Mai Ja Yang kaw Myen Shang
March 10, 2006

The Kachin Post

Wunpawng Mungdan Shanglawt Hpung, KIO, a uphkang shara langai rai nga ai Mai Ja Yang mare hta Myen hpyen dap Dingdung Ginjaw Du Kaba Ohn Myint hte hpung ni March 6 ya hta a’kajawng sha du shang wa ai lam, mare masha ni hku chye lu ai.

Myen Du Ohn Myint hte shi hpyen ma marai 30 daram gaw Mai Ja Yang mare de n’dai bat langai ya shana hkying 8 chyen daram hta mawdaw 6 hte du shang wa ai rai nga ai. Ohn Myint a hpyen hpung ni lak nak lang let, tau hkrau shana da ai lam n nga ai sha Mai Ja Yang de du shang wa ai rai nga ai. N’dai hpung hta Myen hpyen Du jan ni mung lawm ai rai n’na, shana hkying 10 daram hta bai wa mat ai lam chye lu ai.

De hpang shani, March 7 ya hta Ohn Myint hte shi a hpyen hpung ni kalang bai du shang wa ma ai. Ohn Myit wa du shang wa ai shaloi Mai Ja Yang mare na KIA Officer Brigade Commander wa gaw hpyen hkying pyi hpun n rau hkra rai n’na sa tau ai lam chye lu ai. Mare masha ni tsun ai hku rai yang, Ohn Myint gaw shi Mai Ja Yang gate shang wa mahka hta she Mai Ja Yang kaw du sai lam hte sa du chyai na re lam sha na ai rai nga ai. KIA hpyen la ni hku n’na mung shanhte a uphkang ginra de du shang wa ai Onh Myint hte hpyen hpung ni hpe lak nak zing ai lam n nga ai sha Mai Ja Yang de shang na ahkang jaw ma ai.

Matut n’na mung, March 8 ya hta Myen hpyen Du hpung ni KIO ginjaw jung ai Laiza Mare kaw du shang ma ai lam chye lu ai. Myen Du ni Laiza de n du shi ai shani kawn n’na, Myen hpyen Helicopter hte Laiza mare hpe shing grup gawan let, shimlam kinyu ai lam hpe mung chye lu ai. Shateng n lu ai shiga hku nga yang, Myen hpyen dap ni gaw Hpun rim masu n’na, KIO uphkang ginra ni hta hpyen Dap shara ni la wa nga sai lam chye lu ai.