Ginjaw hta Byin ai Manghkang Ningtsa

Jinghpaw Gam

January 24, 2004 — KIO ginjaw hta hkyak hkyak sha byin lai mat wa sai manghkang hte seng n’na Jinghpaw Wunpawng myusha yawng sha n ga, mai gan myusha ni mung na chye sai rai nga ai. Dai mang hkang a majaw Wunpwng amyu sha yawng gaw myit n pyaw nga ai hte sawn dinglik yu nga ding yang rai na re ngu kam ai. Lawu na lam ni hpe mung sung sung jawm myit yu na matu lajin dat n’ngai.

KIO ginjaw hta byin mat wa ai mang hkang hte seng n’na jep sawgawn Commission kawn Dukaba Lasang Awng, Dukaba Hpau Yam Tsam Yan the Dukaba Padip Gam Awng ni hpe KIO/KIA magam gun taw nga ai kawn kalang ta shapraw kau ai lam gaw n’ta masa hku n’na shapraw ai re ngu mu lu ai.

Dai ni hpe shapraw kau na malai, Du Kaba Dr TuJa, Du Kaba Gauri Zau Seng hte Dukaba James Lum Dau ni hpe mahtang shapraw kau ra ai ngu mu mada ai. Hpa majaw nga yang KIO/KIA kaw ngam nga ai myit su du, Gyi Salang ni hpe ya ten na anhte Mungshawa hte Mungdan hta jai lang n mai ai, akyu n rawng na zawn re mung masa hpe woi galaw nga ai ngu tsun mai nga ai. Tsun nga ai gaw myusha mung masa lam (National politics) nga n’na galaw shapraw nga ai gaw ting nang a Daru Magam ngang grin nga lu lam sha rai nga ai.

National politics hpe galaw nga ai rai yang hpa majaw mung shawa ni ra sharawng, hpaji jaw nga ai lam hpe ahkyak n la, ahpa atang di kau ya nga ai lam ni gaw National politics galaw nga ai n re hpe madun nga ai. KIO ginjaw kawn mung shawa hpe gaw hpaji jaw la marit hkap la nga ga ai, kahkyin gumdim ra ai nga tsun masu n’na KIO ginjaw kawn daw dan galaw pru wa ai gaw “Wa Shakap Shai” rai taw nga ai.

Mung shawa hte KIO/KIA na myit su Du, Agyi Salang law malawng gaw KIO ginjaw malawm n’kau mi hte jai lang taw nga ai mung masa ladat ni hpe gram lajang galai shai kau mayu ai gaw shaning na nga sai re. “Hka Gahtam yang Tinang a Shinglang hkra” nga ai ga malai hte tup hkrak byin wa na hpe koi yen taw nga ai majaw myit hta makun bang da ai hkrai rai nga ai.

KIO Ginjaw Magam gun Salang ni nan pyi myit hkrum gahkyin gum din lam n lu galaw woi awn ai gaw anhte myusha yawng hte mungdan hpe atsawm woi awn lu na ngu ai gaw kam shara n nga nga ai. Tinang a uhpung kata e pyi myit rum kahkyin gum dim ai lam n nga n’na Mung masha ni hpe gaw myit rum lam gaw gap ra ai, galaw ga nga jahtau taw nga ai gaw lachyum n pru ai tsun jahtau ai lam sha rai nga ai.

Ya ten KIO gaw gap taw nga ai gaw moi Sama Duwa Sinwa Naw woi gaw gap lai mat wa ai Democracy hte hpa n shai nga ai. National Convention lung, Myen ni hte Constitution jawm ka shangut n’na, Democracy aloi sha byin pru wa na n re. Hpa majaw nga yang Myen Hpyen Du ni a Roadmap hta ka shalawm da nga ai ni gaw Democracy lai masa (sh) lai ladat hte nan n bung nga ai re hpe chye nga ninglen, KIO kawn kalang ta kabu gara madi shadaw hkap tau la ai gaw KIO ginjaw salang ni kaw machyi ai lam hpa n nga tim, mung masha ni hta jam jau ai lam ni matut manoi hkam sha ra na lam sha rai nga ai. Ning re lam ni re majaw KIO galaw nga ai gaw National Politics ngu tsun n lu nga ai.

Lahta na ningmu ni gaw shalat ai wa Jinghpaw Gam a ningmu ni sha rai n’na, The Kachin Post a ningmu ni n re ai lam chye shangun mayu ga ai.