Amyusha Shawng Lam matu KNO Daw Dan
March 15, 2006

The Kachin Post

Jinghapw Wunpawng Amyusha Hpung, KNO, gaw lam shagu hta yak hkak jam jau hkrum nga ai anhte amyusha yawng a lawt lu lam matu lak lai ai masing kaba ni hpe daw dan sai lam chye lu ai. N’dai lam ni hpe March shata prawt 8 kawn 10 ya du hkra Thai mungdan Chiang Mai mare kaw galaw ai KNO zuphpawng hta daw dan ai rai nga ai.

KNO hku n’na Munghpawm Myen mung dan hpe Confederation gawgap ai hta shang lawm na lam, Kachin National Army hpe United Kachinland Army ngu ai amyusha yawng shanglawm ai hpyen dap hpe hpaw hpang sa wa na lam hte KNO hpe mung Pawng Yawng Amyusha Hpung ngu n’na galai shamying na lam ni hpe daw dan ma ai.

Moi de KNO gaw Federal Myen munghpawm gaw gap na hpe tek jum hkan sa nga ai raitim, shanhte a ninggawn pandung rai nga ai Shanglawt lu lam hte htap htuk ai Confederation munghpawm hpe galai shai hkap la ai re hpe chye lu ai. Confederation ngu ai gaw shanglawt lu ai mungdan ni hpawm chyawm gaw de da ai munghpawm re ai majaw Federal State zawn mungdaw ni hpawm chyawm n’na gaw de da ai munghpawm hta mung masa madang grau tsaw ai rai ng ai.

Chiang Mai kaw galaw ai KNO a 4 lang ngu na zuphpawng hta tinang uhpung a ningpawt ninghpang gaw da tara (constitution) hte uphpung a hkrang (organization structure) hpe ka jahkrat da sai lam chye lu ai.

N’dai zuphpawng hta, Du Wa Howa Ja La hpe KNO a Tingnyang Up, Du Wa Bawmwang La Raw hpe Ningtau Tingnyang Up, Dr. Lahtaw Naw Lawn hpe Ninggawn Amu Madu, Du Up Malang Brang Seng hpe Hpyen Dap Ningtau lit hkam hte Salang Mahkaw Hkun Sa hpe Maigan Kithkai Ningtau lit hkam hku n’na magam bungli ni hpe masat jaw sai rai nga ai.

Du Wa Howa Ja La hku n’na ahkyak ai magam dap lahkawng rai nga ai Hpyen Dap hte Maigan Kithkai Dap ni hpe lit hkam hku n’na tek jum na hpe mung chye lu ai. Du Wa Bawmwang La Raw gaw Dingrin Amu Gun (Cabinet) ningbaw hku n’na mung lit la na rai nga ai. Mung dan shagu na dat kasa ni gaw KNO a Ginjaw Committee malawm ni hku lit la na lam chye lu ai. Bungli galaw sa wa ai lam hta gaw Ginjaw Committee kawn daw dan jahkrat ya ai masing ni hpe Dingrin Committee kawn galaw sa na rai nga ai.

KNO ginjaw rung hpe Thai mungdan Chiang Mai mare kaw hpaw na rai n’na, Dr Naw Lawn kawn hku n’na aten tup rung dung let bungli galaw sa na lam chye lu ai.

N’dai lang na Chiang Mai kaw galaw ai zuphpawng hta America, India, Japan, Malaysia, Thai hte United Kingdom na KNO dat kasa marai 10 jan shanglawm ma ai.