Simsa Lam hpe Jahten N mai; KIO Tsun
The Kachin Post / November 25, 2006

Wunpawng mungdan Shanglawt Hpung, KIO, gaw Myen hpyen atsuya hte myit hkrum tawn ai simsa lam hpe dingbai dingna jaw ai kadai hpe mung ahkyak la na lam, KIO uphkang salang langai tsun ai.

N’dai lam hpe November 18 ya Laiza mare kaw galaw ai mung shawa zuphpawng hta Salang kaba Labya Tang Gun tsun shaga wa ai re lam chye lu ai. Laiza mare masha ni hte Laiza kaw sa du tam sha nga ai masha marai 500 jan lung ai zuphpawng hta, Myen hte gap hkat jahkring da ai lam, Simsa lam hte buga gaw sharawt ai lam ni hpe madung dat tsun bawng ban ai lam chye lu ai. Matut n’na, simsa lam la da ai laman Jinghpaw mung hte Laiza ginra hta galu gaba wa ai lam ni hpe mung tsun bawng ban ai lam chye lu ai.

KIO gaw 1994 kaw Myen hpyen dap hte gap hkat jahkring lam la n’na, Jinghpaw mung kata hta buga gaw sharawt ai lam hpe madung dat galaw nga ai uhpung langai rai nga ai.

Myen hpyen dap hte gap hkat jahkring da ai 12 ning laman hta buga hte mungchying sha ni rawtjat wa hkra galaw nga ai ngatim, anhte Jinghpaw Wupawng mare masha ni lata hta hpa mung n nga mat sai lam, dai zuphpawng hta sa du lawm ai Jinghpaw salang langai tsun ai. “Anhte galaw sha na Yi, Hkau Na ni pyi masha ni lata de du ma sai,” ngu matut tsun ai.

Simsa lam hpe jahten na gaw Myen hpyen dap kawn lai n’na gadai mung galaw lu na n shadu ai lam, dai zuphpawng lung ai KIO magam gun langai tsun ai. KIO a ayan na asum hkam ai policy ni a majaw, Jinghpaw mung hta mung chying sha ni a hpaga gat lawk ni mat ai, mung shawa ni a buga ginra ni sum ai, dai sha n ga KIA hpyen dap hta mung hpyen ma ni a myit jasat dumbri dumbra rai wa ai ngu, KIO magam gun wa ding lun ai hpe chye lu ai.

Myen hpyen dap hte KIO gap hkat jahkring tawn ai 12 ning laman hta simsa lam hpe dingbai dingna jaw ai ni hpe ahkayk la na lam shawa hpawng hta tsun shaga wa ai gaw shawng ningnan lang rai nga ai.