Myusha Yawng a Yawn Hpa N’htoi

Namhtum Pahtau

November 22, 2003— Myen mung dan Hpyen Asyu ya kawn 2004 ning praw hta woi galaw na National Convention hta Wunpawng Mundan Shanglawt hpung KIO hte New Democratic Army NDA-K hpung ni shang lawm na matu jin jin rai nga ai. N’dai shiga hte maren du na ra ai ten hta galaw na National Convention de dai hpung ni a dat kasa ni sa lung shang lawm ai n’htoi gaw Wunpawng amyu sha ni yawng a matu labau hta yawn hpa n’htoi langai rai sai ngu mu mada n’ngai.

NDA-K hpung hpe gaw hpa wa mi nau n kam tsun ni ai. Hpa majaw nga yang, ndai hpung gaw Myen hpyen du ni hte ‘Htani Htana Simsa lam’ la dai hpung re ai majaw Myen hpyen du ni ra ai hku hkan galaw ra ai hpe chye na ga ai. Ngut na NDA-K gaw mung masa mying mi la hkra raitim, mi shawng shawng na nan hpaga ai hpung langai hku na nga mat sai re majaw mung masa lam hta tang du hkra lu galaw na n shadu ga ai.

KIO a shang lawm ai lam hte seng n’na mung tinang wuhpung langai a dawdan ai lam hte shamu mashawt ai lam hku n’na shang lawm ai rai yang gaw grai wa aja awa shingdang tsun ninghkap na lam nga na n re. Raitim, sawn yu na lam gaw, mi shawng shawng gap hkat jahkring na tsun hpang ai kaw na nan KIO ningbaw ni hpe “Kachin Amyotha Gaungsaung Mya” ngu ai hku Myen hpyen du ni shamying tawn ai. Hpa majaw ndai hku shamying a ta? Ndai lam hpe KIO ningbaw ni mung chye chyalu rai na sai.

Ya ten hta dai zawn re ai rapdaw zuphpawng de amyu sha yawng a gawng malai tai n’na sa du dung lawm, mung bawng dawdan lawm na matu KIO hpe Wunpawng mung shawa hku n’na ra sharawng let shatsam tawn ai lam nga sai kun?

KIO hku n’na tsun ai gaw National Convention hta shanglawm na dat kasa ni gaw Wunpawng Myusha Rapdaw (Kachin National Consultative Assembly) kawn laiwa sai bat hta lata da sai nga ai raitim mungchying sha ni ra lata da ai lam n re ai hpe mu lu ai. Hpa majaw nga yang ya lata da ai dat kasa 10 gaw KIO hte NDA-K na ningbaw ni hkrai sha rai nga ai. Ngut na Myen Hpyen asuya mung myusha yawng a malai hku sa du na dat kasa hpyi ai n rai nga ai. Shi hte gap hkat jahkring da ai Myen mung ting na myusha hpung ni hpe dat kasa 5 hpra dat ya na matu hpyi ai rai nga ai.

Myen Hpyen Asuya a National Convention hpe Thai hte Miwa Gumsan mungdan hta lai n’na Mungkan ting mung Myen hkap la madi shadaw ai lam n’nga hpe mu lu ai.ai raitim dat kasa ni gaw i hpe chye na ga Dai re majaw National Convention de shang lawm bawng ban ai a marang e Wunpawng sha ni yawng a matu hpabaw akyu lu la na hpe mu mada lu ai kun?

Wunpawng mung shawa a shatsam ai lam n nga ai rai yang, “Wunpawng Amyu Sha a Gawng Malai” hku n’na n rai ga ai, KIO wuhpung hku sha sa ga ai, ngu ai lam hpe n’dau shabra nhtawm sa yang grau kaja htap htuk na re. Dai zawn rai ai lam hpe galaw na KIO hta n’den n rawng mat sai kun?

KIO hku na mala la shoi chyum let, tinang wuhpung a grin lam hte shim lam hpe makawp maga ra ai majaw n’dai zawn re ai bungli shajan ni galaw ra ai madang rai yang mung, hpoi yawm magang wa sai sari hpe magap na matu matut n shakut nga sai sha rai na sai. Mung shawa yawng a a’kyu a’ra hpe madung tawn let, “N mai byin saga ai” ngu sari nga nga yin hkam la let lam mahkrun matut tam na matu chyinghka hpaw saga ngu mayu n’ngai.

Shing n rai ndai zawn Myen Hpyen Asuya a hkam la ai lam hte shamu shamawt ai lam hpe tup hkrak kam sham ai rai yang mung kadai hpa tsun na lam n nga sai. Rai tim, a’sak a’rang, sai a’rang shaw lai mat wa sai myutsaw share shagan ni a a’sai, asak hte ka, makawp lai mat wa ai KIO mying n gun sai sha, mung masa wuhpung mying langai la n’na Myitkyina zawn re ai mare hta rung hpaw la n’htawm a’manu sha rai wa shamu shamawt yang mai na re.

Mungkan a aten masa, mung masa hte ginra masa galai mat wa ai majaw KIO a shamu shamawt masa mung galai ra ai re nga n’na mahtai jaw ai gaw hkap la mai ai lam re. Raitim, masa galai ai ngu ai gaw ‘strategy’ ladat galai ai she re. Pandung ‘Goal’ hte yaw shada ai lam ni ‘Aims’ galai wa ai gaw masa galai ai lam n rai nga ai.

Dik n’na, mung shawa masha yawng a ra sharawng myit hkrum ai lam a majaw ‘Goal’ galai na nga yang KIO a mying mung galai ra na re. Shawng shawng ningpawt ninghpang kaw na nan, mung shawa a ra sharawng ai lam hte hpaw hpang wa ai n re, ngu ai hku hkap la yang gaw, ya dai ni mung “Mung Shawa” a mying gang na lam n nga na re.

Myen Hpyen Asuya a ladat amyu myu hku n’na dip katut, roi katut ai pyi grai ram la sai. Dai majaw nanhte KIO ni Wunpawng shada masu hkalem, amyu a mying dut sha nna “Hka hta Marang jat” ai baw gaw n galaw ga, aja awa tawngban hpyi shawn mayu n’ngai.

Myen Hpyen Du ni hpe shanhte Myen amyu sha ni pyi n ra ma ai. Shanhte dinghku nta masha ni pyi n ra ai ndai Asuya hpe KIO ni hkan achya nga ai ngu ai gaw KIO a mying sha n rai sai, anhte myusha yawng a arawng sadang hpe shagrit kau ai lam nan rai nga sai. Shagri n kung ai amyu jahpan shang mat na gaw teng sha rai nga sai.

Ngai mu mada ai daram nga yang Hpyen Asuya a aten gaw grai kadun magang wa sai. Aten kadun wa sai, nsa hti wa sai re majaw kadau kadap rai nga ai wuhpung hta nanhte KIO ni n sa gumpye bang ai sha, tinang a sari hpe ngang ngang manat let aten ladaw hpe la ai rai yang kade n’na yang yawng ra sharawng ai mahtai lu na re. Shing n rai KIO hku nna “Shawa masha yawng gaw anhte hpe Myen Hpyen Asuya hte langai sha hku mu mada sai majaw shawa ahkaw ahkang lu wa ai aten hta jeyang hkrum chyalu re ngu myit la let SHANANG saga” ngu ai hku rai mat sai kun?

Lahta na ningmu ni gaw Namhtum Pahtau a ningmu ni sha rai n’na The Kachin Post a ningmu ni n re ai lam hpe chye shagun mayu ga ai.