Langji U

N’hkum Dut

August 4, 2004 — Langji U e pyen yu su. Anhte a ji woi ji wa ni gaw Jinghpaw Wunpawng myu sha ni mungkan pinra kaw prat chyanat grin sa wa lu hkra sari sadang mi arawng, myi man mi apa rai n’na shakut wa lu masai rai nga ai. Dai rai yang dai ni na anhte prat a shawng lam gaw gara hku rai wa na kun! Langji U e pyen sagawn yu n’na naw tsun dan yu rit.

N’dai prat dep ten hta Jinghpaw Wunpawng sha ni galai shai wa ai hpe jut shagu kaw tsap n’na yu dat yang; makam masham lam hta nawku jawng hpan langai kaw na hpan 2,3,4,10 nga n’na law htam wa ai hte maren shada ninghkap hkat ai lam mung grau kaba wa ai rai yang dai ni na ten hta hpung kade law htam wa nga sai kun? Sut masa lam hta sut du langai sut su nga mai wa jang grup yin kaw na jawm manawn ai majaw anhte Jinghpaw Wunpawng amyu kaw sut du kaba Bawmwang La Raw hta lai n’na madang tsaw ai sut du rai npaw pru yu ai rai nga ai. Rawtmalan hpung hpe yu dat ai shaloi hpung langai paw pru wa ai hpang ningbaw ningla arawng aya marit ai hpyen du ni law htam wa ai majaw dai shanglawt du ni gaw uhpung kaji ni hku hka garan pru wa ai zawn, hpung ningbaw ni mung law wa sai. Tinang gaw ningbaw langai byin tai wa lu na matu uhpung ningnan n chye gumhpawn la ai ni gaw grin nga sai uhpung kaw lam dingtawk hte ningbaw tai wa lu na matu lajang la nga ma ai nga n’na Laiza mare na gumgai langai dinglik wa ai rai nga ai.

Langji U e atsawm dinglik yu u. Uhpung dai daram law ai rawtmalan hpung ni gaw hpyen wa hpe gasat nga ma ai kun? Shanhte shada mahtang gyam sat hkat nga ai hpaji hte hpyen wa hpe gawai ai hku madi shadaw nga ma ai kun? Hpyen wa n lu sat ai hpe shada sat hkat jang she si ai…ngu ai gaw teng ai kun? Ningbaw Kaba Lahtaw Zau Seng, Slg. Pungshwi Zau Seng, Du Kaba Lahtaw Zau Tu ni hpe kadai sat kau ai kun? Simsa lam lu wa na matu shakut ai Ningbaw Kaba Malizup Zau Mai kaw na arawng aya gashun la na matu shingdu kaw hpaji daw ai wa gaw hpyen wa rai kun? Dai ning January shata hta KIO a daru magam zing hkyen ai wa gaw kadai rai kun? KIO ginjaw kaw ahkyak ai zuphpawng wa lawm na matu saw shaga dat ma ai majaw, myitsu salang n’kau hte ramma n’kau gaw myu tsaw lam hte seng ai rai na re, nga n’na myit la ai hte kalang ta rawt sa wa masai. Hpang jahtum e gaw shingna shatai katut ai re lam chye kau ai hku rai nga ma ai. KIO du Lazing Bawk hpe mung tinang shada sat hkat jang she si mat ai hku rai nga ai.

Dai zawn rai galaw lu na wa gaw, ja gumhpraw n’gun sha n ga, myu tsaw myit mung madun lu ai wa rai ra ai. Ja gumhpraw hte myu tsaw myit madun lu ai wa gaw shingdu kaw nga ya ai hte masha wunawng wuwa gaw shawng de lit la ya ai rai nga ai. Dai zawn re ai hpaji hte Bawmwang La Raw gaw, Du Kaba Tsam Yan, Du Kaba N’ban La, Du Kaba Lasang Awng Wa, Du Padip Gam Awng hte Sara Doi La zawn rai arawng aya marit nga ai ni hpe shingna shatai dat ai hte shi yaw shada nga ai bungli kaba awng dang wa n’na rawtmalan hpung kaw zang ayai dat lu sai rai nga ai. Matut n’na Sut du kaba wa a hpaji hte New Democratic Army-Kachin, NDA-K, Du Kaba Zahkung Ting Ying gaw Du Kaba Lasang Awng, Du Padip Gam Awng, Sara Doi La ni hpe hkap zinlum la n’na Jinghpaw Wunpawng myusha ni shada shamyit hkat na matu Lasang Awng Wa a hpung ni hpe hpyen la lahkawn ya nga ai lam, hpyen la ni hpe shata shabrai shata mi Yuan 700 du hkra jaw na matu n’dau nga ai majaw ndai ten hta hpyen la 800 daram lu lahkawn tawn sai lam Pang Wa mare masha ni tsun nga ma ai.

