Gram Ra ai hpe Gram Saga

Ningma Kap

July 7, 2004 — Wunpawng Mungdan Shanglawt Hpung, KIO, a hkrun lam gaw kam ai, n kam ai; gwi ai , n gwi ai; myu tsaw myit rawng ai, n rawng ai ; nga n garan ai sha, anhte Kachin amyu sha law law si hkrum, zingri hkrum hkala n’ba, jamjau let shaning 40 jan lanyan hkawm lai wa sai. Dai hkrun lam lapran myit masa jasat jasa n rum n’na male pru ai mabyin ni mung nga sai. Wuhpung wuhpawng yawng gaw myusha a matu re nga tim, shada mara mu hkat ai gaw, mabyin a ningpawt re.

Gumshem ai, “Ngai” myit machyu ai, tinang yu jut hpe shanang ai hte tinggyeng shinggyim nga mu lam tam ai myit masa ni gaw uhpung uhpawng langai a n-gun kawng hpe shatsam kau ya nga sai.

2001 ning February shata hta KIO Ginjaw hta daru magam kashun hkat ai mabyin gaw lahta na lam lama mi a majaw sha re. 2004 ning January shata na mabyin mung, shawng na mabyin a lu la ai ahkang aya garan gachyan gambung n ru n ra byin ai majaw sha re.

Ya yang, anhte Kachin amyu sha ni a lam yan gaw grai ahkyak sadi maja ra ai ten hta, Ginjaw jum tek kaga ga re ai KIO, KIA lahkawng nga wa ai gaw amyu yawng a matu gaya kahpa hte myit yu na lam ni rai nga sai. KIO sha n ga, anhte Kachin myusha ni a shawnglam shingran gaw bai n pra wa magang sai.

Kachin mung shawa gaw ta tut mabyin hpe sha mu lu nga ai. KIO a buga gaw sharawt lam ni gaw ja gumhpraw kadai hkrat sai ngu tsun marawn nga tim, KIO uphkang ginra a matu sha rai nga ai. Kachin amyu sha yawng a matu n lawm nga ai. Amyusha law machyu nga ai mare kaba ni hta KIO a shingnip n lu ka-up nga ai.

Mung shawa kaw n’na mu mada ai gaw, KIO Ginjaw kata n ru n ra byin ai lam, magam gun kaba kaji a lapran na sutgan lu su madu ai n bung pre ai lam hte, KIO magam gun ni hte mung shawa ni a lapran na n bung ai ahkaw ahkang ni rai nga ai.

Myu mare kaba na salang langai tsun ai, “nanhte KIO, KIA ni gaw shanglawt lu masai, anhte mung shawa ni she shanglawt garai n lu ai, Myen [SPDC] hte KIO ni kaw n’na shanglawt naw gasat la ra ai.” Myit yu mai ai lam rai na re.

KIO Ginjaw kaw n’na n’dai aten ahkying gaw lahkam htawt jaw, tsun shaga jaw, myit mang jaw ra na re nga mu lu ai. Mabyin masa lam yawng hpe sung sung li li myit yu ra na tai sai. Sutgan arawng aya a majaw amyu sha yawng mayam bai tai ra na ga ai kun?

KIO salang n’kau a Ja Sutgan lu shingjawng ai lam jahkring kau da ra sai. Arawng aya hpe laknat shatai ai lam dawm kau ra na tai sai. KIO Ginjaw gaw magam gun ni kaji, kaba yawng a lu na, sha na, nga mu nga mai lam hpe maren mara byin lu hkra masing jahkrat ra sai.

Pang Wa e du nga ai KIA ni mung ladat amyu myu hte tinang magam gun ni hte mung shawa ni hpe myit gang ai lam galaw nga ai. Mung shawa hte jamjau nga ai ni kadai mung aten galu masing hpe nau n kam ala ai. Ya ya, ra kadawn ai hpe gan jahpring shalai la lu na she ra nga masai.

KIO Ginjaw kaw n’na 2004 ning January shata mabyin hta shang lawm ai ni hpe awm dawm mara dat ai lam galaw ai gaw grai kaja sai. Dai majaw shada jahpyak tsun shamawng ai lam n galaw yang grau kaja ai. Shawang myit kaba hte kata lam jahkrup la na hpe anhte yawng myit mada ga ai. Kachin amyu sha ni a gawng malai tai na uhpung gaw Ginjaw langai sha rai ra ai.

Lahta na ningmu ni gaw Ningma Kap a ningmu ni sha rai n’na The Kachin Post a ningmu ni n re ai lam chye shangun mayu ga ai. Ningma Kap gaw Wunpawng Mungdan Shanglawt Hpyen Dap, KIA, hta magam gun nga ai wa rai nga ai.