Laiza kaw Manam Jep
The Kachin Post / November 30, 2006

Wunpawng Mungdan Shanglawt Hpung, KIO, ginjaw rung jung ai Laiza mare hta sa du tam sha nga ai manam jahpan ni hpe n’dai laman jep nga ai lam, Laiza mare masha ni tsun ai.

Laiza na KIO uphkang salang ni gaw November shata 21 ya kawn Laiza mare na manam shap sha ai n’ta madu ni a mungchying sha lek mat ni hpe jep hpang wa sai rai n’na, manam ni hpe mung jen jep yu n’na she shap na lam matsun wa ai hpe chye lu ai.

Laiza maren hta Myen mung shara shagu de na sa du ai Myen amyu sha law law nga ai rai nga ai. Dai Myen ni gaw mawdaw work shop, hpa lap seng, dum n’ta gap garam ai bungli hkan n’chyang galaw let sa du nga ai ni rai ma ai. Myen law malawng gaw Laiza hta shata mi Myen gumhpraw lap 500 jaw nga ai ni re lam, chye lu ai.

Ya na zawn Laiza mare hta manam ni hpe jep sagawn wa ai gaw, Myen kaichyan ni Laiza mare de shang shamu na hpe hkum pat mayu ai majaw galaw ai KIO a masing langai re lam, Laiza mare masha ni tsun ai.

November shata praw hta Laiza mare kaw Miwa Telephone lang n’na phone shaga seng langai hpe dai Miwa Telephone ni kawn Myen hpyen dap de shiga shalai nga ai re ngu n’na, dai seng hpe rim pat kau ya ai lam chye lu ai.

“Mungchying sha lek mat jep, Manan jahpan jep ai hte sha gaw chye lu na n re, Myen kaichyan ni gaw rung tu ai n re majaw yak ai,” ngu KIO magam gun usa langai The Kachin Post de tsun ai. “Tinang a kaichyan dap hpe atsawm sha shagreng da ai sha n rai yang gaw Myen kaichyan ni shamu ai lam hpe chye lu na yak ai.”