Mung Shawa a Akyu hte Shimlam Makawp Maga na Grau Ahkyak

Jinghpaw Gam

August 31, 2004 — Jinghpaw Wunpawng lanak lang mungmasa hpung shada kata mabyin hte seng n’na shiga dap ni kaw na ka shabra wa ai hte maren teng man ai rai yang gaw anhte mung shawa ni majoi yu shalai gaw n mai sai ngu tang madun dat n’ngai.

Kachin laknak lang mungmasa hpung ningbaw shada ahtik ahtawk sheng mawng sheng hkang, kashun kasha, du/ baw gyam hkat rai taw nga ai lam ni gaw anhte mung shawa matu akyu ara pru lam hpa nan lu na n re hta n ga, shawng si gun ran shatai hkrum nga ai anhte a kashu, kasha, kahpu, kanau, kajan ni a mari la n lu ai asak ni akyu n pru ai lam hta si htum ma na tsang hpa kaba rai nga sai law.

Jaw tim n jaw tim, kam tim n kam tim ningtsa na ningbaw ni matsun ni hpe anhte a kashu kasha dap ma ni gaw hkan galaw ra nga manu ai. Grau sawng ai gaw mung shawa a asak shim lam makawp maga ya na hta grau n’na gaw ningtsa na ningbaw ni a asak hkrung lam makawp maga jaw ya na she madung dat ra mat ai zawn rai nga masai law.

Bai n’na, mungdan hte mung shawa a akyu ara matu ngu jahpai n’na mung shawa madu nga ai sut nhprang arai ni hpe dinggyen akyu a matu kam mara dut lu du sha nga ai lam ni hpe mung yawng jawm ninghkap ra sai. Hpun, Kawa hte laga tu matu ru maru ni hpe kam mara dan dut sha ma wa ai. Kashu kasha ni hpe sat shamyit taw nga ai. Nang hpan Kani Hpraw, Yama (methamphetamine) tsi hkyep hte tsi shing mun ni hpe htaw shalai dut sha nga ai lam ni yu shalai nga n mai sai law.

Lai wa sai 2/3 ning e ya n nga mat wa sai Wunpawng Mungdan Shanglawt Hpyen Dap, KIA, Du Kaba Lazing Bawk hte methamphetamine tsi shingmung hpaga jawm ga ai Miwa la ni hte Mandalay e hkrum jahta yu n’ngai. N’dai Miwa la gaw methamphetamine galaw ai tsi ni hpe India mung Calcutta mare kawn mari la n’na India hte Jinghpaw mung jarit rai nga Vijaynagar mare kawn htaw shalai la ai lam, dai hta du kaba Lazing Bawk ni a ahkaw a hkang hte jawm galaw ai lam tsun dan yu ai. Ding re ai nang hpan tsi hpaga galaw ai lam hta seng ang ai ni nan mung shang lawm galaw taw nga ai majaw shamyit kau n lu nga ai re.

Abum sinwa, hkaraw nhkap hkan tu matu ru maru ni dan dut sha ma.krin ma wa ai majaw du hkra ladaw galai shai ma n’na galaw lu galaw sha lam yak, machyi makaw hpan amyu myu hkrum sha rai nga sai re. N’dai zawn re tsin yam ni gaw anhte mare kahtawng hta jawm majaw shanu nga ai ni sha hkam mana sha ra nga ga ai. Ya na masa hku sha matut bying nga ding sa gaw anhte Jinghpaw Wunpawng myusha ni gaw mung kan hta dum bru dum bra re amyu, le tsat waw tsat rai n’na mat mat ma wa na amyu ni byin wa na hpe tsang ra nga sai law.

Lahta na laika gaw ka shalat ai wa Jinghpaw Gam ningmu ni sha rai n’na The Kachin Post a ningmu ni n re lam chye shangun mayu ga ai.