KIO/KIA Lahkawng Brang Rai Mat na Kun?

Ninggawn Shawang/ Myitkyina

January 26, 2004 — Ginjaw hta byin mat wa ai manghkang hte seng n’na Du Kaba Lasang Aung Wa hte Ginjaw Salang n’kau hpe magam kaw na jahkring kau ai sha n ga shanhte hte ni nawn ai ni hpe mung rim jep nga ai lam ni gaw Wupawng Mungdan Shanglawt Hpung KIO a gam maka hte seng n’na grai myit yu shara nga nga ai.

Du Kaba Lasang Aung Wa hpe ya ten du hkra matut manoi tam nga ai lam hte Laiza Mare na Sara Kaba Doi La hpe mung rim jep nga ai lam, Du Kaba Hpauyam Tsam Yan hte kaga Du Kaba Lahkawng hpe mung Ga Htawng kaw sharawng da ai lam hte Ginjaw Zuphpawng sa lawm ai Laiza Mare na Salang ni hpe mung shingan de pru hkawm ai lam n galaw na matu pat shingdang da ai rai nga ai. Masat 3 Dap Ba Nau Up Du Kaba Sumlut Gunmaw hpe mung Telephone shaga, matut mahkai lam n galaw lu na hku pat shingdang da ai lam hpe mung chye lu ai.

N’dai lam ni hte seng n’na atsawm myit yu ai shaloi, KIO/KIA maga hku n’na gaw jaw ai lam rai na re ngu, sawn maram lu ai. Raitim, ndai zawn rai Ramma hte Mung shawa ra sharawng ai Ningbaw law law hpe ngwi pyaw ai masa hte jawm jahkrup na malai rim, sharen da ai lam gaw du na ra ai aten hta grau chyamchya, shuk wa chye ai lam hpe tau jau n’na mu mada ai. N’dai hta 2001 ning e byin lai wa sai Daru Magam Ahkang Aya gashun la ai hte lakap n’na mung, masa ram ram lawm nga ai hpe mung sawn maram lu ai.

Sara Kaba Doi La gaw 2001 ning hta byin lai wa sai Daru Magam Ahkang Aya gashun La kau ai ten hta, Mung shawa hte Ramma ni hpe gahkyin gumdin n’na Du Kaba N’ban La hte Du Kaba La Sang Awng Wa yen hpe garum mat wa ai myit su Langai mi re ai lam hpe chye lu ai. Dai hte maren ya sharen da hkrum ai Du Kaba Hpau Yam Tsam Yan hte kaga Du Kaba ni gaw dai shaloi na Daru Magam Ahkang Aya Gashun la ai lam hta ram ram ahkyak ai hku shang lawm mat wa ai ni rai nga ai.

N’dai masha ni hpe yana zawn jep joi nhtawm, mara jaw let sharen da ai a majaw, yahte Ginjaw kaw byin ai manghkang hpe tsepkawp shatsai kau lu sai ngu n’na sawn la ai raiyang chyawm gaw grau tsang ra ai maga de du mat wa na masa nga ai. Lama wa Du Kaba Sumlut Gun Maw hpe hkang sharen da ai raiyang, Ramma, Mung shawa hte hpyenla ni gabrawng wa na rai n’na, yawng de ahtu hkra machyi wa ai lam ni pru wa na re ai lam hpe sawn maram lu ai. Dai hta grau ai gaw, Myen wa hte galaw da ai “Gap Hkat Jahkring Lam” hten run mat wa na rai n’na, anhte n law la ai, Myit n hkrum mai ai Myusha shada sai htaw machyi n’na, hpang jahtum Myen wa shang nhtawm dumbru dumbra byin let hkrat sum mat wa chye ai masa pru wa chye ai hpe tau nau n’na sawn maram lu ai.

Byin nga ai lam hpe matut n’na dinglik yu ai shaloi, Dusat Lahkawng ninggyet hkat ai kaw je ai ngu n’na shingna hte sa gayet dat ai shaloi, grau chyi wa ai hte bung wa ai. Shing n rai, sa je ai wa mahtang htim hkrum na lam byin wa chye nga ai.

N’dai zawn rim sharen da ai a majaw, kaja wa na re ngu n’na n mu mada ai. Byin nga ai manghkang hpe rau sha hkrum rai n’na, simsa ai myit hte jawm bawngban, hparan hkat ai gaw kaja dik ai lam re ngu ai hpe mu mada ai. N’dai mabyin hpe simsa ai ladat hte lawan hparan jasan kau ra sai hpe mung lu maram ai.

Sara Kaba Doi La hte ya rim hkrum ai Du Kaba ni hpe gaw Ginjaw Committe salang n’kau mi hku n’na 2001 hta byin ai Daru Magam Ahkang Aya Gashun la kau ai ten kaw n’na rim mayu sai raitim, Du Kaba N’ban La hte Du Kaba Lasang Awng a majaw n rim hkrum ai re lam hpe mung chye lu ai. Dai hpang nau n na ai ten hta, Du Kaba N’ban La hpe Dap Awn Daju Chief of Staff shara kaw na shayu kau let, Du Kaba Lazing Bawk gaw Du Kaba Mali Zup Zau Mai hpe rim da ai kaw na shale la nhtawm, moi na zawn bungli bai matut galaw na lam ni mung byin wa chye ai hpe maram lu ai. Ndai hku byin wa ai raijang, Ningbaw Kaba shara hpe gaw Du Kaba Zau Mai (sh) Du Kaba Gauri Zau Seng, shan lahkawng kaw na marai langai ngai, shara la wa chye nga ai.

Maga mi hku n’na byin chye ai lam langai mi gaw, Duwa Bawmgwang La Raw, Du Kaba N’ban La, Du Kaba Lasang Awng Wa hte shi a hpang hkan masha ni bai hkrum n’na, KIO/KIA hpe jum mat wa lu ai masa mung byin chye ai.

N’dai zawn byin wa ai shaloi, KIO/KIA gaw Lahkawng brang rai mat na kun? Shing n rai, grau gabrawng wa nhtawm shada n ngwi n pyaw, maru marang rai n’na, Labau n tsawm wa ai baw byin wa na kun? Shing n rai, KIO/KIA gaw Langai sha tai mat n’na N-gun grau rawng mat na kun? grau kaja wa na kun? Daru Magam Ahkaw Ahkang hpe sha bai gashun hkat hkat rai wa ai baw byin wa na kun?

Shing n rai, KIO/KIA hte anhte Myusha ni a Pandung rai nga ai Shanglawt lu ai mungdan de grau ni wa ai baw byin wa na kun? Hpami raitim, anhte myusha yawng a matu kaja ai hku byin wa na matu gaw, jaw ai lamyan hpe chye n’na, myusha yawng a akyu hpe ra sharawng ai Mung shawa masha hte Hpyen dap shawa ni hta sha madung na re ngu kam let hpungdim dat n’ngai.

Lahta na ningmu ni gaw shalat ai wa Ninggawn Shawang a ningmu ni sha rai n’na, The Kachin Post a ningmu ni n re lam chye shangun mayu ga ai.