Ngang Ngang Tsap Ga July 06, 2005
Laiza Brang
Dai ni mungkan ga gaw lani hte lani grau hta grau kung wa nga ai hte lani hte lani prat madang ni mung galai shai wa nga ai. Dai hta mungkan masha ni mung lani hte lani law htam wa nga ai. N’dai zawn law htam galai shai wa nga ai mungkan hta anhte Wunpawng sha ni mung lawm nga ai. Rai sa, anhte Wunpawng sha ni gade daram wa law htam wa sata? Rawt jat ai lam gade daram nga sani?
Masha langai rawt jat galu kaba wa lu na matu gaw lam shagu hta n hkrit n tsang re ai myit n’den rawng ra ai, dai n rawng ai rai yang dai wa gara hku mung n mai galu kaba wa nga ai. Yak hkak manghkang hpe hkrit ai masha gaw galoi mung masha kaja n byin lu nga ai, yak hkak manghkang hpe gwi gwi htim adawt ra nga ai, dai rai jang she awng dang ai sak hkrung lam hpe lu la na re.
Dai ni anhte a Wungpawng mung dan hta n’dai zawn myi di chyip re ai mayak manghkang ni law nga ai, lam shagu hta anhte ahkaw ahkang hkrat sum nga ai, maga mi de anhte a atsu ya hpe hkrit ra nga ai, hpa galaw na mung shan hte hpe shawng shana ra nga ai, shanhte myit hkrum jang sha anhte a yaw shada lam ni mai galaw nga ai. Dai majaw hpa ji rawng ai, n’den ja ai, ningtawn ai masha ni law law ni gaw myit htum n’na azim sha nga nga ma ai. Bai masha kaba n’kau mi gaw shagri brep mat nga ai, hkrit ai myit hkrai hpring chyat rai nga ai. N’dai zawn hkrit ai myit gaw anhte a Ji wa ni kaw na yu hkrat wa ai hkringhtawng n rai nga ai. Hpa lam hta mung n awng dang hkraw ai gaw hkrit myit a majaw rai nga ai.
Karai Kasang gaw hkrit ai ni kaw n lawm nga ai, hkrit ai masha ni hpe shi matsat nga ai. (Buhkawm 14:30-38) hta Hkanan mung de kinyu dat ai marai 12 kaw na marai 10 tup gaw hkrit ai majaw Mawshe hpe wa deng mara shagun ma ai, dai hpe Karai Kasang chye ai majaw dai hkrit ai amyu matu ni ma hkra hpe nam malin kata e sat shamyit kau wu ai. N hkrit ai Yawshu hte Hkaleb yen a myu matu ni chyu sha Hkanan mung de lu shang ma ai. Dai majaw tsaw ra ai Wunpawng sha ni e anhte atsawm sha myit yu ra sai, anhte a myit mada nga ai “Wunpawng Hkanan” de shang lu na gaw n’dai hkrit myit hpe shawng la kabai kau ra nga ai. Dai rai jang she anhte ni yawng dai mungdan de shang lu na re.
Anhte gaw Karai Kasang a amyu ni re, sasana sara ni a majaw sha anhte Karai Kasang hpe che lu ai n re, Jiwoi Jiwa ni a prat kaw na anhte hta Karai (God) ngu ai myit masa nga chyalu re. Karai ngu ai ga hkaw hpe anhte a maumwi ni, dumsa ga ni hta lawm nga ai. Dai majaw anhte gaw Karai Kasang a amyu matu re lam Asia dan ting hta laklai ai amyu re lam dan dawng nga ai. Anhte gaw magyi-ka (Myen) amyu n re, Karai Kasang amyu nan re ai gaw labau hta dan dawng nga ai.
Karai Kasang a amyu ngu ai gaw n’den ja ai, hkrit myit n rawng ai, sumnung shingdi ai, myit kup tsup ai. Dai amyu hpe kadai mung n lu shamyit nga ai. Dai amyu hpe je hpre tam ai masha shagu htum mat na lam Chyum mungga hta mu lu nga ai. (Taraja 32:43 ) hta dai amyu hpe gumlau ai ni hpe Karai Kasang daw dan na lam dai amyu a sai matai hpe Shi htang na lam ka da nga ai. Dai majaw anhte gaw Karai Kasang a amyu rai nga ai majaw kadai mung Anhte hpe n lu jahten na re. Anhte hpe gasat ai wa gaw teng sha htum mat na re. Myen wa mung amyu htum mayu yang gaw anhpe hpe gasat u ga anhte gaw gwi gwi Karai Kasang hta manoi nga ra na re. Anhte hpe gasat ai wa gaw teng sha htum mat wa na re. (Rawma 15:10-12) hta “Mai gan amyu ni e, shi a amyu ni hte rau kabu nga mu” ngu tsun da nga ai.
Dai majaw ngai tsun mayu ai gaw, maigan amyu ni, ga shadawn Myen, ni shan hte n htum mayu yang, galu kaba mayu yang gaw anhte hte rau kanawn pyaw nga ra na re, anhte hpe matut n’na je hpre tam jang gaw shanhte teng sha htum mat wan na re. Dai majaw tsaw ra ai Chyurum Wunpawng amyu sha ni e, anhte gaw Karai Kasang a amyu ni re majaw anhte a amyu nli ni hpe majoi n mai jahten kau na re, maigan ni a lata de majoi n mai jaw kau na re. Tinang amyu grin nga lu na matu lam shagu hta gwi gwi tsap ra na re. Hkrit myit ni hpe tsep kawp pyi n ngam hkra htu lup kau ra na re.
N’dai gaw Laiza Brang ningmu ni sha rai n’na, The Kachin Post a ningmu n rai ga ai.
