Uhpung Law ai N law ai Ahkyak N rai; Mung Shawa Madi Shadaw na Ahkayk Rai

Jinghpaw Gam

July 9, 2004 — Uhpung Uhpawng (Organization) langai mi hta e myit n hkrum manghkang byin pru wa ai ngu ai gaw uhpung uhpawng a hpa-awn (ningbaw) ni hta lit nga ai re. Hpa-awn shada ningmu n bung gamung n rum rai wa ai gaw uhpung hten bya wa na a ning pawt madung rai nga ai.

Ya Wunpawng Mungdan Shanglawt Hpung hte Hpyen Dap, KIO/KIA, kaw byin taw nga ai manghkang gaw KIO/KIA magam gun ni hte dap ma ni a lapran hta byin nga ai manghkang n re sha ningbaw ni a lapran e byin nga ai manghkang re ngu mu n’hten! Ndai manghkang ni hpe yu ai shaloi manang shada da (personality) n ju n dawng na byin wa ai n re sha mung shawa hte mungdan matu galaw sa ra nga ai mung masa zai ladat ni hta hkam la ai lam, galaw sa wa na lam n bung wa ai majaw byin pru wa ai manghkang re ngu lachyum pru ai. Ding re byin pru wa na lam ni gaw ya hkyak hkyak sha byin wa ai n re sha shaning tsawm ra ning kawn n’dai zawn byin wa na lam hpang wa sai rai nga ai.

KIO/KIA rawt malan labau hpe n’htang hpyan yu dat ai yang KIO/KIA ningbaw n’kau mi hpu nau Rawang ni hpe myit machyi lam galaw lai wa ai kawn KIO/KIA a ningtsa e myit machyi let, magyep kap ai lam yawm mat wa ai. New Democratic Army, NDA-K, Kachin Defense Army, KDA, hte ya ten Du Kaba Lasang Awng wa ni woi awn ai hpung nga n’na amyu my ga garan wa sai re.

Hpa majaw ning re lam ni byin pru wa a ta?, ngu ai ga san san hpa hte sawn hpa lam ni pru nga sai re. Ndai mabyin a ning pawt bai alai dat yu yang; Anhte gaw Wunpawng Mungdan a Shanglawt Atsuya ni rai ga ai ngu tsun jai lang taw nga ai KIO/KIA hpa-awn salang ni hta lit nga nga ai. KIO/KIA hpa-awn salang ni hpa wa byin nga a ta?, ngu ai mung matut san hpa rai nga ai. Byin taw nga ai hpa-awn ni ningtsa e mung shawa a mu jut ni gaw;

1. Mung shawa a ningtsa e gumshem daru magam lai len hte up hkang ai. Daru magam ahkang aya hpe ra marin ai, tinang a jinghku jingyu ni hte ni nawn ai ni hpe myi man tam shara jaw ai lai, tinggyeng akyu a matu Ja Gumhpraw hpe law hpa myit marin ding lai ai.

2. Mung shawa ra sharawng ai lam tang madun, hpaji jaw la ai hpe a’hkyak n la ya ai, daru magam (power) hpe jai lang ra ai shadang hta ding lai n’na jai lang ai, shinggyim ahkaw ahkang hpe hkung ga la ra hkan sa jai lang ai lam n nga ai.

3. Mung masa zai ladat (Policy) hte daru magam (power) jai lang ai lam hta Democracy lai len hte ninghtan shai ai hku jai lang nga ai. Democracy lai masa hku n’na nga yang mung masa Policy hte daru magam (power) gaw lawu kawn ningtsa de (Bottom to Up) lung wa ra ai rai nga ai. Raitim jai lang taw nga ai gaw ningtsa kawn lawu de (Up to Down) yu wa hku rai taw nga ai. Jaw tim n jaw tim, Ginjaw Aming nga jang dap ma kawn mung shawa du hkra hkan sa galaw ya ra nga ai rai nga ai, n’dai ladat gaw gum shem up hkang lai rai nga ai.

Ding re galaw ladat ni hpe n gram ai sha matut jai lang nga ding sa (sh) ding re lai ni hpe woi jai lang nga ai ningbaw ni sha matut woi awn nga ding sa gaw mung shawa hte mungdan a gam maka hpa wa mi lak lai n’na rawt jat wa na n re sha n ga, grau n’na pi sawng mat wa na re.

Mung shawa hpe teng sha tsawra makawp maga mayu ai, mungdan hpe tsawra ai, shinggyim ahkaw ahkang hpe hkung ga la ra ai, Democracy up hkang masa hpe teng sha ra sharawng jai lang mayu ai hte tinang a shari shadang daru magam grin nga mayu ai rai yang mung shawa kawn hpaji jaw matsun madun ai lam hpe hkan sa galaw ai rai yang sha grin nga lu na re.

Tinang a pati grin nga lu na matu gaw kaga pati ni hta grau n’na mung shawa ra sharawng ai lam ni hpe galaw awng dang ya ra ai. Uhpung law law nga ai gaw Democracy a lai masa rai nga ai. Dai re majaw Uhpung Uhpawng law ai n law ai ahkyak madung n rai, ahkyak madung gaw mung shawa ra sharawng ai lam ni hpe awng dang hkra galaw ya lu na sha madung rai nga ai. Uhpung langai sha nga tim mung shawa na matu hpa akyu n rawng yang lachyum pru ai n re.

Myen hpyen Atsuya tsun tsun re Myen a htung lai len hte mung dan hpe gaw gap sa ra ai, nga ai ngu ai hte maren, KIO Ninggawn Amu Madu Du Kaba Gam Shawng mung anhte Wunpawng lai len hte maren mung dan gaw gap taw nga ai ngu tsun da nga ai. Ding re myit masin lai ladat hpe jai lang n’na mung dan up hkan nga ai majaw dai ni myen mung gaw mung kan hta up hkang lai ladat n nga ai tara n shang mung up Atsuya ngu masat da hkrum nga ai re.

Wunpawng lai Wunpawng ladat hpe jai lang n’na mung dan gaw gap wa ai gaw shaning 40 jan sai tim, gara madang sha naw rai nga ai hpe yawng mu nga ai re. Dai majaw lai ladat ningnan, lamang ningnan ni hpe gyin shalat n’na, galaw ra sai. Ning ngu yang mai gan ni a up hkang lai ma hkra hta dagraw lang na hku tsun ai n re. Mung masha ra sharawng ai hku n lu galaw jang mung lu galaw ni hpe ap ya ai gaw kaja htum re. N ngut ai lam hpe, n dang n la di gun hpai nga ai gaw aten garwt shangun ai lam she re. Ahkying aten ngu ai gaw ahkyak dik htum re.

Masha a asak apart gaw aten du nga na hpe la nga lu ai n re. Aten kadun hta sa gan sak hkrung la nga ai ten e pyaw ai ngawn ai ngu ai namchyim hpe n hkam sha ai sha si mat wa ra ai ngu ai gaw nachying yawn hpa kaba re.

Dai majaw anhte myusha yawng a matu nga n’na mung masa hpe galaw nga ai uhpung shagu de na hpa-awn ni mungshawa akyu ara hpe madung tawn let jawm shakut sa wa ai rai yang lawan ladan hte awng padang lu na gaw ga lahtum n shut rai na re.

Lahta na ningmu ni gaw Jinghpaw Gam a ningmu ni sha rai n’na The Kachin Post a ningmu ni n re ai lam chye shangun mayu ga ai.