Tara Hkam Tai Ging ai gaw KIO/ KIA Ginjaw Salang Ni,
Mara Raw Hkrum ai gaw Mara N lu ai Ni

N’hkum Doi La

August 27, 2004 — Mara kaba lu ai Wunpawng Mungdan Shanglawt Hpung hte Hpyen Dap, KIO/ KIA, Ginjaw salang ni gaw mara n lu ai ni a matu mara raw dat ya , kani ya kaba tai ai wa gaw Sara Doi La kani ya kaba re nga n’dau shabra dat masai.

Anhte kam sham nga ai Karai Kasang a man e, teng man ai lam hpe galoi du hkra n tsun shapraw ai makoi magap da nga na ta? Chyurum ai Nu Wa mung chying sha ni e, n teng n man ai hku n’na, Mung shawa Dap shawa ni a ningtsa e jahkrit shama rim grit, zing ri, sat ai lam hku n’na, mung shawa yawng a gawng malai tai ai KIO/ KIA Ginjaw committee rai nga ga ai nga n’na yin la n’na, shaning 40 jan lam woi shadam ai kata kaw Amyu shada, hka bra lam hte n ni n hkri si-hkrung si-htan, woi shabyin ai tara hkam KIO/ KIA Ginjaw Salang n kau mi a hpang matut hkan nga na malai jasan jaseng, shading sharai la na madaw grau n mai a ni?, Ngu n’na ngai Sara N’hkum Doi La kaw n’na lawu na hte maren teng man ai lam hpe n’dau shabra dat n’ngai rai.

2004 ning June 23 ya KIO/ KIA Ginjaw a n teng n man n’dau shabra laika hta Sut Du Bawmwang La Raw hpe KIO a Je Bat Hpyen No 1 ngu masat let, Du Kaba Lasang Awng Wa, Du Kaba Hpauyam Tsam Yan, Du Kaba Badip Gam Awng hte Rev. N’hkum Doi La ni gaw KIO/ KIA ahkang aya daju hpe zing la n’na, Myen Hpyen Atsuya woi galaw hkyen ai National Convention de n sa na hku galaw na, KIO/ KIA hpe Kachin National Organization/ Kachin National Army, KNO/KNA, ngu galai kau na masing ni re ngu mara rim n’dau shabra dat ma sai.

N’dai lahta na masing hpe 2003 ning September 27 ya Miwa Gumsan mung Hpyin Yang mare na Hwa Yi manam jarawp hta Htinggrum zuphpawng galaw n’na, bungli hpang wa ai re nga n’na KIO n’dau shabra laika hta mara shagun da ma ai. Bai n’na Du Kaba N’ban La hte Du Kaba Lazing Bawk hpe mung magra kau na ginshan yaw sa wa ai nga n’na n teng n man ai hku n’na, KIO Ningbaw malai Hpauyam Tsam Yan, Du Padip Gam Awng, N’hkum Doi La ni hpe rim gyit n’na htawng bang sai. Mung shawa Dap shawa kata lam hpe n chye ai ni a man e, sari raw jahpoi ahpyak mara shagun di n’na masu shapoi shabra dat masai.

2004 ning September 27 ya Miwa mung Hpyin Yang mare Hwa Yi manam jarawp e hkrum zup Jahta ai hta, Bawmwang La Raw, Du Kaba Lasang Awng Wa, Du Kaba Zau Tang, Du Kaba Sumlut Gun Maw, Du Kaba Zau Nan, Slg. Kaba Layawk Awng, N’hkum Doi La hte Du Jum Htingyat Naw Lawn ni dung lawm ma ai. Dai zuphpawng hta shanglawm ai ni a bawng ban tsun shaga ai lam ni gaw;

Bawmwang La Raw; Du Kaba N’ban La hte Du Kaba Lazing Bawk yan a n shawp n kap ai lam hpe Ginjaw salang ni yawng chye nga ma ai hte, n ra sharawng mat ma ai. Dai majaw Ningbaw Kaba Tu Jai hte mung, kata lam atsawm sha hkrum ngut sai. “N’dai yen hpe jahkring kau na lam sha nga sai” nga n’na Ningbaw Kaba tsun ai. Dai shaloi ngai mung “gram ra ai hpe lawan gram saga” ngu yang, Ningbaw Kaba Tu Jai mung si mani ai ladat hte galaw ga, nan hte mung kata lam bungli galaw magang manu nga sai.

