Mungsa La a Myit Dum Akyu Pyi Galaw
September 12, 2006

The Kachin Post

Mongko Defense Army, MDA, a ningbaw Mungsa La a myit dum akyu pyi poi hpe September 9 ya hta Lashio mare na shi a madu jan a dum n’ta kaw galaw ai lam, shi jinghku ni kawn chye lu ai.

Mungsa La gaw Rahkine mung Buthi Tawng mare na htawng kaw Myen Hpyen Atsuya a rim rawng da ai laman August 24 ya hta Madu Yesu hta yup pyaw mat wa sai rai nga ai. Shi hpe 2001 hta byin ai Mungko mung masa manghkang ngut ai hpang Myen Hpyen Dap kawn rim mat wa ai rai n’na, prat htawng jahkrat kau hkrum ai rai nga ai.

2001 hta byin ai Mungko mang hkang laman hta, Mungsa La gaw shi a ningtau Dap up Li Ne Min hte shada gap hkat wa ai majaw, Myen Hpyen Dap kaw shang hparan ai n’hkan e Mungko Defense Army ting hpe shamyit kau n’na, ningbaw law malawng hpe rim kau ai rai nga ai. Dai aten hta Myen Hpyen Du Brigadier General Myint Hlaing woi awn ai Dap kawn Li Ne Min hte Mungko Dap na hpyen ma marai 90 daram hpe kalang ta gap sat kau sai rai nga ai.

Mungsa La ningbaw ai Mungko Defense Army gaw, 1989 ning hta Myen Hpyen Dap hte simsa lam la n’na Mungko ginra hpe uphkang lai wa sai rai nga ai.