Jinghpaw Arai ni Gat Lawk hta Amyat N lu
September 26, 2006

Lahpai Zau Gam

Myitkyina mare hta Jinghpaw Bu-Hpun-Palawng ni hpe da dut nga ai hpaga madu ni gaw, n’dai laman hta miwa ri manu rawt mat wa ai majaw gat lawk hta amyat n lu wa ai lam, Myitkyina gat lawk shi ga hku chye lu ai.

August shata htum kawn Myen mung de shang wa ai Miwa rai ni hpe Myen uphkang ai ni hku n’na hkan rim nga ai majaw Miwa rai ni manu rawt mat ai rai nga ai. Dai hta Miwa mung na ri hpe lang n’na Jinghpaw Bu-Hpun-Palawng arai ni hpe da dut nga ai ni matu gat lawk hta tinang a arai ni hpe dut ai shaloi sum nga ai lam, chye lu ai.

“Moi de Miwa ri 1 lb hta Kyat 26,500 raitim, ya gaw Kyat 33,500 du hkra manu rawt mat sai,” ngu Myitkyina na Jinghpaw Bu-Hpun-Palawng ni hpe da dut nga ai Jinghpaw hpaga madu langai tsun ai. Miwa ri ni hpe manu hpu ai hku mari lang ra nga tim, Bu-Hpun-Palawng ni hpe moi na manu hte maren sha dut ra nga ai majaw amyat n lu ai sha n nga, sum nga ai lam, shi matut tsun wa ai.

Grau n’na gaw, Shwe Bo, Seik Hkun, Wan Dwin zawn re Myen mung lawu ga na htaw dut nga ai labu ni hte gat lawk kaw shingjawng n’na dut ra ai majaw, Jinghpaw labu ni hpe manu sharawt n mai ai lam, chye lu ai.

Myitkyina kawn htuk shapraw nga ai Jinghpaw Bu-Hpun-Palawng ni hpe Myitkyina mare sha n nga Yangon, Mandalay zawn mare kaba ni hkan mung dut nga ai rai nga ai. Dai hta, num Bu-Hpun-Palawng law malaw hpe Myitkyina kawn Yangon de htaw dut ai rai nga ai.