KIO Shamu Shamawt ai hpe Myen Sin Yu Nga
October 15, 2006

Lahpai Zau Gam

Wunpawng Mungdan Shanglawt Hpung, KIO, Ginjaw Laiza ginwang hta KIO a shamu shamawt ai lam ni hpe Myen hpyen dap hku n’na sin yu shiga la nga ai lam, Laiza shiga lawk hku chye lu ai.

Myen hpyen dap gaw laiwa sai shata kawn KIO uphkang ginra na hpaga lam ni hpe pat, gunrai htaw shalai ai ni hpe rim rai galaw ngut ai hpang KIO a shamu shamawt ai lam yawng hpe ni kahtep ai hku sin yu wa ai rai nga ai.

N’dai hku sin yu ai lam hta Laiza mare kata hte shingan lahkawng maga hku n’na sin yu nga ma ai. Laiza mare kata de gaw Mawdaw sa tam ai zawn zawn, Motorcycle sa mari ai masha zawn zawn, hpaga la zawn zawn re ai jasam masha ni grai shang wa ma ai ngu, mying n tsun ai Laiza mare masha langai tsun ai. “Law malawng gaw Myen kaichyan ni hte shiga la na matu dat dat ai masha ni re,” ngu shadu ai lam shi matut tsun ai.

Dai hte Laiza mare shingan de gaw Laiza mare de pru-shang nga ai lam shagu hkan Myen hpyen la ni ladat amyu myu hku sin yu nga ma ai lam, Laja Yang hte Ja Hta mare masha ni tsun ma ai.

Laiza-Man Maw-Myitkyina de sa ai Lam nbraw rai nga ai Mung Lai Hka mahkrai hta Myen hpyen dap kawn dap bram gate ni jahkrat da ai hte maren, hpyen hking n hpun ai Myen hpyen la ni lam makau hkan sin nga ma ai ngu, Laja Yang mare masha langai tsun ai.

Laiza mare kawn Laja Yang de pru wa ai lam na Ja Hta mare makau na hkau na pa hkan mung hpyen hking n hpun ai Myen hpyen la ni sin dung nga ai lam, Ja Hta mare masha langai tsun ai. “KIO pru-shang ai lam ni hpe sin yu nga ai re,” ngu shi tsun ai.

Ya ten hta Dr Tu Ja ningbaw ai KIO dat kasa ni gaw Yangon mare Nyaung-hna-pin hta Myen hpyen du ni woi galaw ai National Convention hta shanga lawm nga ai rai nga ai.