Amyu a Prat hte Hip Hop Mahkawn Na
March 27, 2006

Uma Brang

Jinghpaw Wunpawng amyusha labau hta shawng ningnan lang na Jinghpaw hku mahkawn da ai Hip Hop Album hpe ramma ni lapran hta garai ra sharawng let madat hkam sha nga sai lam chye lu ai.

“Aw Le Le” ngu ai mying hte shapraw ai Jinghpaw Hip Hop Album hpe Zaw Seng Awng (Gu Gu) hte D.D Gam Maw (Maw Maw) yan madung lit la gyin shapraw ai rai n’na, Awng Lar (Soul) hte Ja San Lu ni garum mahkawn da ai rai nga ai. Hip Hop Album a matu mahkawn ni hpe M. Jaw Gun (Soul), Awng Lar (Soul), Maw Maw hte Ah Nut ni ka shalat ai rai nga ai. Maw Maw, Gu Gu hte Awng La ni gaw asak 20 ning daram re ai ramma ni rai ma ai.

“Nye a prat madang hpe ngai sharawt, amyu a prat madang hpe ngai shatsaw,……amyu a prat hte Hip Hop mahkawn na,” ngu mahkawn da ai Aw Le Le Album hta mahkawn buk 9 lawm ai rai nga ai.

N’dai zawn madang dep, prat dep ai aten hta anhte Wunpawng amyusha ni mung Hip Hop mahkawn hpe hkrang shala ra sai ngu yaw shada myit mang ai lam ni a majaw majaw Aw Le Le hpe shapraw byin wa ai lam, Maw Maw tsun ai. Aw Le Le byin pru wa lu na matu Sara Ja Gun (Soul) hku n’na woi awn galaw ai rai n’na, Sara Maran Htoi San (Sut Ngai Buga) hku n’na ra ai gumhpraw ni hpe garum ya ai lam chye lu ai.

Aw Le Le hpe Cassette Tape hte CD amyu lahkawng hku dut shabra nga ai rai n’na, Cassette Tape 2,000 galaw da ai yawng ma wa sai lam hte CD ni hpe mung maigan de dut shabra nga ai lam chye lu ai. Tape lu dut ai lam hpe n’gun grau lu ai lam Maw Maw tsun ai.

Aw Le Le gyin shalat ai hta aten shata myi daram jaw ra ai lam hte hpang de Hip Hop yungwi pinra (Show) ni hpe galaw na masing nga ai lam, Maw Maw tsun dan wa ai. “Hip Hop myit lawm ai re majaw grau hkrak ai hku hkrang shala n’na, amyusha yawng a matu galaw shakut wa na re majaw, amyusha yawng a n’gun jaw ga hpe mung na mayu ga ai,” ngu Maw Maw tsun ai.