Numsha Nye a Prat

Shayi Seng

June 10, 2004 — Masha langai a prat hta lam kalang shut yang lam kaja bai du na matu gaw garai yak a hka. Shut ai lam langai nga yang mu matut n’na shut na matu grai loi nga ai. Anhte num sha ni a prat gaw grai yak nga ai. Hpa majaw lam shut shai wa ai masha langai hpe, lam n madun ai sha hkaraw de htu bang a ta? Num sha ni n’tsa da ai Jinghpaw Wuhpawng uhpawng a myit jasat hpe galai shai ra sai.

Moi Nu, Wa ni a prat kaw n’na anhte numsha ni a prat machyi hkam sha wa ai lam re. Anhte num sha ni a prat hta madu a myit ra ai hku hkawm sa ai hta, kanu kawa, makying jinghku, kahpu kanau a myit ra ai hku hkawm sha wa ai re. Anhte Jinghpaw myusha htunghking gaw, La kasha ni hpe grau sharawt n’na Numsha ni gaw kahpu kanau lasha ni daram ahkaw ahkang n lu ai re. Ga shadawn hpaji lam hte sut lam. Kanu Kawa ni mung lasha gaw n’ta hpe bai yu na wa re nga n’na, lasha hpe sha madi shadaw ai re.

Numsha ni gaw shaning grai na hkra hpaji hparat n lu hka ja ai sha, n’ta dinghku lit la n’na nga lai wa sai. Dinghku shang ai shaloi mung madu wa a zingri zingrat diprip ai hpe hkrum sha ai. Lasha ni gaw, num law law la n’na diprip zingri tim mara n nga ai. Num ni gaw dai zawn re ahkaw ahkang n’nga ai re. Numsha langai madu wa hte hka ai rai yang anhte myusha shingwang kata hta yu kaji ai lam hkrum sha ai re. Grau n’na lasha ni a roirip ai lam hpe hkrum sha ai re. Dai zawn ra ai lam hpe hkrit gaya ai majaw Nu num law law gaw shaning grai na hkra prat hpe si hkam n’na nga lai wa sai re.

Dai ni na prat hta dai zawn re myit masa hpe galai shai ging sai. Num, La yawng gaw masha sha re. Num, La hkrang shai ai hta jan n’na, Shinggyin ahkaw ahkang maren sha re. Dinghku shang ga ai numsha hpe yu kaji ai myit masa galai shai ra sai. Dai zawn re myit masa hpe n galai shai yang diprip ai lam hpe n gun jaw ai hte, Nu num ni hpe grau n’na roirip na matu lam hpaw ya ai hte bung nga ai.

Masha gaw prat mi hta galang sha pra ai re. Anhte yawng bai myit yu ga. Byin lai mat wa sai numsha law law a prat hta kadai wa shanhte hpe lam madun nga a ta? Hpa majaw zingri diprip ai lasha ni hpe gaw mara n mu ai sha num ni hpe chyu mara tam a ta? Anhte a myit masa hpe bai dinglit yu ga.

Dai ni na anhte myusha yawng myit jasat hte ningmu ni kalai shai ging sai. Anhte numsha ni mung anhte a lagaw anhte tsap lu ai lam madun ra sai. Dai zawn re ning mu hpe hkrit n’na prat hpe a’sum n jaw ra ai. Masha gaw n shut ai n nga ai. Hpa mu n shut ga ai masha gaw hpa mung n galaw ga ai masha re. Madu a prat hpe tinang hkrai tsap ai wa gaw grau shut shai ai lam garai nga na re.

Mungkan hta mying kaba ai masha yawng a prat labau hpe yu yang grai jamjau laiwa ai hkrai re. Dai majaw prat hpe a sum n jaw ai sha shakut ga. Anhte numsha ni nan mung myit jasat galai shai ga, langai hte langai garum shingtaw ga. Madu a ahkaw ahkang hpe gaw madu nan sharawt la ra sai. Dai majaw dai ni na anhte Jinghpaw Wunpawng shayi sha ni yawng ningbaw ningla byin tai wa hkra shakut ga. Moi na n’ta dinghku kata na dinghku num kaja ngu ai mying lu na matu prat hpe n jaw hkau ai sha madu a prat hpe madu hparan lu hkra shakut sa wa ga ngu n’gun jaw mayu ai.

Lahta na ningmu ni gaw Shayi Seng a ningmu ni sha rai n’na The Kachin Post a ningmu ni n re ai lam chye shangun mayu ga ai. Shayi Seng gaw Jinghpaw Wunpawng myushayi sha langai rai nga ai.