Zung Ki a Show Galaw
May 19, 2006

Uma Brang

Yu ngwi shadang Galau Zung Ki gaw shi a yungwi magam prat 16 ning hpring masat ‘Live 16’ yungwi pinra hpe May 18 ya shana hta Myitkyina Manau wang na Majoi Gawknu hta galaw ai lam chye lu ai.

N’dai yungwi pinra hta Jinghpaw Wunpawng yungwi ninghkring 22 mung shanglawm ai rai n’na, yungwi hte lakap n’na kanbau bungli galaw nga ai marai 600 jan hpe saw shaga da ai kaw na law malawng sa du ai lam chye lu ai.

“Tinang a matu sha laksan galaw ai n re sha, yawng a matu kaja wa akyu rawng na lam de rawt jat galaw mayu ai majaw re,” ngu Zung Ki The Kachin Post de tsun dan ai. Yungwi ninghkring ni shada da zin lum wa na hte myit lawm ai yungwi shayi/shadang ni hpe n gun jaw lu na matu hte grau grau n’na Wunpawng myusha yungwi mahkawn ni madang tsaw ai hte ngang grin rawt jat wa na matu yaw shada let “Live 16” yungwi pinra hpe galaw ai re lam Zung Ki matut tsun dan wa ai.

‘Live 16’ hta yungwi shayi ni hku n’na N’hpan Ja Ra, Maling Hkrudu, Kumje Ja Nu, Wadu Pri Lum, Minzai Lum Naw, Kareng Kai Din, Shanghting Hkam Htoi, N’hkum Hkam Lung, N’chyang Hka Ja, Galau Hkaw Win, Yup Seng Ing rai n’na, yungwi shadang hku n’na gaw Lachyit Yungwi, Lahtaw Zau Ding, Mangki Hkawng Lum, Myitung Tang Nau, Maran Seng Naw, Galau Ting Luk, Gawlu Brang Shawng, Labang Doi Wawm, Lasham Hka Li, Lazing Htoi Din ni shanglawm ma ai. N’dai poi hta shangwi shapyaw ai mahkawn yawng a 80% gaw Galau Zung Ki a mahkawn ni rai nga ai.

Poi lamang hta Yungwi sha n ga, ka manawt hkrang shalat ai lam hpe Kcastz hpung kawn shangwi shapyaw ai rai nga ai. Sara Jingchyaw Yaw Ying hte N’hkum Kun Mai ni mung lak san yungwi shangwi shapyaw ai lam hpe galaw ma ai.

Zung Ki a ‘Live 16’ yungwi pinra hpe manu jahpu n jaw ra ai (Free Show) hku galaw ai rai n’na hpang de VCD gayet shapraw na lam chye lu ai.