KIC Zuphpawng Hpungdim Dat
September 02, 2006

The Kachin Post

Wunpawng Mungdan Shanglawt Council, Kachin Independence Council, a 4 lang ngu na zuphawng hpe Laiza ginjaw kaw galaw nga ai hpe hpungdim dat wa sai lam, KIO shiga lawk hku chye lu ai.

August 23 ya kawn galaw hpang wa ai KIC zuphpawng hta Wunpawng Mungdan Shanglawt Hpung, KIO, kata na magam dap shagu a 2005-2006 ning ladaw hta galaw mat wa ai magam bungli ni hpe tang madun let matut galaw sa na lam ni hpe bawng ban ma ai lam, na lu ai. Raitim, n’dai zuphpawng hta KIO a mung masa policy hte seng n’na tsep kawp bawng ban ai lam n nga ai hpe chye lu ai.

N’dai zauhpawng hta magam dap 11 na seng ang ai Du, Salang ni shanglawm bawng ban ma ai lam chye lu ai. Raitim, magam dap shagu na 2005-2006 ning ladaw hta jai lang mat wa ai gumhpra (budget) ni hpe gaw n tang madun ai lam, zuphpawng hta shang lawm ai magam gun langai tsun dan ai.

Ya ten hta KIO a shang gumhpraw ni hpe Ginjaw Sut Masa Magam Dap, Central Treasury and Department of Finance, kawn tam n’na, seng ang ai magam dap de garan jai lang nga ai lam chye lu ai.

KIC zuphawng hpe September 2 ya hta jahtum dat na lam chye lu ai.