Bai n’na Tingnyang Up Malai Zawng Hra hte mung hkrum jahta yu yang myi prwi pru wa ai. Shi tsun ai gaw “ngai gaw hkamja lam n nga mat ni ai. Dai majaw myit ru ra ai baw gaw hkum tsun dan mi. Awng dang hkra sha galaw mu. “Myithkrum lawm na n’ngai” nga ai. Kaga Ginjaw salang Du Kaba Gam Shawng, Du Kaba Lahpai La hte kaga ni yawng mung grai madi shadaw ma sai.

Du Kaba Sumlut Gun Maw; Du Kaba Lazing Bawk hte majan mung rau shang yu sai. Ram ai ngu n’na ngai n mu lu n’ngai. Dai majaw shapraw kau, shara htawt sit kau tim mai ai.

Du Kaba Lasang Awng Wa; Nanhte hpyen du manang ni grai ahkyak ai. Yawng myit hkrum n’na sha galaw ga, ngai chyawm gaw jin jin sha re.

Bawmwang La Raw; Ningbaw Kaba hte Ginjaw salang ni gaw, Du Kaba N’ban La hte Lazing Bawk hpe n ra sai gaw teng sai. N’dai yen hpe sit kau yang KIA a Chief of Staff hte Vice Chief of Staff gaw kadai bai matut na, Chief of Staff hpe chyawm ningbaw wa naw gan yu tim mai ai.

Du Kaba Sumlut Gun Maw; Anhte Hpyen Dap a htung hku nga yang Senior hku rai ra ai majaw Du Kaba Awng Vice Chief of Staff rai ra sai.

Du Kaba La Sang Awng Wa; Bungli hkrak shang ga nga jang gaw Dap Nawng na Du Kaba Hkun Seng hte Dap Up ni hpe mung chye na hkra tsun dan zin lum ra na re. Langai ngai ningbaw tai n’na lit la ga.

Du Kaba Zau Tang; Ningbaw Kaba hte Ginjaw ting pyi myit hkrum sai sha nga jang gaw dai gaw hpa n yak sai. Hpang na lam sha atsawm woi awn sa wa na she ahkyak ai. Dai shaloi yawng gaw “Du Kaba Zau Tang ningbaw rai nu ga. Du Kaba Lasang gaw Ningtau, nan lahkawng ra ai lam yawng woi awn sa wa ma nu.”

Bawmwang La Raw; Mung masha hpe zinlum na hte tang madun ra ai lam ni hpe Sara Doi La, Slg. Kaba Layawk Awng anhte masum lit la mat wa na saga ai.

Du Kaba Sumlut Gun Maw; Bawmwang hpe mung shara mi hta gaw lit la ra na re, Council Ningbaw malai zawn re hkan tim mai ai nga sai.

Matsing; Ya ten mung masa ahkyak ai. Dr. Tu Ja hte Du Kaba Gauri Zau Seng hpe Wunpawng Mungbawng Rapdaw de wa na hku, tang madun yu na hpe yawng myit hkrum.

Bawmwang La Raw; Ngai pyi bungli shang na rai jang gaw Sara Doi La hpe mung shara mi kaw bang ga. Shing n rai, Amu Madu malai zawn re kaw tim mai nga ai nga yawng yawng mung mai ai lam tsun ai.

N’hkum Doi La; Ningbaw Kaba nan ahkang jaw ai, Ginjaw committee yawng mung myit hkrum ai she rai yang gaw, mung shawa gaw kabu gara jin jin rai na re. Simani ai hku awng dang hkra galaw ga. Mung shawa shang lawm ai KIO rai wa nu ga law ngu n’na bra wa saga ai.

