Namsan Yang na Mawdaw ni hpe Rim
October 05, 2006

Lahpai Zau Gam

Wai Maw mare na Myen Balik hte Naypyi Daw Balik ni gaw Namsan Yang mare masha ni a mawdaw ni hpe zing la nga ai lam, mare masha ni tusn dan ai. Mawdaw 10 hte mortorcycle tsawmra mi October 1 ya hta zing mat sai lam chye lu ai

Ya na zawn Namsan Yang na mawdaw ni hpe rim nga ai lam gaw, mare masha ni hte Wunpawng Mundan Shanglawt Hpung, KIO, hpe roi ai ga nan re lam, Namsan Yang na mying n tsun ai mawdaw madu langai tsun ai. Moi de Jinghpaw mung ting na License n lawm ai ‘Without’ mawdaw ni hpe rim tim, Namsan Yang na madaw ni hpe gaw n rim ai rai nga ai.

“Ya National Convention ni wa yang she hpaga yumga lam ni pat, mawdaw ni rim re ai gaw anhte Jinghpaw mare masha ni hpe roi ai ga re,” ngu Namsan Yang na mawdaw madu tsun ai. Namsan Yang mare gaw Laiza mare a Sinna maga deng 8 daram tsan ai shara kaw nga ai rai nga ai.

N’dai zawn mawdaw ni hpe n’dai aten hta rim wa ai mung October 10 ya hta Myen hpyen atsuya woi galaw hkyen nga ai National Convention ni wa ai majaw, KIO uphkang ginra hkan shayak sha ai re ngu, mare masha ni kam nga ma ai.

Matut n’na mung, September shata htum kawn Laiza hte Laja Yang mare hkan mung hpaga lam pat, mawdaw ni rim rai galaw nga ai majaw Jinghpaw mungchying sha ni nga yak jam jau nga ai lam chye lu ai.