Myen Hpyen Dap kawn KIO hpe Shamyit na Hkyen
The Kachin Post / October 17, 2006

Wunpawng Mungdan Shanglawt Hpung, KIO, kawn garan pru mat ai Lasang Awng Wa hpung hte New Democratic Army-Kachin hpe lang n’na KIO hpe sahte tam shamyit kau na matu Myen hpyen dap gaw masing kaba jahkrat nga ai hpe, KIO shiga lawk hku na lu ai.

KIO kawn lu la ai shim laika hta, mungdan simsa lam hpe jahten ai gaw KIO re lam, mungdan bawngring rawt jat lam ni gaw KIO a majaw tang du hkra n lu galaw ai lam ni ka da ai hpe chye lu ai. Dai mjaw KIO hpe gasat shamyit kau ra ai lam, chye lu ai.

N’dai masing gaw NDA-K hte Lasang Awng Wa hpung hku n’na KIO hpe lam amyu myu hku sahte tam let manghkang kaba wa ai shaloi, Myen hpyen dap kawn n’gun kaba hte KIO ting hpe gasat shamyit kau na matu hkrang shapraw sa wa matu hkyen lajang nga ai hpe chye lu ai.

Masing hta KIO uphkang ginra langai rai nga ai Ngwi Ngawn ninghtawn na KIO magam gun ni hte shanhte a dinghku yawng hpe dai giran hta n mai nga hkra lam amyu myu hku gawt shapraw n’na, shanang nga ai ni hpe mung rim na lam chye lu ai.

NDA-K kawn gaw Man Wing kaw na Man Dawng, Shangaw Mare (Chi Hpwi lam mayan) hte Sai Law, Law Mun, Sadung (Kampaiti lam mayan) hkan KIO ni tsep kawp n nga lu hkra, n shang lu hkra galaw na lam chye lu ai. Dai hte maren n’dai lam hkan lai-wa lai-sa galaw ai KIO magam gun ni hpe mung rim, gap sat na re lam chye lu ai.

N’dai zawn NDA-K hte Lasang Awng Wa hpung ni sahte tam na lam hpe KIO kawn matai htang wa yang Myen hpyen dap kawn shang gasat lawm na re lam, masing hta shalawm da ai hpe chye lu ai.

Myen hpyen dap kawn n’dai zawn re ai masing kaba hpe gyin shalat wa ai gaw, laiwa sai shata hta Mungkan Wunpawng Hpung a Shimlam Council, UNSC, kawn Myeng mung ningtsa jahkrat tawn ai policy hpe KIO kawn ninghkap ai lam n madun ai sha n nga, Nyaung-hna-pin kaw galaw nga ai National Convention hta mung KIO dat kasa ni tang shawn da ai lam ni hpe Naitonal Convention convening committee kawn ningdang kau ai lam ni nga wa ai majaw re lam, mung masa maram dinglik yu ai ni hku n’na shadu nga ma ai.

Ya ten hta Yangon mare kaw KIO ningbaw Du Kaba Lanyaw Zawng Hkra hte ninggawn amu madu Dr. La Ja ni Myen hpyen atsuya ningbaw ni hte hkrum shaga na matut du nga ai hte maren, Nyaung-hna-pin kaw mung Dr. Tu Ja ningbaw ai KIO dat kasa ni National Convention lung nga ai rai nga ai.