N’dai zuphpawng gaw Ningbaw Kaba Tu Jai a ahkaw ahkang hte bawng ban shangun ai zuphpawng re. Tsaw ra Nu Wa mungchying sha ni hte Ramma ni e, she madat yu mu, lai sai ten na Ginjaw manghkang gaw n’dai zuphpawng kaw n’na hpang wa ai re nga n’na mara jaw ma ai. N’dai zuphpawng hta K.IO/ KIA hpe zing la ga nga kadai tsun a ta? Lawm nga a ni? N.C a lam kadai tsun a ta? KNO/ KNA a lam bawng ban lawm a ni?

Ginjaw a woi awn daw dan ai hku n’na gram sharai mat wa na hta shang garum lawm na hta lai n’na hpa mung n tsun ga ai. Mung shawa shang lawm mai na hku tang madun na gaw bawng sa ga ai. Raitim dai gaw mara kaba re ngu mai tsun na a ni?

Hwa Yi manam jarawp, Htinggrum bawngban hpawng kaw n’na ningpawt re nga n’na gaw mara rim: Dai zuphpawng kaw n lawm ai Ningbaw Malai Tsam Yan, Du Kaba Badip Gam Awng ni hpe hpa majaw rim ai rai? Dai zuphpawng kaw anhte yawng 8 re. Hpa majaw saw shaga n’na dung lawm ai ngu ai Doi La hpe sha rim ai rai?

Du Kaba Zau Tang, Du Kaba Gun Maw, Du Kaba Zau Nan hte Du Jum Naw Lawn ni gaw Du Kaba N’ban La, Ningbaw Kaba Tu Jai hte KIO Ginjaw salang ni man e, arawng aya sharawt hkrum n’na myi man pa nga lu ai gaw hpa lachyum rai ta? Ginjaw zing hkyen ai, KNO, N.C nga ai masu shiga ni gaw kadai kaw na jep la lu ai rai ta? N’ban La hte Lazing Bawk yan hpe kaja wa magra kau na matu daw dan ai gaw Ginjaw committee ni rai nga ai.

Ginjaw Commission Salang Ni Ngai Hpe Jep Ai Lam

Salang Kaba Zawng Hra, Dr. Tu Ja, Du Kaba Gauri Zau Seng, Du Kaba N’gan Zau Hkum, Sara Kaba Sumlut Gam, hte Du Jum N’ja Naw Rip ni ngai hpe jep ai shaloi, Sara nang Ninggawn Amu Madu galaw hkyen ai nga re ni? KIO/ KIA hpe zing kau n’na KNO, KNA ngu mying galai kau n’na shara kashun la na laika hpe Dr. Tu Ja madun ai. JLH jawngma ni a Ninghkap laika hpe madun ai. Sara nang Hpyen gasat na matu Nawng E Hku nawku jawng wang kata kaduk htu da n’dai da.

Ningbaw Malai Tsam Yan gaw mung shawa mying dut n’na, mung shawa n’sen laika ka bang ai nga n’na sakse n nga ai mara tam masu n’na ngai hpe jep san ai lam galaw ma ai. JLH ni a ning hkap laika mung Du Kaba Gun Maw, Du Kaba Gam Shawng hte Dr. Tu Ja ni a matsun ai hte ka ai re lam Salang Naw Htun Awng hte manang ni tsun ai.

