Ramma ni hpe Hpaji Shakat Fund Tam ya Saga

Dakkasu Tsa Doi

September 28, 2004 — “Masha tam yang, tam shamat kau kau rai nga ai law” hpaji chye kam ging ai ningbaw kaja hkan tam yang, tam shamat kau kau re ai majaw rai nga ai. She rai law, matut n’na naw tam shamat nga na sha re. Mayak manghkang ni mung apru nga, grau grau sin mak wa na re.

Hpa majaw nga yang, moi moi naw kaji ai ramma ni hpe “Liaka Hpaji” hpe matsing jahkrat n’na n sharin ya wa ai majaw rai nga ai. Hpaji chye ai ningbaw kaja gaw shi hkrai sha lamu de na di hkrat wa ai baw n rai. “Ya ju ya hkyeng” n mai byin ai lam Miwa hpaji ninghkring wa Kuwang Zu tsun dan nga ai. “If you plan for one year, plant rice. If you plan for ten years, plant trees. If you plan for hundred years, educate mankind.”

Laika hpaji ngu ai gaw, Masha hpe masha ningnan shatai ya ai, Uhpng uhpawng ni mung galai shai wa ai, Amyu ting mungdan ting hpe galai shai wa shangun ai.

Masha amyu langai ngang gring galu kaba hkra makawp maga na gaw ja gumhpraw, hpyen laknak daru magam ahkaw ahkang ni n rai nga ai. “Laika hpaji” she ahkyak madung rai nga ai. Hpaji n chye yang hpaji chye ai amyu ni a npu e yat yat lup mat, hkoi mat, mat mat wa na sha rai nga ai.

“Daini na ramma, hpawtni na ningbaw ningla” nga ma ai. Daini na anhte a matu mara ni hpe yu dat yang, “Si tim pyi myi n di” gwi na zawn she rai nga ai. Lahpa galai ya na ningbaw shatai na zawn re ai mi n mu mada nga ai. Mare kaba kata hkan mung n mu tam, buga ginra hkan na ramma ni hpe yu dat yang tsa-ya, kani ya hkrai hkrai.Ningbaw kaja di na gaw maigan de mi she nga kun ngu yu dat yang, yawng ngu na daram wa ku-li ku-gang galaw sha sa ai hkrai, laika hpaji sharin la na sa ai ramma gaw n nga.

Daini na n’dai ramma ni a lata hta anhte a amyu hte mungdan ap kau da na hku i? Ya pyi tinang a “aga” pyi n chye shaga ai she law masai. Tinang a laika hpe gaw n chye hti n chye ka ai hkrai she rai mat masai. Ganing n chye di sai. Tinang mungdan hpe dut sha kau n’na, tinang amyu hpe shamat sha kau na mung shanhte a lata kaw sha rai sai.

Daini anhte a kashu kasha ni hpa majaw, n’dai hku byin ai hpe yu yang, “Laika hpaji” hpe tang du hkra n lu sharin la lu, jawng lung daw daw mat ai law mat ai majaw re ngu mu ai.

Matsan n’na, gumhpraw n lu n’na, jawng matut htawk na masha n nga ai majaw, tsang shi kalang lahkawng lang htai yu n’na n awng jang jawng pru ra mat rai, kam tim n kam tim lam n’maw ntsa de wam wam dam dam du mat ra nga malu ai. N’kau mi gaw, laika grai naw matut hpungjat mayu ai raitim, jawng lakang kawn yu mat ra. Gumhpraw n lu, jawng htawk na masha (Funder) n nga ai majaw, hpaji sharin daw daw mat jawng pru ra mat ra ai kaw myit mada shara n nga, wam wam dam dam hte lam n’maw de shalaw ra mat, tsa-ya, kani-ya byin mat ra ai rai nga ma ai.

Lama wa n’dai ramma ni hpe USA de, England de Fund hte htawk n’na, hpaji sa sharin la shangun ai rai yang, kung zet ai ramma ningbaw ningla kaja byin tai na ni rai nga ma ai. Ya gaw gumhpraw n lu jawng htawk ai masha n nga ai majaw tsa-ya, kani-ya he shalaw ra mat ai kaw du mat ai rai nga ma ai.

Daini anhte Wunpawng sha ni a hpyen hpe chye lu saga ai. Ja gumhpraw n lu n’na, laika hpaji hpe htum hkra n lu sharin la shangun ai majaw paw pru wa ai mayak manghkang ni n sin sin wa ai re hpe chye saga ai. Dai majaw, n’dai hpyen hpe jiwoi jiwa ni madun da ai kasi hpe la n’na, shawa n’gun pawng hpawm let, dang lu ai made jawm lahkawn mahkawng shinggyin n’na, Wunpawng Hpaji Shakat Fund woi hpaw let, shawa n’gun hte dang kau hkra jawm shakut ra saga ai.

Daini na lahta tsang hpaji manu grai hpu mat sai. Pawng hpawm ai shawa n’gun hte n rai yang Wunpawng sha ni grau grau laika hpaji n chye ai masha jahpan law wa na masai.

Laika hpaji n chye yang n mai ai nga ai hpe Major Jinghpaw Gam (1930) gaw shawng dumhprang n’na, laika hpaji alu hpe shawng woi hpaw sai. Pawng Yawng Hpung ngu n’na, hpyen du, hpyen la ni a shata shabrai kaw na mu mi, hti mi rai mahkawng la nhtawm gumhpraw n lu n’na laika hpaji n sharin la lu ai ni hpe jawng htawk ai magum shawng woi galaw sai. N’dai bungli gaw, majan ngut ai hpang du hkra Katha mare na 1st Kachin Jinghpaw hpyen dap ni naw matut galaw sai. Hpyen du hpyen la ni a shata shabrai kaw na “hti lahkawng” ( 50-pyas) hpra lahkawn la ai hte laika hpaji alu jaw sai. Dai majaw, ja gumhpraw n lu ai Jinghpaw ma ni, jawng lung lu sai, laika hpajichye la lu sai. Dai majaw dai aten hta Dakasu janmau lu gup ai Jinghpaw ramma ram ram law mat wa sai re.

Daini anhte mung Jiwa ni madun da ai kasi la ra saga ai. Shawa daw tsa kaw na, mu mu hti hti lahkawn shinggyin la n’na hpaji sharin na alu hpawng chyawm ra na saga ai. Shaloi she, hpaji n chye n’na, mat mat ai hkoi mat ai amyu n byin ai sha, danhkung ai amyu byin wa hkra ramma ni hpe laika sharin ya saga law.

Lahta na ga ngau gaw Dakkasu Tsa Doi a ningmu ni sha rai n’na, The Kachin Post a ningmu n rai ga ai.