Motorcycle 40 Jan Myitkyina kaw Rim
Lahpai Zau Gam / October 25, 2006

Myitkyina mare na Mali Hka mahkrai Bala-Min-Htin kaw October 23 ya shana hta motorcycle 40 jan hpe rim ai lam, Myitkyina shiga lawk hku chye lu ai.

Motorcycle ni hpe Bala Min Htin mahkrai kaw rim n’na mawdaw hte Myen Hpyen Dap Dingdung Daju, Ma-Pa-Hka, de htaw mat ai lam, motorcycle rim hkrum ai Nam San Yang na ramma langai The Kachin Post de tsun dan ai. “Motorcycle hpe rim ai sha n nga, gumhpraw Sen mi chyen mung kahtap jaw ra ai majaw, anhte ni grai machyi ai,” ngu shi matut tsun ai.

N’dai lang na rim ai ni gaw Bala-Min-Htin makrai sin hpyen dap na n re ai sha, Ma-Pa-Hka na matsun hte rim ai re lam chye lu ai. Rim hkrum ai motorcycle ni gaw Nam San Yang, Laja Yang, Gang Dau Yang hte Wai Maw mare hkan na malawm re lam, chye lu ai.

October shata pra kawn Myikyina mare na motorcycle ni hpe Myen Balik hte Hpyen Dap kaw hkan rim nga ai rai nga ai.