2004 ning January 17 hta Ginjaw Commission ni jep n’na Ginjaw e naw rai nga yang, nye n’ta de Du La Tsaw hpe shangun dat n’na, Asak 90 re nye a chying hkai Wa hte ma kaji dik ai asak 3 ning re ma ni hkrai nga ai ten n’htum n’ni di jahkrit shama, N’htu shaw n’na du kanyet dan, “Na wa hpe Ginjaw e sat kau na hku rai sai” ngu jahkrit, mare de na Slg. N’bwi Naw Seng hte Sar Labya Petaru yan sa wa ai hpe mung sanat kadun hte lahtan e madi tawn n’na sat kau na hku jahkrit, ma kaji kaba yawng hpe n’ta nhku de gawt bang, Dat si jaw n’na yawng hpe nat sat kau na ngu bai galaw, Maw Daw workshop jak rai ni hpe bawm galaw jak re ngu tam sawk kajam di ya ma ai. De hpang asak 90 re nye Wa gaw ngai htawng rawng hkrum ai hpang 2 ya na yang machyi kaba hkrum n’na tsi rung kaba de du mat wa, asak 3 ning re ai ma Tang Gun mung numla dam, kajawng n’na shata 4 tup machyi n’na, Myitkyina tsi rung kaba du mat wa, hkrap ngu hkrap ngoi hte n’ni n’hkri lam n’ta ting hkrum sha ai, n’dai zawn re matse labye lailen hpe kadai wa hkam lu na ga ni?

Kani Ya Mying Hte Sari Raw Ya Ma Sai

Ngai gaw nye a hkamja lam shingdu labau nau n kaja ai majaw, kani mung loili lang ai. Shata mi hta 2 lang ju sha chyam yu, lu yu di ai lam hpe grai hkrit kaya let lang lai wa yu ni ai. N’dai zawn re ai shingdu labau hpe ahkaw ahkang la n’na htawng rawng ra ai hpang jahpawt e htawng kata e Miwa shat grai ja ai katsi katsang hpe sha hkrup n’na sai pru ai hte re machyi kaba hkrum mat wa ni ai. Dai shaloi Tsi Sara ni hpe shana ya na matu Du La Mai hpe shaga shangun sai. Tsi Sara ni du sa wa n’na tsi htu tsi jaw, mak-kalawng mung grai sawng nga ai majaw sara langai mi hkut lajang ya ai majaw 4 ya na ai hte mai mat ni ai.

Tsi Sara ni n’gun tsi bang ya ai hpang jahpawt ngu na hta, n’sen grai ngoi n’na htawng chying hka hpe hpaw dat ai hte yu dat yang htawng sin ai Du La Mai shawng shang wa ai. De hpang Video Camera hpai ai, Photo Camera hpai ai ni mung shang wa ai.

De hpang ngai kaw bai 2 lang ngu na Video Camera hpai ai wa gaw, “Sara e anhte a myit hte galaw ai n re ga ai. Ningtsa na Ginjaw salang ni matsun ai she re. Ningtsa na amying hte maren kani n lu ya yang grau laja ai ai ari hte matut je yang hkrum ra na re, she lu u nga n’na Tawba n’dum hte kani hkat-pung pa matep kaba langai jaw masai. Ngai mung grai myit yu n’na, hkap la ni ai. De hpang yup ku ningtsa e, kani ya hkrang hte hkrak lu dan na hku amying bai jahkrat ma sai. Raitim ngai gaw dai kani htung hking madang hpe n hkap la ai sha dung n’na lahkawng lang chyup let, wan hkut shamawng ya ni ai. Dai shaloi Video Camera, Photo camera hte atsawm sha gayet la n’na, dai kani Tawba hkat pung, ngam ni yawng bai la n’na pru mat wa ma sai. Dai shaloi nye a myit hta, mungkan ningtsa n’htang hku hkawm ai zawn ngu hkam sha ai hte dagam dala ga hte akyu grai lang hpyi ni ai, “si hkrung si htan e! KIO, Ginjaw ni a ningtsa e madun nu law…tsi shamai la n lu ai baw ana ahkya e! n teng n man ai gumshem ni hte hku nga mu law, n’dai ni hkrat sum mat na matu, n kaja ai masu magaw wenyi e myit shaja ya n’na lam shadam kau u law. Teng man ai lam gaw Karai Kasang a man e a kajawng sha dan dawng wa nu ga law” ngu ni ai.

