Laiza kaw Masha Rim
The Kachin Post / January 31, 2007

Myen hpyen atsuya kawn hkan shachyut rim nga ai masha langai hpe Laiza mare kaw Wunpawng Mungdan Shanglawt Hpung, KIO, kawn rim da sai lam, Laiza shiga lawk hku chye lu ai.

Rim hkrum ai masha gaw Ko Ko Naing ngu ai wa rai n’na, January 27 ya hta Laiza mare kaw rim katut lam chye lu ai. Myen hpyen atsuya gaw Ko Ko Naing ngu ai masha hpe Myen mung kata kaw bawm kapaw ai lam ni hta lit nga ai wa re ngu hkan rim hkawm nga ai rai nga ai.

“Ko Ko Naing Laiza de du ai nga ai majaw KIO kawn rim ya ai. Raitim, Myen hpyen atsuya rim mayu ai Ko Ko Naing n re ai,” ngu Laiza mare masha langai tsun ai. Ya rim hkrum ai Ko Ko Naing gaw Union Solidarity Development Association, USDA, na malawm langai rai n’na motorcycle dut shalai nga ai wa re lam chye lu ai.

Matut n’na mung, Myitkyina mare de Myen Jawngma Dap, ABSDF, kawn bawm kapaw na matu masha dat da ai ngu ai shiga ni a majaw, mara n lu ai masha tsawmra myi hpe rim da ai lam, chye lu ai. Myitkyina nga ABSDF jawng ma dap hte ni nawn ai ni hte jinghku ni hpe mung rim jep nga ai lam, chye lu ai.

Myen hpyen dap a matsun hte maren KIO kawn masha ni jep rim nga ai majaw, ABSDF hte Myen hpyen atsuya hpe ninghkap nga ai Myen mung masa hpung ni Laiza kaw shamu yak mat sai lam, ABSDF malawm langai tsun ai.

Ya ten hta Myen hpyen uphkang ai ni Myitkyina mare shimlam shagreng tawn n’na, n tsen ai masha ni hpe hkan tam jep nga ai lam chye lu ai. Myitkyina na Mali Hka mahkrai kaw mung aging jep sawk nga ai lam chye lu ai.