Myen hpe Gasat yang Shang Lawm Na

Wunpawng Myi Set

July 15, 2004 — Anhte a Kaji Kawa ni a prat kaw n’na shadum sharin ai hta, Ji Wa ni a lahpa galai na matu asak apart ram ai ramma ni hpe “Dai ni na Ramma, Hpawt ni na Ningbaw Ningla” ngu ai ga malai hte shadum sharin lai wa sai hpe dai ni na anhte Ramma ni du hkra chye na hkap la nga ga ai.

Rai yang, dai ni na ten hta anhte Amyu sha ni hpe woi awn nga ai ningbaw ningla hpu-shawng hpu-ba ni gaw lahta na ga malai hte shai ai hku she shadum nga ma ai le. Ji Wa ni tsun ai hta “hpawt ni na ningbaw ningla” ngu sharin da ma ai. Raitim, dai ni na hpu-shawng hpu-ba ni gaw anhte ni hpe “hpawt ni na hpyen kaba” mi shadu sam masai ngu myit lu ai.

Hpa majaw nga yang hpu-shawng hpu-ba ni shada myit n hkrum ai a marang e, uhpung uhpawng shalaw let, shada hpyen hkat, shada shatan ninghkan hkat rai anhte Ramma ni lang shagu rim katut, rim ai ni mung anhte a hpu-shawng hpu-ba ni sha bai rai. Myen she rim zingri ai da nga yang, Amyu a matu ngu myit shadik la mai. Ya gaw, kaning ngu hkam la na?

Du na ten a matu, ningbaw ningla ni ngu shamying masat nam man chya hkam ra ai shanhte a aru arat kashu kasha ni hpe machye machyang shajat ya na lam hpaji sharin shangun shalat shaprat na lam ni hpe gaw n galaw, shanhte hpu-shawng hpu-ba ni a tinggyeng a matu hkrai jai lang taw nga. Du Kaba N’ban La a Wunrawt Hpaga hpung a matu shaga la n’na Hpun hpaga lam matu nam maling de dat, hpun hpaga Miwa la ni hte rau bungli jaw, Miwa la ni kani lu yang, anhte ramma ni mung hkan lu. Laiza Hotel kaw bungli jaw na ngu shaga la, jahtum gaw, Wun Awng mying ai Sut Du a Hting Hpai Da Dabang de she sa bang dat. Htunghking rai hpe manu shadan ai lam wa, Hpai Da Dabang N’ta shawng kaw manam tau htunghking shatai kau. Hong Kong Comapany a matu shimlam ngu shaga la, Hpyen Hpaji Sharin ya, Lahpum maga mi de gaw, Wunpawng Mungdna Shanglawt Hpyen Dap, KIA, masat dazik shakap, lahpum maga mi de gaw, Hpai Da Dabang a Shim Lam Dazik shakap. N chye myit n chye sawn la saga ai majaw lam shadam ya ai rai kun?

Pang Wa de mung, shata shabrai jaw na nga tsun nga. Kadai ningbaw da i? ngu san dat yu yang, Du Kaba Lasang Awng Wa re da. Sa gaw sa mayu sa. Tim, myit yu na lam langai mi bai pru wa. Amyu Sha Shim Lam ngu ai gaw, lai wa sai ten hpaga lam hpe she madung dat let, Amyu Sha ni nga ai ginra shara ni hta jahkrit shama rai, Amyu Ting hpe Shim Lam Jahten kau ya lai wa ai majaw, ga tsun mi she kaja tim tsang mayu. Bai sagawn dat yu yang gaw, Du Kaba N’ban La hte manghkang byin hkat n’na Pang Wa de lung mat wa ai re da. Du Kaba N’ban La hte shan lahkawng gaw “Udi Chyang Maja” Amyu lakung yan hku n’na, Maran Yan a Kahpu Kanau Dap Jung da ai yan bai rai. N chye na mat sai. Shan nau ngu sawn ya yang, hpu-shawng hpu-ba yan gaw shan hpyen bai tai.