Bawmwang La Raw gaw Yunnan mungdaw kaw hkawm sa ai shaloi Miwa mungdu ni gaw sut du kaba wa hpe grai a’hkyak tawn ma ai majaw Miwa masha kaba ni nan shi a hpang kaw hkan makawp maga let shim lam hkan jaw ya ma ai. Miwa hpyen la ni hpe shi a Kachin National Army, KNA, dazik shakap ya n’na Jinghpaw mungdan hpe zing la lu hkra gasat lawm na lam, dai zawn rai zing la lu jang Miwa mung masha ni hpe Jinghpaw mungdan kaw sa nga shangun na matu bawng jahkrup myit hkrum tawn masai lam, chye lu ai. Dai hte maren Bawmwang La Raw gaw India Atsuya ni hpe mung, a’hkyak ai lam ni garum hpyi tawn sai lam, gumhpraw sha lu jang gaw, ra sharawng ai hpa mung galaw mai ai lam Pang Wa mare kaw shiga shabrawng nga ma ai lam tsun kahte nga masai rai nga ai.

Raitimung, Maija Yang mare kaw na mying n tsun ai salang langai a ningmu hku rai yang, Miwa Atsuya a mungdan shim lam gaw grai ngang kang ai majaw Bawmwang La Raw tsun ai lam gaw n teng na re. Kaja nan tsun ai rai yang mung, shingdu na Miwa Atsuya a policy n rai na re. Lamu ga jarit mayan hkan na lit hkam n’kau sut du kaba kaw na gumhpraw gan maw sha la ai she rai na ma ai. India ni mung Miwa hte maren she arai na ma ai. Madung gaw ramma ni hpe hkalem la n’na gan katset sha hkyen ai she arai na ma ai. Ramma ni matsan mayen she rai sai nga n’na tsun wa ai rai nga ai.

Ningtsa kaw tang madun dat ai lam gaw anhte Jinghpaw Wunpawng hpu nau ni kadai raitim myit yu ging ai lam she rai na re. Aten galu hta maram wa yu ai shaloi, amyu a matu myitsu myit gawp ai ni gaw tinang a amyu ni hten run wa na lam n’galaw ma ai. Bawmwang La Raw hpe mara tsun ai mung n rai na re. Tinang a myu sha ni hta byin wa na ruyak tsin yam kaba ni hpe tau n’na yen kau lu na matu shada a ningmu garan kachyan galaw ai hku n’na yaw shada ai hte ka dat ai lam sha rai na re. Hpa majaw nga yang Bawmwang La Raw galaw sa ai lam gaw tinang a amyu ni rawt jat wa lu na matu yaw shada ai she rai na re. Lama shi gaw akyu rawng ai lam yan hpe lata lang lu ai rai yang, kadai hpe mung jahten sharun ai lam n galaw ai sha, Jinghpaw Wunpawng myusha ni a yaw shada ai pandung de kabu gara ahkum ara du shajang lu na mahkrun hpe mahtang lata lang ra na re ngu mayu ai.

Lai wa sai ten hta Bawmwang La Raw hku n’na daru magam zing ai hta lahkawng lang kahtap n’na jai lang wa ai masha gaw, madung hku n’na Du Kaba N’ban La hte Du Kaba Lasang Awng yan rai nga ai. Dai Du Kaba lahkawng yan a shingdu lam hpe Jinghpaw Wunpawng sha ni yawng chye nga ai hkrai rai n’na, kadai mung shan woi ningbaw ai hpe madi shadaw ya na masha gaw n nga na ma ai. Du Kaba N’ban La gaw mungkan ting e jawm ninghkap nga ai nanghpam malu masha a majaw shi KIA hpe uphkang wa ai shani kaw n’na uhpung a mying hpe jahten sharun nga ai lam na chye lu nga ai. Du Kaba Lasang Awng gaw nanghpam malu masha sha ai hta n’ga, masha ni a madu jan law law hpe gashun la n’na roi rip kau sai lam tsun nga ma ai. N’dai zawn rai tsun shadan shadawng ai gaw kadai hpe n ju n dawng ai majaw n rai na re.

Bawmwang La Raw gaw hpang de lama ma bai galaw na matu yaw shada nga ai rai yang, Jinghpaw Wunpawng myu sha ni law malawng madi shadaw ai myitsu salang ni hpe lata lang ai rai yang gaw sut du kaba a yaw shada ai pandung de du wa lu n’na mung masha ni yawng a matu mung akyu ara kaba lu na re ngu ai shawang myit hte tang shana dat n’ngai rai. Langji U e, tengman ai lachyum dan dawng hkra shiga htawn shana ya rit yaw.

Lahta na ningmu hte tang madun ai lam ni gaw ka shalat ai wa N’hkum Dut a mu mada ai lam ni sha rai n’na, The Kachin Post a ning mu ni n re ai hpe chye shangun mayu ga ai.