Maja let Pra, Zai hte Sa
Ningma Kap
October 23, 2004 — Myen mung kata na amyu sha ni a lu la ra ai ahkaw ahkang hpe gasat la ai bungli gaw ya ten hta grau ahkayk sadi maja zai ladat lawm ra wa sai.
Myen hpyen du ni shada da daru magam gashun hkat ai gaw matut manoi byin nga ai mabyin masa sha re. Matut n’na mung grai naw byin na re. Than Shwe hte Maung Aye yan mung kade n’na ai ten wuhpung hpaw n’na ahkang aya gashun hkat na sha rai nga ai.
Shanhte kata byin ai manghkang a majaw, masha jahpan n law ai amyu sha ni gaw sum machyi ai lam grai law nga ai. Myen mung a mungmasa gaw 1962 ning de bai lahkam sa wa sai ngu maram lu ai.
Than Shwe hte Maung Aye gaw Myen amyu kaba ka-up lailen hpe dan dan dawng dawng lang mayu ai yan rai nga ai. 1995 ning Mandalay hta galaw ai Jinghpaw laika lu 100 ning Jaw Poi na Manau Shadung hpe jahten kau ai gaw Maung Aye rai nga ai.
Mungkan kaw n’na “Jahkrup la yak ai yan, Baw ja ai yan” ngu masat da nga ai re. Ne Win hpe mungkan kaw n’na dai zawn masat da lai wa yu sai. Ne Win a “chyinghka pat” policy hpe manat sa wa na rai nga sai. Mungdan masha ni hpe myi, na pat ai lam galaw hpang ai hku n’na bat shagu, shata shagu shapraw ai shi laika, journal 30 daram hpe pat kau sai rai nga ai.
Myen mung kata ahkaw ahkang malawng lu hkra gyin shalat la ai Military Intelligence, MI, daju Khin Nyunt hpe Myen Hpyen Atsuya kaw n’na shapraw kau lu na matu Hkringmang Daju lit jaw ai kaw n’na, Khin Nyunt gaw shi a lam hpe masing jahkrat sa wa sai re. Miwa hte grau jinghku galaw n’na Miwa a shingnip npu e, Miwa a myu kaba lai ladat hte maren Myen mung hpe jum hpajang na masing yawng shi galaw ngut sai. Ni htep ai mungdan ni shi hpe grau mu mada madi shadaw wa na matu hte shi a Mung Masa Lam Matsun, Road Map, hpe mungkan kaw n’na masat masa galaw ya na masing gaw, shi a ninggam langai mi rai nga sai. N’dai lam ni a majaw Than Shwe yan Maung Aye gaw October 19 hta manghkang hpe lawan shabyin dat n’na Khin Nyunt hpe magam shara kawn shapraw kau sai rai nga ai.
Myen Dap kata manghkang byin shagu laknat lang myusha rawtmalan hpung ni a matu grau gyip wa magang rai nga ai. Gap hkat jahkring da ai hpung ni gaw lai sai ten hta MI hte dan tawt matut mahkai n’na Khin Nyunt hte n dut n dang tsun jahkrup, ahkaw hkang hpyi la ai lam galaw wa masai. Ya n’dai aten kaw n’na gaw, MI hte matut ai lam n galaw ai sha, ginra e dap jung ai da ai hpyen hpa-awn (Regional Commanders) ni hte ra ai yawng jahkrup la na matu PM ningnan Soe Win kaw n’na matsun shabra dat sai rai nga ai. Amyu sha ni a lam magup hpe seng ang ai ginra dap jung hpyen hpa-awn wa tsep kawp jum manat kau sai masa re.
Myen hpyen dap kata masat da ai policy kaba hta, “Tatmadaw hta lai n’na kadai uhpung uhpawng mung laknat n mai shakap ai” ngu ai lawm nga ai. Lai wa sai shata hta Regional Commanders ni gaw “Gap hkat jahkring da ai uhpung ni kaw n’na laknat zing kau na aten ram sai” ngu ai sumtang hpe Than Shwe hpang de tang madun sai lam nga ai.
Amyu sha a manghkang gaw laknat lang rawtmalan hpung ni hkrai hparan lu ai n rai nga ai. Amyu sha yawng a lit rai nga sai. Myen mung kata na amyu sha ni (Grau n’na Myen amyu n re ai ni) myit hkrum lam lu la hkra lawan galaw ra sai. Lai wa sai ten hta MI kaw n’na amyu sha kahkyin gumdin lam n lu hkra ladat shaw galaw da ai myi-magap ni hpe gun kau ra sai.
KIO kata byin nga ai manghkang ni hpe lawan jasan hparan kau na matu MI kaw n’na grai shadut sai re. “Nanhte lawan n galaw yang hkanghkyi wa sha kau na ra ai” nga n’na sadi jaw ma ai.
Lawan kahkyin n’na hpyen man langai hta sha yawng shang lawm sa wa ra saga ai. Ninggup aga hte jahkrup yak ai ni hte gaw laja lana rai hkat ra na sha rai nga ai. Nang Wunpawng myu sha wa, nang du ai, nang galaw ai hta amyu a matu lawm u ga. Hpyen wa hpe gara hku htim ra na zai hpe ladat shaw let amyu sha makawp maga bungli hta shang lawm sa wa saga.
Lahta na ningmu ni gaw Ningma Kap a ningmu ni sha rai n’na The Kachin Post a ningmu ni n re ai lam chye shangun mayu ga ai. Ningma Kap gaw Wunpawng Mungdan Shanglawt Hpyen Dap, KIA, hta magam gun nga ai wa rai nga ai.
