Yup Mang N tsawm ai NC
February 15, 2005

The Kachin Post

Nau n’na ai ten hta Myen hpyen du ni woi galaw ai National Convention, NC, hpang na rai sai. February 17 shani hpang na da. Myen hpyen du ni a matu NC gaw ahkyak htum ai mung masa ninggam langai rai nga ai. Dai majaw mung lawan landan hte 2006 ning hta hpung ding dat lu hkra shakut galaw nga ma ai. Myen mung shara shagu na NC dat kasa ni mung Yangon mare de du nga masai.

Raitim, February 9 ya hta Yangon mare hte Sam mung Taunggyi mare na Sam ningbaw ni rai nga ai Shan Nationalities League for Democracy, SNLD, Tingnyang Up Hkun Htun Oo hte Ninggawn Amu Madu Sai Nyunt Lwin, Shan State Peace Council ningbaw Gen Hso Ten ni hpe Myen hpyen du ni hpe rim ai ladat gaw, NC hten mat wa na hpe Myen hpyen du ni kade daram hkrit tsang nga ai hpe madun nga ai. Dai hta grau ai gaw, shanhte a manghkang shagu hpe n’gun hte hparan ai ladat hpe kalang bai shadawng dat ai rai nga ai. Hpa mi raitim, Sam ningbaw ni hpe majoi mi rim ai lam gaw, Myen mung nga amyu sha shada myit hkrum kahkyin wa lu na matu grai tsan gang shangun mat sai. Myen hpyen du ni ra sharawng ai gaw, hpyen tara n’pu na amyu sha ni a kahkin gumdin lam sha rai nga ai.

N’dai ladat gaw, 1962 ning Myen hpyen du Ne Win gaw Sam ningbaw Sao Shwe Theik hte kaga ningbaw ni hpe Sam mung hpe Myen mung kaw na garan pru na matu shakut nga ai ni re ngu n’na rim rawng ai ladat hte maren sha rai nga sai. Dai shaloi Sam ningbaw ni gaw Myen mung hpe jet ai “Federal” Munghpawm mungdan langai byin tai wa lu hkra zuphpawng galaw nga ai aten re. Dai hpe Ne Win atsuya gaw “Federal” ngu ai gaw mung dan kaw na garan pru ai lachyum re ngu mung dan ting hpe n’dau let amyu sha ni a shamu shamawt ai lam hpe shamyit wa sai. Ne Win galaw dat ai bungli a majaw dai ni du hkra Myen mung nga anhte amyu sha ni a ahkaw ahkang lu na matu du daw sai hkaw let rawtmalan ra saga ai.

Ya dai ni, Myen hpyen du ni kalang mi bai ladat n tsawm ai hku galaw dat sai majaw Myen mung gaw jet ai “Federal” mungdan byin tai wa lu na matu gaw myit mada ai lam n nga ai daram rai mat sai. Myen hpyen du ni galoi mung tsun nga ai, shanhte mung Myen mung hpe “Federal” mungdan byin wa lu hkra shakut nga ai da. Democracy ladat hte uphkang ai “Federal” mungdan byin wa lu hkra National Convention hpe galaw nga ai da. National Convention hpe galaw n’na Mungdan a gaw da tara hpe shawng ka na da. Mai byin ai langai gaw nga ai, Hpyen tara hte uphkang ai “Federal” mung dan gaw gap na matu. Dai hku byin wa lu hkra mung ladat amyu myu lang let shakut nga ma ai.

1993 ning kawn hpang wa ai National Convention ya du hkra ngut shi ga ai. 1996 ning hta jahkring kau n’na 2004 ning May hta bai hpang sai. Dai mung 2004 July shata hta bai jahkring kau. Ya 2005 ning February 17 hta galaw teng sai da. Madung gaw Myen hpyen du ni ra ai hku byin wa lu hkra hte Myen mung a mung masa pinra hta hpyen dap shara lu uphkang wa lu hkra galaw nga ai sha re.

Dai hku lu galaw na matu, National Convention galaw n’na bungli hpang ai ga re. NC byin wa lu hkra mung Myen hpyen dap hte gap hkat jahkring da ai amyu sha rawtmalan hpung ni hpe 2004 May na NC de sa du lung shangun sai. Gap hkat jahkring hpung ni law malawng mung shanhte byin mayu ai lam ni hpe tang madun sai. Raitim mahtai gaw kata!

Ya February 17 hta hpan na NC gaw lak lai wa sai. Shan State Army-North hku n’na shanhte a ningbaw ni hpe n dat ya ai rai yang NC de sa lung na n re ai lam hte dai a majaw n byin ging ai lam ni byin wa chye ai ngu shadut wa ai. Grai lachyum pru ai ladat langai re. Hpa majaw nga yang n’dai NC lung n’na Myen mung nga amyu sha ni matu hpa akyu amyat lu na lam n mu ai majaw rai nga ai. Dai hta grau sawng ai gaw, NC de sa du lung ai marang e Myen hpyen du ni ra sharawng byin mayu ai lam ni yawng hpe madi shadaw dat ya ai lam sha rai wa na rai nga ai.

NC lung na hkyen nga ai gap hkat jahkring hpung langai rai nga ai New Mon State Party hku n’na Sam ningbaw ni hpe rim da ai lam hte seng n’an tsang ya ai lam tsun shaga sai. Raitim, NC hpe matut lung na lam hte awng dang wa lu hkra shang lawm na lam ga sadi jaw da sai Wunpawng Mungdan Shanglawt Hpung, KIO, gaw n’dai manghkang majaw NC n byin mat wa na hpe tsang ai lam tsun wa masai.

KIO Tingnyang Up malai II Dr. Tu Ja tsun wa ai, “Myen Mung na Mung Masa gaw hkring taw nga ai grai na sai. Ya she loi shamu wa ai hpe matut kanawng lawm na grai ahkyak nga ai.” Myen hpyen du ni ra sharawng ai—amyu sha ni a ahkawng ahkang hpa n lawm ai—mung masa lam yan awng dang wa lu hkra kanawng shalai kau n’na mung masa hkaraw de hkrat bang mat ai rai yang gaw Myen mung nga amyu sha yawng a gam maka hpe kadai lit la na rai? Dai shaloi gaw aten grai lai mat sai.