Myitkyina kaw Myihprap Wan Lu na Yak
October 02, 2006

Lahpai Zau Gam

Galu kaba ai mungdan hkan myihprap wan hpe aten tup n hkring-n sa jai lang nga ai ten hta, Jinghpaw mung Myitkyina mare hta gaw myihprap wan hpe mare ting n lu lang ai majaw shana ten hta ningsin chyip rai nga ai lam chye lu ai.

Ya ten hta, Wunpawng Mungdan Shawnglawt Hpung, KIO, madu ai Ja Hta myihprap wan jak hte Myitkyina mare hpe wan bai jaw na matu shakut nga tim, myihprap wan n lu shi ai lam, mare masha ni tsun ai. Hka-n’gun-lang Ja Hta myihprap wan jak gaw 2006 ning May shata hta Mawru hta lawm mat wa ai Chyinghkrang myihprap wan jak a malai hku n’na mare ting hpe wan jaw na matu masing jahkrat galaw nga ai rai nga ai.

Raitim, meter box hte myihprap wan sumri shakap ya ai lam hta aten htingnut nga ai majaw ya ten du hkra wan n lu shi ai re lam, chye lu ai. Myitkyina na myihprap wan engineer Win Tin tsun yang, meter box hte wan sumri ni hpe August shata praw kawn shakap hpang wa sai rai n’na, ya ten du hkra n’ta 500 daram hpe shakap ngut sai lam chye lu ai.

“Shanhte meter box ni shakap ya na nga tsun ai na sai, raitim ya du hkra tinang a wan jak hpe sha lang ra nga ai,” ngu Myitkyina mare masha langai tsun ai.

Ja Hta hka-n’gun-lang myihprap wan jak hpe 2004 ning kawn 2006 ning laman KIO lit la n’na gaw gap da ai rai nga ai. N’dai hku gaw gap ai hta Jinghpaw myihprap wan engineer Bawm Ying madung dat shanglawm n’na, Miwa mung na myihprap wan a’rai ni lang let gaw gap ai rai nga ai.