Lung Seng Hpaga Galaw ai Jinghpaw ni Jam Jau
Lahpai Zau Gam / November 10, 2006

Myen Hpyen dap kawn Jinghpaw mung kata hta Lung Seng kaji kajaw dut sha nga ai ni hpe tara n shang n’lung dut sha ai ni re ngu masat let hkan rim nga ai majaw, Lung Seng hte kan bau bungli gala ai Wunpawng sha ni jam jau nga ai lam, Lung Seng hpaga La langai tsun ai.

“Ya Hpa Kant, Seng Tawng hta n’hkrun kasha htu ai ni hte Yae-Ma-Sae n lung dut sha ai ni galaw sha grai yak mat sai,” ngu Jinghpaw Lung Seng hpaga La tsun ai.

N’dai hku byin wa ai gaw Myen hpyen dap a U-Pai company hte malawm company ni kawn pru-mapru Lung Seng yawng hpe shahte company de sha sa dut mai ai hku galaw da ai majaw rai nga ai lam chye lu ai. U-Pai hte matut manoi re ai company ni gaw Lung Seng manu grai shagrit jaw ai majaw shingan de dut sha ai Lung Seng ni hpe mung tara n shang ai ngu n’na hkan rim ai rai nga ai.

“Lung Seng n’hkrun kasha htu ai ni mung n nga mat sai, pru ai n’lung ni hpe mung shingan de kachyi pyi n mai dut mat sai,” ngu dai hpaga La wa matut tsun ai. Nam kaja n’na, manu dan ai Lung Seng ni lagyim lam hku Miwa mung de du mat tim, U-Pai company kawn Miwa hte jahkrup n’na, tara n shang n’lung ngu masat let bai zing la kau ai lam chye lu ai. Dai sha n ga, manu nau n dan ai Lung Seng ni hpe pyi n ngam hkra hkan rim nga ai rai nga ai.

“Ya Hpa Kant nga Jinghpaw Lauban n’kau pyi tara n shang Lung Seng maigan de dut sha ai majaw hprawng hkawm taw ra sai,” ngu Lashio mare na Lung Seng hpaga galaw ai Jinghpaw langai tsun ai. “Anhte Wunpawng sha ni hpe Myen hpyen dap kawn nga yak hkra galaw ai ngu shadu ai.”

N’dai laman hta Myitkyina na Lido lam mayan hte Wai Maw mare kawn Miwa mung de sa ai lam hkan Lung Seng ni hpe hkap rim nga ai lam chye lu ai. Lai wa sai bat lahkawng daram hta Myitkyina mare shingan Nam Koi Hka mahkrai lahta kaw Htaw-La-Gyi hte htaw shalai wa ai Lung Seng joi 200 jan hpe rim n’na, Lung Seng madu Jinghpaw langai hpe mung rim da ai lam, chye lu ai.

Myen hpyen dap kawn tara n shang Lung Seng ngu n’na hkan rim nga ai majaw, Jinghpaw mung na Lung Seng hte kan bau bungli galaw sha nga ai Wunpawng amyu sha ni matu jam jau wa ai sha n ga, tinang madu ai Lung Seng ni hpe rim kau ya ai majaw hpaga sum n’na, n’ta ni, sun ni dut sha kau ra ai grai law wa ai lam chye lu ai.