Laja Yang kaw Hpara De Ngut
September 13, 2006

Lahpai Zau Gam

Wunpawng Mungdan Shanglawt Hpung, KIO, uphkang ginra Laiza mare a deng 5 daram tsan ai Laja Yang na Myen Hpyen Dap makau kaw Buddha Hpara langai de ngut sai lam, mare masha ni kawn chye lu ai.

N’dai Hpara gaw de ai aten hta Nalung mare masha ni hpe manu jahpu n jaw ai sha, atik anang shagun n’na gaw de wa ai rai nga ai. Hpara de ai shaloi lang na wut hte n’lung ni hpe mung mawdaw la ni hpe gumhpraw pyek mi pyi n jaw ai sha htaw shangun ai lam chye lu ai.

Buddha hpung masha pyi n nga ai Laja Yang kaw Buddha Hpara de ai hte seng n’na grai myit yu shara nga ai lam, Laiza mare na Jinghpaw la langai tsun ai.

Laja Yang kaw Buddha Hpara de ai gaw makam masham masa a majaw n re ai sha, KIO uphkang ginra hta hpyen masa hku n’na zai ladat shaw na matu masing masat galaw ai ga sha re ngu, KIO magam gun langai tsun ai. “Laja Yang kaw Hpara sa de ai gaw anhte KIO uphkang ginra kata de majan je wa ai ga sha re,” mying n tsun ai KIO magam gun wa tsun ai.

Hpa majaw nga yawng, moi Karen mung kaw mung n’dai zawn Bum shagun ngu na daram Buddha Hpara de let, majan kasat ai shaloi ningtsa kawn asan sha mu mada lu hkra galaw lai wa sai lam, KIO magam gun wa matut tsun ai. Ngut na, Wa ginra hkan Myen Hpyen dap kaw de ai Buddha Hpara ni hkan mung dai ginra hpung nem na matu num arai ni hpe Hpara de ai shaloi bang n’na gaw de ai lam, shi tsun dan ai.

N’dai zawn Jinghpaw mung hta Buddha Hpara law law gaw de wa ai lam gaw, Lahta Myen mung Dap Up Du Kaba Ohn Myit wa Jinghpaw mung de sa du uphkang wa ai aten kawn rai nga ai. “Jinghpaw mung de du wa yang, mare shagu hkan Yesu a Udang hkrai mu nga ai, anhte mung mare shagu hta Buddha Hpungki sum la ni gaw da ra sai,” ngu Ohn Myit wa Myitkyina kaw galaw ai zuphawng langai hta tsun matsun wa ai.