Pang Wa de n gwi lung sai law, n’ta kaw ya na zawn sha Myen wa hpyi ai mi jaw, Myen wa up ai hku mi nga sana ngu myit dat yang, myit rum ai Sai Ga Shaga Hkat ga ai Wunpawng Ramma shada bai hkrum dat yang, Wunpawng Gumrawng Gumtsa Mungdan gaw, Mungkan N'htum Dingsa “Grin Nga Lu Na”. Wunpawng Gumrawng Gumtsa Mungdan gaw, Mungkan hta “Awmdawm Shanglawt” lu ai Mungdan tai lu na. Dai majaw, Wunpawng Gumrawng Gumtsa Mungdan hpe dip up sai chyup nga ai, Myen Hpyen Wa hpe atsai awai gawt shapraw kau na, ngu ai mahtai mi bai pru wa.

Rai yang gaw, anhte Jinghpaw Wunpawng myusha ni hta dai ni na ten hta buga kata hta shamu shamawt woi awn nga ai hpu-shawng hpu-ba Rawt Malan Hpung ni gaw masum ting bai nga. Wunpawng Mungdan Shanglawt Hpung, K.I.O, New Democratic Army-Kachin, NDA-K hte Kachin Defence Army, KDA, ngu mying ai ni rai. N’dai hpung ni yawng gaw Myen Hpyen Atsuya hte Gap hkat jahkring da let Buga gaw sharawt lam galaw nga ai hkrai rai. Raitim, KIO hpe yu dat yang ta tut up hkang nga ai ni gaw N’ban KIA, Lasang KIA ngu bai mying taw. Gara wa madaw Myen hpe gasat ai rai kun?, n chye ai majaw, KIO Magam Dap hta shang n’na Myen hpe gasat na matu gaw shada gasat ai hta Hpyen La la ra na zawn bai rai.

NDA-K hte KDA hpe bai myit dat yu yang gaw, Pang Wa ngu ai hte Kawng Hka ngu ai Rawtmalan Dap Ginjaw shara lahkawng yan hta nan anhte a Hpyen ngu masat ai Myen Dawng Hkawn she bai shalun da ai hta n’ga, Myen Dazik bai shakap da.

Amyu ting lawt na matu, lam gaw tam ra sa. Maigan de du nga ai, hpu-shawng hpu-ba ni hpe bai myit yu dat yang, anhte Amyusha ni a Myu Tsaw Sut Du ngu ma ai Bawmwang La Raw hpe bai myit dum wa. Shi a lam bai myit dat yu yang, Mai Ja Yang ngu ai kaw Jinghpaw Wunpawng Amyu Sharawt Hpung, ngu ai mying hte Kawlik langai mi ting gaw hpaw tawn da ya sai. Rai yang shi hta mung Kachin National Organization, KNO, ngu ai mying hte mung masa hpung langai mi bai hpaw da. Mung kata nan shamu nga ai KIO hte dai ning 2004 ning praw hta manghkang byin hkat da ai re majaw shi hpe KIO a No 1 Je Bat Hpyen ngu bai masat da. Tsang na zawn re. Shi woi awn ai KNO kaw sa yang KIO hte gasat hkat ra ai lam ni mahkoi mi bai pru wa na n’hten. Amyu shada ahtu hkat, adawt hkat, sat hkat, nat hkat rai ai baw tai wa na bai rai. N gwi daw dan mat sa.

Wunpawng Gumrawng Gumtsa mungdan a “Awmdawm Shanglawt Lam” a matu chyeju hte naw myit ya marit law. KIO, NDA-K, KDA, KNO, ngu ai hpung mali hta gara hpung mi rai rai, Myen Wa hpe she teng sha woi gasat na nga yang, ya jang nan shang lawm na ga ai.

Lahta na ningmu ni gaw Wunpawng Myi Set a ningmu ni sha rai n’na The Kachin Post a ningmu ni n re lam chye shangun mayu ga ai. Wunpawng Myi Set gaw Wunpawng Mungdan Shanglawt Hpyen Dap, KIA, magam gun langai rai nga ai.