha ni shanu nga ai buga ginra gaw anhte a Kaji Kawa ni hpe Karai Kasang jaw da sai Ga Shaka lamu ga hpe anhte Wunpawng sha ni n gawn n sawn di n’na rep dut sha, hpun kawa ni majoi kran, tinang a lamu ga htingbut htingra ni hpe shakram kau da let masha ni a chyasam ga hkan e sa nga sa pra mat, tinang a lamu ga hpe n dum malap kau rai, America mung Thai mung, Yangon mare kaba hkan sa nga mat rai, anhte a buga hta gaw kaga Myen, Sam, Miwa hte maigan amyu ni hkrai hpring rai nga sa ga ai. Dai majaw anhte sung sung myit yu ra sana re. Israel amyu ni hpe zawn Karai Kasnag pawt sindawng n’na Hitlar zawn gunshem lai lang ai Sagu gau wa anhte anhte amyu sha ni hta du wa na gaw teng sha rai nga ai ngu sawn lu ai. Dai hta grau gumshem ai wa rai yang rai wa mai nga ai.

Dai majaw Sagu gau wa grai n du shi yang anhte amyu sha ni lawam dum hprang ra sai. Mungkan ting hta chyam bra nga ai Jinghpaw Wunpawng amyu sha ni yawng dum ai hte lawan dik ai hku wa marit. Tinang a buga hpe she jawm gaw sharawt saga.

Aanhte gaw madu ni she re, anhte nan madu myit n rawng yang kadai wa anhte a mungdan hpe n gaw ya na re. Yawng bai wa marit ngu mayu ai, yawng wa n’na Maigan de chyam bra hkawm nga ai amyu sha ni yawng tinang a buga de bai wa n’na kahkyin gumdin let anhte a buga ginra ni hpe wa jawm gaw gap yang gaw, Myen wa hpe pyi shanglawt n hpyi ra sana re. Shanhte na shanhte hkrit ai hte yen mat wa na re.

Mungkan majan II ngut ai hpang Israel ni mungkan ting na Hpaji Ninghkring ni, Sut Du ni yawng bai wa n’na shanhte a mungdan hpe bai wa gaw gap ai hpang she mungkan ting Israel ngu ai hpe bai hkrit mat ai hte hkungga mat ma ai. Dai majaw dai ni anhte Chyurum sha ni mung Israel ni a lai ladat hpe kasi yu la n’na Karai Kasnag grai n pawt shi yang lawan dik ai hku tinang a buga ginra de bai wa gaw gap n’na mungdan lu ai amyu sha langai byin wa hkra shakut saga.

Laiza Brang gaw Myitkyina mare Nawng Nang Chyum College jawng ma langai rai nga ai. Ga ngau hta na ningmu ni gaw Laiza Brang a ningmu ni sha rai n’na The Kachin Post a ningmu ni n rai ga ai.