Tengman ai Shiga Lu La na Lam

N’Hkang Myu Jet Awng

February 20, 2004 — Dai ni na prat hta, shiga ngu ai gaw, Amyu Langai, Mungdan Langai rawt jat na matu ahkyak dik ai rai nga ai. Jinghpaw Wunpawng myusha ni hta tengman ai shiga ngu ai hpe n lu la, n mu la ai majaw, n byin na byin, n yak na yak rai nga ga ai. 2004 ning January shata praw hta Wunpawng Mungdan Shanglawt Hpung KIO Ginjaw hta byin wa ai Manghkang hte seng n’na, KIO Ginjaw Salang ni nan, buga ginra shagu de pru n’na, tsun hparan dan ai lam ni galaw ma ai hpe chye lu ai. N’dai hku galaw ra ai gaw, teng man ai shiga hpe anhte myusha ni hpe jaw mayu ai chye shangun mayu ai majaw rai ma ai. Kaja nga yang n’dai bungli ni gaw shiga dap ni a bungli she re.

KIO ginjaw hta byin mat ai manghkang hte seng n’na, dai ten hta anhte Jinghpaw Wunpawng myusha ni gaw shiga ni hpe hkrak tup n lu la, n chye la ai majaw, n tat na tat, n tsun na tsun, n myit na myit rai, anhte myusha ni myit pu lai wa saga ai.

Hpa majaw nga yang, dai ni na anhte myusha ni a Shiga Dap kaba ni hpe anhte Mungdan kata hta n lu hpaw da ai majaw rai nga ai. The Kachin Post, Kachinnews, Wunpawng Dai Ni (Kachin Today) zawn rai ai shiga dap ni hpe Maigan de sha lu hpaw da ai. Hta n’ga, anhte myusha ni hta Gang Hkau Shiga (Internet news) lu la na lam taw ai majaw mung re. KIO, New Democratic Army-Kachin NDA-K, Kachin Defense Army KDA zawn re ai Mung kata nga Mung Masa Rawtmalan hpung ni hta mung, shiga laika shabra ai lam, shiga shapoi ai lam n nga ai majaw re ngu mu mada ai.

Ngai hku n’na tsun mayu ai gaw, anhte myusha lapran hta byin nga ai teng man ai shiga ni hpe anhte shada da tsun htinglet hkat ga. Lama mi na la ai hte tak tsun ai lam, shalaw shapau la n’na tsun ai lam ni hpe koi n’na, teng ai kun? jaw ai kun? ngu ai hpe shawng htingram yu n’na she, tsun jahta, htinglu hting lai hkat ai lam ni galaw ga.

Gang Hkau Shiga lu hti ai ni mung, htingram ai lam shawng galaw n’na she hkap la ga. Gang Hkau Shiga Dap ni mung, teng ai shiga ni hpe sha shapoi hpaji jaw, lam madun ai lam galaw ga ngu ga saw mayu ai.

Dai hku n rai yang, anhte myusha ni hta rawt jat lam n nga ai sha, grau n’na yawm wa, htingnut mat wa na ra ai ngu mu mada ai. Hti shawa ni mung, Shiga Dap ni hpe garum ai lam galaw ga. Anhte amyu gaw, masha jahpan grai n law shi ai ni rai ga ai re majaw Mungkan hta mat mat wa chye ai amyu jahpan hta lawm nga ai ni re hpe galoi mung dum nga ga. Dai majaw, Rawt Jat Lam a n’pawt ‘Tengman ai Shiga Lu La na Lam’ hta nang ngai yawng shanglawm n’gun dat ga.

Shada jahpoi jahpyak hkat ai hku n re sha, hpaji jaw, n’gun jaw, lam madun la hkat ai lam ni galaw ga ngu mayu ai. Ya dai ni na ten hta, kadai raitim, bungli langai galaw yang manu jahpu shabrai lu mayu ai hkrai rai nga ga ai. Raitim, dai ni na anhte myusha ni hta ‘Tengman ai Shiga Lu La na Lam’ bungli masing hta gaw, kadai mung shabri shabrai manu jahpu n marin nga saga. Hpa majaw nga yang, Jinghpaw Wunpawng Amyu yawng rawt jat na bungli re majaw, anhte yawng tinang a dinghku kata na bungli shakut ai hpa jawm shakut shaja ga.

Bai n’na, Jinghpaw Wunpawng Mungdan kata hta anhte myusha ni hpe ta tut lam woi nga ai KIO, NDA-K, KDA, Kachin State National Congress for Democracy KNCD uhpung uhpawng ni yawng mung, shiga laika shapraw ai lam, shiga shapoi dap ni hpaw shabawn hkrang shapraw ai lam hpe n’gun dat lam hpaw shakut sa wa saga. N’dai bungli ya jang
n galaw yang gaw, anhte myusha ni hta rawt jat lam ninggam n mu, grit nem ai hta grau grau grit nem mat wa na sha rai na re. Hkrit tsang ra dik ai gaw, amyu mat mat wa na re ngu ai hpe dum saga. Hprang saga.

Myit hkrum ai lam hpe madung dat let, shada tsawra hkungga ai lam gaw ahkyak kaba re majaw, anhte myusha ni shada tsaw ra ai lam, hkungga ai lam, mara raw chyena ya hkat ai lam ni hpe hkap la hkan sa let, anhte ni a ‘Shiga Shapoi Magam Lam’ hpe Jinghpaw Wunpawng myusha yawng shanglawm shakut shaja sa wa ga law.

Lahta na ningmu ni gaw shalat ai wa N’Hkang Myu Jet Awng a ningmu ni sha rai n’na, The Kachin Post a ningmu ni n re lam chye shangun mayu ga ai.