Htawng Na Shapraw Ai Shani 27-5-2004

2004 ning May 27 ya hta ngai htawng na bai dat wa sai. Ngai rim da hkrum ai ten hta KIO Tara rung kaw n’na jahkrit dat ai gaw aming ni gaw, Si a Ri, Prat Htawng hte tinang mungdan, buga na gawt shapraw kau na ngu ai ni re.

Raitim, Kachin Independence Council, KIC, kaw n’na awm dawm mara raw laika ndau dat sai majaw, tsep kawp mara raw sai, dai majaw KBC de ap dat ya sana nga ma ai rai. Langai masat dat ya ai gaw, tinang n’ta, bat 2 hkring sa hkring la n’na, masat ya ai shara Ding dung de, Dabak hka, Gara Yang mare, Manmaw maga de, Nam San hka n’dai lapran e sha nga lu na. N’ta masha kaji kaba yawng htawt mat wa mu nga, Amying hte tsun dat ma ai. Ya buga du wa n’na bat 2 tup hkring nga ai laman matut n’na asak hta naw tsang ra na tai ai majaw hpaji jaw ai ni a ga hta hkan n’na an Nu Wa ni yawng Pang Wa de koi yen mat wa ra saga ai.

Ngai Myit Yu Ai Lam

KIO/ KIA Ginjaw ni shanhte a matsat shabat mara magap lu na matu Sara Doi La hpe rim ai gaw KNO/ KNA mying hte Ginjaw zing n’na shara la hkyen ai, NC hpe ning hkap ai, Jinghpaw Gumsan Mungdan gaw gap hkyen ai hte Myen Hpyen Atsuya hte la da ai simsa lam hpe jahten ai ngu n’na ndau shabra ai.

Bai n’na htawng kata e adip arip di jahkrit n’na, Kani lu shangun, Video photo sumla ni dem la rai, KBC de mung shiga shabra ai sha n ga, Du Kaba N’ban La shi nan, Laiza mare kaw mung, Sam mung, Manmaw, Lidu lam, Uru Seng maw du hkra hpung up N’hkum Doi La kani ya kaba re ngu hkaw tsun hkawm sai. Dai ni gaw hpa baw a myat lu la ma sai kun? Kaja wa, ngai Sara Doi La, kani lu ai kadai mu ma ai kun? Ngai Kani ya re Lam kadai sakse nga a ta?

Ning rai sari sadang hpe, n teng n man ai hku shahpoi ya ai nye a Hpung Up, Sari Sadang aya hpe, Aming hte jahkrit shama n’na, Hpung de na ni hpe dawm kau shangun ai, ngai jamjau nga yang, hpung sara n’kau mi, matsat shabat salang ni maga tsap n’na, hkan kabu lawm ai, ru hte nawng lap hte brawng zingri gawt hkrum sai. Kadai wa hkam lu na rai ta?

Tsaw ra ai Nu, Wa, Ramma ni, n’dai gaw ngai hpe galaw ai n rai sai Karai Kasang hpe roi ai lam hte K.B.C hte buga Nawku Hpung hpe mung roi sha hpang wa ai lam rai sai. Ngai hpe shanhte a masing hte maren sat kau lu ai lama rai yang “Mung shawa, Dap shawa yawng gaw hkrup sha u ga nga hkan kabu lawm na n rai ni? N’ban La hte manang ni kani ya kaba tai n’na, Mung shawa man e n gawn n sawn lu dan ai sha n ga, kani hpraw, Ya Ma tsi hkyep shapraw n’na amyu hpe jahten ai hpe gaw kaning jawm di ai baw rai ta? Ngai N’hkum Doi La a lam gaw mung shawa hpung masha ni chye nga ai. KIO/ KIA ni sakse hkam ya n ra ai.

Lahta na ga ngau gaw N’hkum Doi La a ningmu hte shi tsun ai mahkrum madup lam ni sha rai n’na, The Kachin Post a ningmu ni n re ai lam chye shangun mayu ga ai.