Myen Hpyen Dap kawn Lasang Awng Wa Hpung hpe Garum Nga
October 04, 2006

Lahpai Zau Gam

Myitkyina Sinpraw hkran Gwi Htu kaw daju jung da ai Du Kaba Lasang Awng Wa a Hpung hpe Myen hpyen dap kawn garum jaw nga ai lam, dai ginra de du hkawm wa ai masha ni tsun dan ai.

Lasang Awng Wa a hpung gaw hpyen n’gun marai 100 daram nga n’na, G-3 hte M-21 sinat yawng 40 daram hpe lang nga ai lam chye lu ai. G-3 gaw Myen hpyen dap kaw lang ai sinat rai nga ai.

Gwi Htu ginra hta gaw kaga hpaga lam nau n’nga ai re majaw, Myen ni jaw ai Gala Shpre hpe sha ration shatai nga ai lam, dai gin ra de ga ai mying n tsun ai Mawdaw la langai tsun dan ai.

Ngut n’na Gwi Htu ginra de du wa ai n tsen ai masha ni hpe mung rim jep nga ai lam chye lu ai. “Anhte KIO kaw na n re ai ngu tsun tim n mai ai. Nanhte KIO kaichyan n re i nga n’na gayet ai, aging agang gayet ai,” ngu rim jep ai kawn bai lawt wa ai Kawlin mare na Myen langai tsun dan ai. Jep ai shaloi mung nanghte gaw Myen hpyen dap hpe ninghkap ai ga re i ngu ai ga san hpe jahkring hkring sa san ai lam, shi matut tsun dan ai.

Ya ten hta Lasang Awng Wa Hpung gaw Wai Maw mare na Myen Hpyen Dap masat 321 hte bungli jawm galaw nga ai lam chye lu ai.

Lasang Awng Wa gaw 2004 ning January shata KIO ginjaw hta byin ai manghkang a hpang KIO kawn garan pru mat wa Zahkung Ting Ying a New Democratic Army-Kachin ginjaw hta 2004 ning htum du hkra shingbyi nga ai rai nga ai. De hpang, Myitkyina Sinpraw hkran na Wa Shawng mare makau na Lawa Yang kaw shanu wa let, ya ten hta gaw Gwi Htu kaw daju jung let shamu nga ai rai nga ai.

Lasang Awng Wa gaw moi de KIO a amyusha shimlam hte kaichyan dap a lit hkam langai rai nga ai.