Loije Hpaga Lam Hkraw Nga
October 07, 2006

Lahpai Zau Gam

Jinghpaw mung Man Maw mare kawn deng 54 tsan ai Loije ga jarit hpaga yumga lam zim mat ai majaw, Miwa mung na hpaga la law malawng gaw jarit hpaga lam bai hpaw na hpe la nga ai lam, Loije na mare masha ni tsun ai.

Loije hpaga lam gaw laiwa sai shata htum kawn Myen hpyen dap hku n’na Laiza hpaga lam hpe pat kau ai hpang gau ngwi ngwi hkraw mat ai rai nga ai. Loije ga jarit kaw Miwa mung na gunrai ni sha n ga, Myen mung na gunrai ni htaw shalai nga ai lam yawng hkring mat sai lam chye lu ai.

“Hpaga lam hpa mung n nga sai. Myen maga na Ri kachyi kajaw hte Miwa maga na jak sau n’kau mi sha shalai nga ai,” ngu Man Maw-Loije kagat nga ai mawdaw la langai tsun ai.

Loije ga jarit hta Miwa hkran na gate lahkawng hta Miwa atsuya magam gun ni nga tim, Myen hkran de gaw kadai mung n nga ai lam chye lu ai.

Loije ga jarit gaw Jinghpaw-Miwa ga jarit hta ahkayk ai hpaga lai lam langai rai n’na, Miwa mung na gun rai ni hpe Loije-Sinlum-Man Maw lam hku Jinghpaw mung de htaw shalai nga ai rai nga ai.