Myutsaw Sai ni KIO de Bai Wa Mayu The Kachin Post / February 24, 2007
February shata praw hta Gwi Htu pa na Lasang Awng Wa a KIO hpung kawn gara pru wa ai Myutsaw Sai Hpung na malawm ni gaw kanu Wunpawng Mungdan Shanglawt Hpung, KIO, de bai wa mayu ai lam, dai hpung a n’dau shabra laika hku chye lu ai.
“A nhte myu tsaw sai hpung ni gaw moi n nan kaw n’na ya du hkra grin nga ai Kanu Kawa rai nga ai K.I.A (K.I.O) de mara yin la let bai wa na hpe myu sha ni chye na hkra n’dau shabra dat ai,” ngu n’na The Kachin Post kawn hkap la lu ai Myutsaw Sai Hpung a n’dau laika hta mu lu ai.
Myutsaw Sai Hpung ni gaw 2004 ning KIO ginjaw hta byin ai manghkang a hpang Du Kaba Lasang Awng Wa n pu kaw magam gun wa ai hpyen ma ni rai ma ai. Raitim, Lasang Awng Wa a moi shi jahkrat tawn ai masing masa hte ya shi jai lang wa ai masa ni shai wa nga ai hpe garam mayu ai majaw 2007 ning February 10 ya kawn bungli hpang wa ai re lam chye lu ai.
Kaichyang du Gam Hpang ningbaw ai Myutsaw Sai Hpung a rawt galai ai masing hpe Lasang Awng Wa gaw shi hpe gyam sat ai re ngu masat let, Myutsaw Sai Hpung a ningbaw hte marai 12 hpe rim jep n’na mara jaw tawn sai rai nga ai. Myutsaw Sai Hpung ni hku n’na gaw n’dai lam n teng ai hte, shanhte galaw mayu ai gaw Lasang Awng Wa a Wunpawng uhpung kata kaw amyu sha ginghka ai masa hte Myen hpyen du ni hte shi hkrai jahkrup n’na lak nak jahkrat let, jarit sin Balik dap hku nga mat na hpe n ra sharawng ai majaw re lam, Myutsaw Sai n’dau laika hta mu lu ai.
Ngam nga ai Myutsaw Sai Hpung malawm ni a KIO de bai wa mayu ai lam hte seng n’na, KIO Zai Ninggawn Dap na Du Kaba Gun Maw gaw, “kaga hpung kaw manghkang n nga na bai shang wa ai ni hpe gaw hkap la mai ai raitim, manghkan byin n’na shang wa mayu ai ni hpe gaw, myit yu na re” ngu The Kachin Post de tsun wa ai.
Myutsaw Sai Hpung a yaw shada ai lam gaw Wunpawng Mungdan Shanglawt Atsuya langai sha byin wa na hpe myit mada yaw shada ai lam, chye lu ai. Anhte myu tsaw sai hpung ni a yaw shada lam gaw Wunpawng Mungdan myu sha ni tsawra ai asak rawng ai K.I.A, Asuya langai sha byin wa na hpe myit mada let yaw shada ai lam,” n’dau laika hta mu lu ai. “Wunpawng myu sha ni a man hta sagu hpyi hpun ai jahkyawn zawn sakse n hkam gwi ai.”
