Motorcycle ni hpe Myitkyina kaw Bai Rim
October 08, 2006

Lahpai Zau Gam

Myitkyina mare kaw October 6 shana kawn mu mamu motorcycle hpe hkan rim nga ai majaw mare masha ni myit n pyaw nga ai lam, Myitkyina shiga lawk hku chye lu ai.

Motorcycle ni hpe shana hking 5 kawn hking 8 du hkra Myen Balik hte hpyen dap pawng n’na rim nga ai rai nga ai. “Shana aten hta aging rim ai. Rim ngut ai hte kalang ta zing la kau ai,” ngu motorcycle rim katut ai Myitkyina mare masha langai tsun ai.

Rim hkrum ai motorcycle madu ni gaw tinang a motorcycle ni hpe ap ra ai sha n ga, tinang a myit hte maren mungdan hpe jaw ya ai re lam hpe ta masat mahkret shangun ma ai lam, chye lu ai. “N’dai gaw Myitkyina mare masha ni hpe dasang roi ai ga re,” ngu mying n tsun ai mare masha langai tsun ai.

Motorcycle rim ai lam hpe shani ka-ang hta gaw tsep kawp n galaw ai hpe chye lu ai. Shani ten hta rim ai lam galaw yang jawng lung nga ai jawng ma ni a motorcycle ni lawm mat chye ai sha n ga, jawng ma ni hte manghkang n kam byin ai majaw re lam, Myitkyina mare masha ni tsun dan wa ma ai.

Ya ten hta Myitkyina mare masha ni gaw shanhte a zingla hkrum ai motorcycle ni hpe Myen uphkang ai ni hku n’na gara hku galaw na hpe myit shang sha nga ai lam hte, n’dai zawn motorcycle ni hpe maja zing la ai lam gaw mung masa hte mung matut manoi nga na re ngu shadu nga ma ai.