Hka Kahtam yang Shinglang Hkra

Htau Maja

September 14, 2004 — Ngai, Internet hku n’na, The Kachin Post a shiga ni hpe lu hti, mu hti ai shaloi, shawng de grai kabu gumrawng, arawng la chye nga n’ngai. Hpa majaw nga yang Tinang Jinghpaw Wunpawng Amyu laika hte prat dep ai Internet madang hte hkam la lu ai majaw re. N’gun lu, hpaji mung lu n’ngai.

Raitim 2004 ning january praw hta Wunpawng Mungdan Shanglawt Hpung, KIO, Ginjaw hta manghkang byin ai kaw n’na shada jahpoi jahpyak hpyi sep hkat ai lam hkrai shiga ni mu hti ai. N law la ai anhte myusha ni hpa majaw n’dai zawn byin wa ai kun? Hpaji n hkum, hparat hkalung n’na byin ai kun?

Madu Yesu a shaning (AD) prat ngu ai rai n du ten kaw na laili laika lu nga sai, Mungkan hta law htam dik ai anhte a htingbu Miwa Gumsan Mungdan ni pyi myit hkrum kahkyin gumdin nga ma ai. Mungkan hta hkrit tsang na daram galu kaba law htam dingngam rai nga masai n rai ni? Grau n’na n law la ai, Tinang Wunpawng Amyu sha ni wa, grau kahkyin gumdin let n’gun dat na malai, shada n hkrum, ningmu n rum, ga garan lam hkrai tam nga saga ai. Masha wa yu roi, yu kaji kau na mahtang shakut nga saga ai.

Dai hta shada da mara shagun, shada da mara tam, shada da Du-Baw bai gyam hkat ai shiga ni wa le. Wunpawng myusha tai hkrum ai ngai langai, myiman pyi kanang n chye tawn ai. Shiga n kau mi teng man ai zawn ta tut hta n bung pre ai shiga ni, majoi mi shada jahpyak gyin shalat shapoi ai shiga ni mung lawm ai hpe mu lu ai. Hpa baw hpe yaw shada n’na n’dai hku gyin shalat shapoi ai rai kun? Shingdu de kadai bungli galaw nga ai kun? ngu na zawn she re ai. Myit mung myit yu mai ai. Masha wa anhte hpe ta hpawk dum na tai sai.

Shaning (40) ning jan Du daw Sai hkaw hkrum, pu ba jam jau hkam let amyu sha ni a salu salat hte gaw gap tawn ai Wunpawng Mungdan Shanglawt Hpung hte Hpyen Dap, KIO/KIA, hpe nang jahpoi jang anhte myusha ni a matu ap nawng lai wa sai share shagan ni hpe nyet kau ai nang rai na n hten? Na a dinghku yak ai hpe sha nang myit dum n dai kun? Na a tinggyeng sut lu lam hpe nang myit lu n dai kun? Na hkum hpe nang mahtai tam yu u?

Uhpung hpe hkum sa hkra, jahpoi jahpyak n’na amyu a bungli galaw ai ngu nang hkam la n’dai kun? Aten du jang labau gaw nang hpe mahtai jaw na re. N’bung gawut nga na malai amyu a matu magam bungli hta ta tut grau ahkyak nga sai. Dai ni na ten hta amyu sha ni a magam bungli n’dai shawng lam masan sa na gaw nang ngai ta tut shakut shaja ga. N’bung ningtsa, shada jahpoi jahpyak n’na, n awng dang ai. Hka Kahtam yang Shinglang Hkra ai da.

Lahta na tang madun ai lam ni gaw Htau Maja a ningmu ni sha rai n’na, The Kachin Post a ningmu ni n re ai lam chye shangun mayu ga ai.