Nang Hpam Tsi Hpaga Laiza kaw Law Wa
October 06, 2006

Lahpai Zau Gam

Myen hpyen dap kawn Myitkyina-Laiza hpaga lam pat da ai majaw, Laiza nga mare masha ni gaw nga yak wa let nang hpam tsi dut-lu dut-sha ai hta grau shang lawm wa ai lam, mare masha ni kawn chye lu ai.

“Moi de mawdaw hpaga galaw ai ni, mawdaw work shop hpaw ai ni hte hpun hpaga ga ai ni yawng nang hpam hpaga galaw wa ma ai,” ngu mying n shadawng ai laiza mare masha langai tsun dan ai. “Hpa galaw sha na gat lawk mung n nga mat sai. Gun rai ni hpe pat, Hpun mung n pru mat, Casino mung bungli n byin mat ai majaw, hpaga lam hta grai chat wa ai.”

Laiza hta hpaga yumga gat lawk n kaja wa ai majaw, Nam Hkam na nang hpam tsi ni gaw Miwa mung Jie Gao lam hku Laiza kawn Myitkyina de du shang nga ai lam chye lu ai.

Nam Hkam kaw Ya Ma (methamphetamine) tsi tawng mi Myen gum hpraw kyat 400 gaw Laiza kaw du yang kyat 2,000 manu lu ai lam, No 4 kani hpraw palen mi Jie Goa kaw 1,1000 gaw Laiza du yang kyat 40,000 jan jaw ra ai lam, laiza mare masha tsun dan ai. Kalang lang rai kase mat yang 70,000 daram du hkra manu rawt mat ai lam, shi matut tsun dan ai. “Laiza kaw lani myi Kani hpraw palen 10 daram dut gyawm ma ai.”

Grau n’na gaw, Myen hpyen la dingsa law malawng mung Miwa mung de sa n’na nang hpam tsi hpaga hta aging agang shanglawm nga ai hpe, shi matut tsun dan ai.

Laiwa sai September shata hta Wunpawng Mungdan Shanglawt Hpung, KIO, a Kani pat jasan hpung hte Miwa mung Bejing mare na Kani pat jasan hpung a ningtau ningbaw hpe shi a hpung ni Jinghpaw mung hta Kani pat jasan na lam hte seng n’na bawng ban wa sai lam chye lu ai.