Zahkung Ting Ying Ja Tawng ni Dut Sha Nga
September 21, 2006

Lahpai Zau Gam

New Democratic Army-Kachin, NDA-K, ningbaw Zahkung Ting Ying gaw shi a Ja tawng manu mana hpe dut sha nga ai lam, Pang Wa shiga lawk hku chye lu ai.

Joi mi daram nga ai Ja tawng ni hpe Miwa lauban ni kashun kashe mari nga ma ai hte manu tsawm ra jaw ai lam, Pang Wa mare masha langai tsun ai.

Hpa majaw Ja tawng ni hpe dut sha nga ai hpe hkrat n chye tim, dai ning na laman NDA-K a shang gumhpraw moi na zawn n lu wa ai majaw rai na re ngu, mare masha ni shadu nga ma ai.

Zahkung Ting Ying a NDA-K hpung gaw 1989 ning Myen hpyen dap hte simsa lam la ngut ai hpang kawn Jinghpaw mung na n’hprang sut rai ni hpe kam ai hku shaw dut sha nga sai rai nga ai.

Raitim, Zahkung Ting Ying gaw n’hprang sut rai ni kaw na lu ai akyu amyat ni hpe uhpung uhpawng a matu n re sha, Miwa ni hte pawng n’na tinang a dingkeng akyu ara matu malawng jai lang ai lam, NDA-K kawn garan pru mat ai Layawk Ze Lum a hpung ni gaw mara shagun da ai rai nga ai.