Myitkyina na Ya-Ya-Ka ni hpe Garam Hkyen
Lahpai Zau Gam / November 03, 2006

Myitkyina mare na Lawk madan uphkang salang, Ya-Ya-Ka malawm yawng ngu na daram hpe bungli kawn jahkring let masha ning nan ni hte galai bang na matu hkyen nga ai lam, Myitkyina shiga lawk hku chye lu ai.

N’dai masing gaw Myen hpyen atsuya a Myen mung ting na mare ni hkan galaw nga ai masing langai rai n’na, n’dai ten hta Myitkyina mare de ang wa ai rai nga ai. Dai hte maren Myen hpyen dap kawn mare masha uphkang salang ni hpe uphkang daru magam ap ya na mawn nga ai ngu ai shiga shadam ni mung mawng pru nga ai lam, chye lu ai.

Ya kalang bai bungli ap ya na lamang hta, Ya-Ya-Ka rung chyare hpe seng ang ai Lawk Tingnyang Up kawn bungli ap na ahkang n nga sai rai n’na, Mungdaw uphkang du ni kawn dan tawk lata n’na bungli ap na re lam, Ya-Ya-Ka hte ni nawn ai Myitkyina mare masha langai tsun ai.

N’dai lam lam hte seng n’na Ya-Ya-Ka magam gun ningnan ni lapran hta shada n tsen hkat nga ma ai lam chye lu ai. “Lachyum nan n pru ai. Rung chyare ngu ai rung hte ni kahtep ai hku nga n’na rung bungli hpe kang ka ai hku galaw ra ai majaw anhte kam ai masha hpe ap mayu ai,” ngu ya hte sha ningnan lata hkrum ai Ya-Ya-Ka magam gun langai tsun ai. “Ya gaw mung daw kawn Ya-Ya-Ka chyare ni hpe ding tawk bungli ap na re majaw anhte lapran kaw kaichyan sa tawn da ai hte bung ai.”