An-nau ni Myit Hkrum ra Sai

Lau Wa Zawng Hkawng

June 3, 2004 — Chyurum ai an-nau ni Jinghpaw, Lachik, Lawngwaw, Lisu, Rawang, Zaiwa ni hpe Chyurum ai Wunpawng sha ni ngu n’na hpa majaw shamying a ta nga yang Wunpawng sha ni lakung 6 nga ai kata kaw tinang a amyu majing a mying naw nga shajang ga ai.

Ga shadawn nga yang anhte mahtang amyu ni lakung 6 kaw e yawng hta lawm nga ai hpe mu lu ai. Jinghpaw hku Chyasen Labang, Lachik hku Jinghpuk, Lisu hku La Me, Zaiwa hku Dum Hpau, Lawngwaw hku Jum Hpauk, Rawang hku Re Dam Wang nga n’na ndai zawn rai ai majaw chyurum ai Wunpawng sha ni ngu shamying sa wa ai hpe mu lu nga ai.

Kaga lakung ni mung dai hte maren sha lakung shagu hta lawm nga ai, anhte yawng chye nga ga ai. Dai majaw dai ni an-nau ni kadai hpe mahtang yet kau na ta? myit yu ga. Dai ni na ten hta nang lawnwaw wa Wunpawng myusha yawng a Ningbaw ngai Lawngwaw wa sha tai ra ai, byin timung n byin timung ngai ningbaw shara kaw Lawngwaw rai ra ai nga n’na Kahpu Kanau myit jasat n rawng ai rai yang dai ni ngam ai lakung 5 hte gara de sa na ta? N’dai myit jasat gaw moi lai wa sai Gumchying Gumsa lailen naw rai nga ai hpe dum ga.

Moi lai wa sai shaning 100 a shawng de gaw Gumlau prat ngu ai nga lai wa saga ai. Hpa n re ai kahpu kanau shada yi sun hkauna gashun gasat hkat, Mayu dama, Kashu Kahkri gasat hkat manawn masham re ai myit hte Wunpawng sha ni nga pra wa ma ai. Moi na myi di chyip re ai jiwoi ni n chye n chyang ai myit jasat hpe dai ni anhte ban hta n dai myit jasat hpe naw rem nga ai rai yang, anhte myit hkrum lam lu na n rai nga ai. Dai majaw dai ni anhte ban, myi hpaw, na na wa sai prat rai sai re ai majaw Chyurum ai an-nau ni moi na Jiwoi ni myi n hpaw na n na ai akyang lailen hpe Wunpawng myusha kaji kaba hkum deng dek galai kau ra saga ai hpe ngai hku n’na mu mada n’ngai.

Dai re ai majaw dai ni kaw n’na anhte yawng Wunpawng yan nau ni re ai myit jasat hpe n shamat ai sha myit hkrum ai myit jasat hte sa wa ga. Myit jasat hpe an-hpu an-nau ni a gawng malai ngai rai sai ngu ai myit jasat hte lam kaja woi tam n’na woi awn sa na hpe kam hpa let woi awn sa wa marit.

“Nga uhpung garan yang Sharaw gawa ai da” nga ai ga malai hte maren, dai ni na ten hta an-nau ni gaw Chyurum Wunpawng yan-nau ni re ai nga n’na myit hpe myit galu kaba ai kahpu kanau majing zawn myit hkrum ai lam n lu myit, n sharai jang gaw Sharaw gawa na sha rai nga ai.

Dai majaw anhte Wunpawng sha ni gara lakung raitim, tinang lakung langai maga de hkrai n’gun dat ning shawng tai mayu, dam lada ai Shawang myit hte Chyurum Wunpawng myusha yawng hpe woi awn zinlum na myit n rawng ai rai yang kaga lakung 5 hpe lu zinlum lu na n re ai hpe dum ga. N’dai zawn re ai byin wa ai gaw kadai kade majaw ngu mara shagun nga na malai, tinang nan dum n’na sharai la ra na rai ga ai.

Lahta na ningmu ni gaw Sut Du Lau Wa Zawng Hkawng a ningmu ni sha rai n’na The Kachin Post a ningmu ni n re ai lam hpe mung chye shangun mayu ga ai. Lau Wa Zawng Hkawng gaw Du Kaba Zahkung Ting Ying woi awn ai New Democratic Army-Kachin NDA-K hpung shang langai mung rai nga ai.