Myit Hkrum let Rawt Sa

Ningma Kap

November 22, 2004 — Wunpawng sha ni a laklai ai kumla masat gaw kade daram kaba ai manghkang hpe raitim, lapran salang hte htinglet n’na shada da jahkrup hparan jasan la lu nga ai. N’dai gaw Wunpawng amyusha ni a sai, salum kata hta rawng nga ai tengman lam, tsawra shawang myit lam, mara raw hkat lu ai lam, n mai ga garan ai, ngu ai a mahtai rai nga sai.

Shata man 11 daram na hkra Wunpawng Mungdan Shanglawt Hpung, KIO, kata byin pru nga ai n ru-n ra manghkang ni hpe Wunpawng Amyusha Mungbawng Rapdaw gaw lapran salang kanu kawa tai let November 12 ya shani masit shara jasan kau lu ai lam gaw Wunpawng sha ni yawng a lahkam ningnan tai wa nga sai. Amyusha yawng a myit mada shara shabyin ya lu sai.

Myen hpyen kaichyan dap dawm kau ai hpang jahkrup hparan la lu ai re majaw, latung n lawm ai, ana kanu n rawng ai, jet majing re ai amyusha kahkyin gumdin lam rai nga sai.

Hpyen wa n’gun kade kaba, masha kade law tim marai lahkawng n mai hkrum ai amyu re majaw hpang jahtum e gaw kahkyin mai ai amyu ni e dang kau na sha rai nga ai. Myen hpyen kata ga garan ayai aya byin ai lam ni gaw Myen mung shanglawt garai n lu ai ten, Hainan Zinlawng kaw Japan ni kaw n’na hpyen hpaji sharin nga ai Myitrum 30 (30 comrade) kata hta Aung San hte Ne Win a lapran na ningbaw gashun manghkang ni a majaw rai nga ai.

Dai manghkang hpe dai ten hparan jasan kau n mai ai majaw, kaji dik ai Myen mungdan hta rawt malan hpung law dik rai n’na, atsuya galaw nga ai kata hta mung hpyen grai law ga gran nga ma ai. Marai langai lahkawng a ningmu n bung ai hpe n jahkrum lu ai a majaw prat ban hte ban masha law law si hkrum jamjau hkrum ai lam byin nga masai.

Myen hpyen atsuya kata ga garan ayai aya byin nga ai ten hta anhte yawng gaw kahkyin gumdin lam hta n’gun tawng shatai let hpyen wa a ra rawng gawngkya ai hpe shanut shalau ya ra nga sai.

Hka bra nga ai makam masham hpung, htunghking hpung, mungmasa hpung, laknak lang hpung ni yawng gaw kahkyin wa ra sai. Manaw n’sen langai sha shapraw ra nga sai. Ayai nga ai machye machyang, masha n’gun, laknak ni hpe kahkyin lu dat yang Wunpawng sha ni a mauhpa n’gun gaw dan dawng nga sana re.

Wunpawng sha ni a hpyen gaw hpyen atsuya sha n re; amyu kaba lailen lang ai Myen amyu ni chyu mung n re. Wunpawng amyu rai nga ninglen, Wunpawng sha ni kahkyin gumdin wa na hpe n ra sharawng ai, tinggyeng htinghkrai uhpung hpaw mayu ai ni yawng mung anhte a hpyen rai nga ai.

Ningmu n bung hkat ai hpe jahpai n’na tingnang htinghkrai nga mayu ai, “Ngai jaw, ngai ram, ngai tsun ai hkan” ngu ai gumshem ai myit jasat Wunpawng sha ni a labau hta n nga sanu ga. N bung ai ningmu hpe n’gun shatai sa wa saga.

Tinggyeng shada mara shagun hkat ai ga ni hpe shu-mashi prat du hkra “Dumlawng kaw n’na dumhkang hti” hkrat wa ai lam n galaw ga. Tinang langai a myit ara hta ramma ni a myu tsaw myit makru hpe damya mya sha ai lam, ramma ni a atsam hpe sai chyup ai lam, manu dan ai aten prat ni hpe jahten kau ai lam n galaw saga. Ramma ni mung Jaw na hte Shut na hpe tau hkrau sawn shachyaw n’na Jaw a hpe lata la sa wa ga.

Lahta na ningmu ni gaw Ningma Kap a ningmu ni sha rai n’na The Kachin Post a ningmu ni n re ai lam chye shangun mayu ga ai. Ningma Kap gaw Wunpawng Mungdan Shanglawt Hpyen Dap, KIA, hta magam gun nga ai wa rai nga ai.