Miwa Rai ni hpe Rim Nga
September 12, 2006

Lahpai Zau Gam

Miwa Gumsan mung na Miwa rai ni hpe Jinghpaw mung hte Sam mung kata htaw shalai nga ai lam ni hpe Myen Hpyen Dap kawn aja awa hkan rim nga ai lam, jarit shiga lawk hku chye lu ai.

September 9 ya hta Laiza mare kawn Hilux mawdaw 5 hte htaw wa ai gun rai ni hpe Man Maw mare kaw rim kau ya ai rai nga ai. N’dai Miwa rai ni gaw Myen gumhpraw sen 500 jan manu dan ai lam, rim hkrum ai Hilux mawdaw la langai tsun dan ai.

Matut n’na mung Myitkyina hta Miwa rai ni zing tawn ai dabang ni hpe mung hkan rim nga ai lam, Myitkyina mare masha langai tsun ai. Dai sha n nga, Myitkyina na Aung Mye Thit lawk hta mung Miwa Telephone ni hpe hkan rim nga ai lam, dai lawk na Telephone rim hkrum ai Telephone madu langai tsun dan ai.

Dai hte maren, Sam mung hta mung September 7 ya kawn Muse maren kawn Kuthkai, Lashio, Nam Hkam de shalai nga ai Miwa rai ni hpe rim nga ai lam chye lu ai. N’dai zawn Myen Hpyen Atusuya kawn Miwa rai ni hpe hkan rim nga ai majaw, arang kaji kajaw hte Miwa rai htaw shalai nga ni matut amyat n lu ai sha n nga, jam jau nga ai lam chye lu ai.